ನ್ಯಾಟೋ ಒಕ್ಕೂಟದ ಮೇಲೆ ಯುದ್ಧ ಘೋಷಣೆಗೆ ಮುಂದಾಗುತ್ತಿದೆಯೇ ರಷ್ಯಾ?

ರಷ್ಯಾ-ಉಕ್ರೇನ್ ಸಂಘರ್ಷದ ತೀವ್ರತೆಯಿಂದಾಗಿ ಈಗಾಗಲೇ ಜಗತ್ತು ಕಂಗೆಟ್ಟಿರುವ ಬೆನ್ನಲ್ಲೇ, ಇದೀಗ ಜಾಗತಿಕ ಸಮುದಾಯಕ್ಕೆ ಮತ್ತೊಂದು ಶಾಕಿಂಗ್ ಸುದ್ದಿ ಎದುರಾಗಿದೆ. ಹಲವು ದಿನಗಳಿಂದ ತಣ್ಣಗಾಗಿದ್ದ ಜಾಗತಿಕ ಬಿಕ್ಕಟ್ಟು ಮತ್ತೆ ಕಾವೇರಲಾರಂಭಿಸಿದ್ದು, ರಷ್ಯಾದ ಇತ್ತೀಚಿನ ತಂತ್ರಗಳು 3ನೇ ಮಹಾಯುದ್ಧಕ್ಕೆ ನಾಂದಿ ಹಾಡುತ್ತವೆಯೇ ಎಂಬ ಆತಂಕ ಸೃಷ್ಟಿಯಾಗಿದೆ.

ಪೋಲೆಂಡ್ ಗಡಿಯಲ್ಲಿ ರಷ್ಯಾದ ಮಿಲಿಟರಿ ಪ್ರಚೋದನೆ: ಹೆಚ್ಚಿದ ಭೀತಿ

ನ್ಯಾಟೋ (NATO) ಒಕ್ಕೂಟದ ಪ್ರಮುಖ ಸದಸ್ಯ ರಾಷ್ಟ್ರಗಳಲ್ಲಿ ಒಂದಾಗಿರುವ ಪೋಲೆಂಡ್ ಮೇಲೆ ರಷ್ಯಾ ಕಣ್ಣಿಟ್ಟಿದೆ ಎಂಬ ಆತಂಕಕಾರಿ ವರದಿಗಳು ಸದ್ಯ ಅಂತಾರಾಷ್ಟ್ರೀಯ ವಲಯದಲ್ಲಿ ಹರಿದಾಡುತ್ತಿವೆ. ಅಮೆರಿಕ ಹಾಗೂ ಪಾಶ್ಚಿಮಾತ್ಯ ಗುಪ್ತಚರ ಇಲಾಖೆಗಳ ಮಾಹಿತಿ ಪ್ರಕಾರ, ಪೋಲೆಂಡ್ ಅಥವಾ ಬಾಲ್ಟಿಕ್ ರಾಷ್ಟ್ರಗಳ ಗಡಿಭಾಗದಲ್ಲಿ ರಷ್ಯಾ ಸೀಮಿತ ಮಿಲಿಟರಿ ಪ್ರಚೋದನೆ ಅಥವಾ ‘ಹೈಬ್ರಿಡ್ ದಾಳಿ’ ನಡೆಸಲು ಚಿಂತನೆ ನಡೆಸುತ್ತಿದೆ.

ಒಂದು ವೇಳೆ ನ್ಯಾಟೋ ಸದಸ್ಯ ರಾಷ್ಟ್ರದ ಮೇಲೆ ರಷ್ಯಾ ದಾಳಿ ನಡೆಸಿದ್ದೇ ಆದಲ್ಲಿ, ನ್ಯಾಟೋದ ‘ಆರ್ಟಿಕಲ್ 5’ (ಒಬ್ಬರ ಮೇಲಿನ ದಾಳಿ ಇಡೀ ಒಕ್ಕೂಟದ ಮೇಲಿನ ದಾಳಿ) ನಿಯಮದನ್ವಯ ಅಮೆರಿಕ ಸೇರಿದಂತೆ 30ಕ್ಕೂ ಹೆಚ್ಚು ದೇಶಗಳು ರಷ್ಯಾ ವಿರುದ್ಧ ನೇರ ಯುದ್ಧಕ್ಕೆ ಇಳಿಯಬೇಕಾಗುತ್ತದೆ. ಇದು ಅಂತಿಮವಾಗಿ 3ನೇ ಜಾಗತಿಕ ಯುದ್ಧಕ್ಕೆ ಕಾರಣವಾಗಬಹುದು ಎಂದು ಹೇಳಲಾಗ್ತಿದೆ.

ತೈಲ ಮಾರುಕಟ್ಟೆ ಮತ್ತು ಪೆಟ್ರೋಲ್, ಡೀಸೆಲ್ ಅಭಾವದ ಆತಂಕ

ವಿಶ್ವದ ಅತಿ ದೊಡ್ಡ ಇಂಧನ ಉತ್ಪಾದಕ ರಾಷ್ಟ್ರವಾಗಿರುವ ರಷ್ಯಾ, ಮತ್ತೊಂದು ಯುದ್ಧಕ್ಕೆ ಮುಂದಾದರೆ ಏಷ್ಯಾ ಸೇರಿದಂತೆ ಜಗತ್ತಿನ ಹಲವು ದೇಶಗಳಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ಅಭಾವ ತಲೆದೋರುವ ಸಾಧ್ಯತೆಯಿದೆ. ಇತ್ತೀಚಿನ ದಿನಗಳಲ್ಲಿ ಉಕ್ರೇನ್ ನಡೆಸಿದ ಸರಣಿ ಡ್ರೋನ್ ದಾಳಿಗಳಿಂದಾಗಿ ರಷ್ಯಾದ ಹಲವು ತೈಲ ಸಂಸ್ಕರಣಾ ಘಟಕಗಳಿಗೆ ಹಾನಿಯಾಗಿದ್ದು ಜಾಗತಿಕ ತೈಲ ಮಾರುಕಟ್ಟೆಯಲ್ಲಿ ಏರುಪೇರು ಉಂಟಾಗಿತ್ತು. ಒಂದು ವೇಳೆ ರಷ್ಯಾ ನೇರವಾಗಿ ನ್ಯಾಟೋ ಜೊತೆ ಸಂಘರ್ಷಕ್ಕೆ ಇಳಿದರೆ ಇಂಧನ ಪೂರೈಕೆ ಸಂಪೂರ್ಣ ಸ್ಥಗಿತಗೊಂಡು ಕಚ್ಚಾ ತೈಲದ ಬೆಲೆ ಗಗನಕ್ಕೇರಲಿದೆ.

ಈ ಬಾರಿ ರಷ್ಯಾ ಸಜ್ಜು: ಬರೋಬ್ಬರಿ ಇಂಧನ ಮೀಸಲು?

ಕಳೆದ ಬಾರಿ ಯುದ್ಧದ ಸಂದರ್ಭದಲ್ಲಿ ತೈಲ ಸಂಸ್ಕರಣಾ ಘಟಕಗಳ ಮೇಲಿನ ದಾಳಿಯಿಂದಾಗಿ ರಷ್ಯಾ ದೇಶೀಯ ಮಾರುಕಟ್ಟೆಯಲ್ಲೇ ಶುದ್ಧೀಕರಿಸಿದ ತೈಲಕ್ಕಾಗಿ ಪರದಾಡುವಂತಾಗಿತ್ತು. ಆದರೆ ಈ ಬಾರಿ ಮುನ್ನೆಚ್ಚರಿಕೆ ವಹಿಸಿರುವ ಕ್ರೆಮ್ಲಿನ್ (ರಷ್ಯಾ ಸರ್ಕಾರ), ಯುದ್ಧದ ತುರ್ತು ಪರಿಸ್ಥಿತಿಯನ್ನು ಎದುರಿಸಲು ಸಾವಿರಾರು ಬ್ಯಾರಲ್ಗಳಷ್ಟು ಇಂಧನವನ್ನು ರಿಸರ್ವ್ ಆಗಿ ಇಟ್ಟುಕೊಂಡಿದೆ ಎಂಬ ಮಾಹಿತಿಯಿದೆ. ರಷ್ಯಾದ ಈ ಆಕ್ರಮಣಕಾರಿ ನಿಲುವನ್ನು ವಿಶ್ವದ ಹಲವು ಪ್ರಮುಖ ದೇಶಗಳು ಈಗಾಗಲೇ ತೀವ್ರವಾಗಿ ಖಂಡಿಸಿದ್ದು, ಮುಂಬರುವ ದಿನಗಳಲ್ಲಿ ಈ ಬಿಕ್ಕಟ್ಟು ಯಾವ ತಿರುವು ಪಡೆದುಕೊಳ್ಳಲಿದೆ ಎಂಬುದನ್ನು ಜಗತ್ತು ಉಸಿರು ಬಿಗಿಹಿಡಿದು ನೋಡುತ್ತಿದೆ.