ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಆಕ್ರಮಣಕಾರಿ ವಲಸೆ ನೀತಿಗಳು ಮತ್ತು ಇರಾನ್ ಮೇಲಿನ ಯುದ್ಧದ ಕ್ರಮಗಳ ವಿರುದ್ಧ ವಿಶ್ವದಾದ್ಯಂತ ಜನಾಗ್ರಹ ಸ್ಫೋಟಗೊಂಡಿದೆ. ಶನಿವಾರ ಅಮೆರಿಕದ 50 ರಾಜ್ಯಗಳು ಸೇರಿದಂತೆ ಯುರೋಪ್ನ ಪ್ರಮುಖ ನಗರಗಳಲ್ಲಿ “ನೋ ಕಿಂಗ್ಸ್” (No Kings) ಹೆಸರಿನಡಿ ಬೃಹತ್ ರ್ಯಾಲಿಗಳು ನಡೆದಿದ್ದು, ಸುಮಾರು 90 ಲಕ್ಷಕ್ಕೂ ಅಧಿಕ ಜನರು ಪ್ರತಿಭಟನೆಯಲ್ಲಿ ಭಾಗವಹಿಸಿದ್ದಾರೆ ಎಂದು ಅಂದಾಜಿಸಲಾಗಿದೆ.
ಈ ಬೃಹತ್ ಚಳವಳಿಯ ಕೇಂದ್ರಬಿಂದುವಾಗಿ ಮಿನ್ನೇಸೋಟ ಹೊರಹೊಮ್ಮಿದೆ. ಸೇಂಟ್ ಪಾಲ್ನಲ್ಲಿರುವ ಮಿನ್ನೇಸೋಟ ಕ್ಯಾಪಿಟಲ್ ಆವರಣದಲ್ಲಿ ಸಾವಿರಾರು ಜನರು ಅಮೆರಿಕದ ಧ್ವಜವನ್ನು ತಲೆಕೆಳಗಾಗಿ ಹಿಡಿದು (ದುಃಖದ ಸಂಕೇತ) ಪ್ರತಿಭಟಿಸಿದರು. ಫೆಡರಲ್ ಏಜೆಂಟ್ಗಳಿಂದ ರೆನೀ ಗುಡ್ ಮತ್ತು ಅಲೆಕ್ಸ್ ಪ್ರೆಟ್ಟಿ ಎಂಬುವವರ ಸಾವಿಗೆ ನ್ಯಾಯ ಕೋರಿ ಹಾಗೂ ಟ್ರಂಪ್ ಆಡಳಿತದ ಕಠಿಣ ವಲಸೆ ನಿಯಮಗಳನ್ನು ವಿರೋಧಿಸಿ ಈ ಬೃಹತ್ ಪ್ರತಿಭಟನೆ ನಡೆಸಲಾಯಿತು.
ಖ್ಯಾತ ಗಾಯಕ ಬ್ರೂಸ್ ಸ್ಪ್ರಿಂಗ್ಸ್ಟೀನ್ ಅವರು ʼಸ್ಟ್ರೀಟ್ಸ್ ಆಫ್ ಮಿನ್ನಿಯಾಪೋಲಿಸ್ʼ ಹಾಡುವ ಮೂಲಕ ಪ್ರತಿಭಟನಾಕಾರರಲ್ಲಿ ಉತ್ಸಾಹ ತುಂಬಿದರು. ನಿಮ್ಮ ಈ ಬದ್ಧತೆಯೇ ಅಮೆರಿಕದ ನಿಜವಾದ ಶಕ್ತಿ ಎಂದು ಹೇಳಿದ ಅವರು, ಸರ್ವಾಧಿಕಾರಿ ಧೋರಣೆಗಳ ವಿರುದ್ಧ ಧ್ವನಿ ಎತ್ತುವಂತೆ ಕರೆ ನೀಡಿದರು. ಹಿರಿಯ ನಟ ರಾಬರ್ಟ್ ಡೆನಿರೊ ಕೂಡ ವಿಡಿಯೋ ಸಂದೇಶದ ಮೂಲಕ ಬೆಂಬಲ ವ್ಯಕ್ತಪಡಿಸಿ, ಐಸಿಇ (ICE) ಏಜೆಂಟ್ಗಳನ್ನು ಓಡಿಸಿದ್ದಕ್ಕಾಗಿ ಮಿನ್ನೇಸೋಟ ಜನತೆಗೆ ಅಭಿನಂದನೆಗಳು ಎಂದಿದ್ದಾರೆ.
ವಿಶ್ವವ್ಯಾಪಿ ಹರಡಿದ “ನೋ ಕಿಂಗ್ಸ್” ಕಿಚ್ಚು
ವಾಷಿಂಗ್ಟನ್ನ ನ್ಯಾಷನಲ್ ಮಾಲ್ನಲ್ಲಿ ಸಾವಿರಾರು ಜನರು ʼಕಿರೀಟವನ್ನುʼ ಕೆಳಗಿಳಿಸಿ ಎಂಬ ಫಲಕಗಳೊಂದಿಗೆ ಮೆರವಣಿಗೆ ನಡೆಸಿದರು. ಸ್ಯಾನ್ ಡಿಯಾಗೋದಲ್ಲಿ 40,000ಕ್ಕೂ ಹೆಚ್ಚು ಜನರು ಭಾಗವಹಿಸಿದ್ದರು. ಕೇವಲ ನಗರಗಳಲ್ಲದೆ, ಟ್ರಂಪ್ ಅವರಿಗೆ 2024ರಲ್ಲಿ ಭಾರಿ ಬೆಂಬಲ ನೀಡಿದ್ದ ಇಡಾಹೊದಂತಹ ಸಣ್ಣ ಪಟ್ಟಣಗಳಲ್ಲೂ ಜನರು ಪ್ರತಿಭಟನೆಗೆ ಕೈಜೋಡಿಸಿರುವುದು ಆಡಳಿತಕ್ಕೆ ನಡುಕ ಹುಟ್ಟಿಸಿದೆ.
ಯುರೋಪ್ನಲ್ಲೂ ಇದರ ಪ್ರತಿಧ್ವನಿ ಕೇಳಿಬಂದಿದೆ:
ಲಂಡನ್ನಲ್ಲಿ ಇರಾನ್ ಯುದ್ಧದ ವಿರುದ್ಧ ಮತ್ತು ಜನಾಂಗೀಯತೆಯ ವಿರುದ್ಧ ಬೃಹತ್ ಬ್ಯಾನರ್ಗಳನ್ನು ಹಿಡಿದು ಜನರು ಪ್ರತಿಭಟಿಸಿದರು. ಇದರೊಟ್ಟಿಗೆ ರೋಮ್ನಲ್ಲಿ ಇಟಲಿಯ ಪ್ರಧಾನಿ ಮೆಲೋನಿ ಸರ್ಕಾರ ಮತ್ತು ಇರಾನ್ ಮೇಲಿನ ದಾಳಿಯ ವಿರುದ್ಧ ಸಾವಿರಾರು ಜನರು ಘೋಷಣೆ ಕೂಗಿದರು.ಇನ್ನೂ ಪ್ಯಾರಿಸ್ನಲ್ಲಿ ಅಮೆರಿಕದ ಅನಿವಾಸಿಗಳು ಮತ್ತು ಫ್ರೆಂಚ್ ಸಂಘಟನೆಗಳು ಬಾಸ್ಟಿಲ್ನಲ್ಲಿ ಒಟ್ಟುಗೂಡಿ ಟ್ರಂಪ್ ಅವರ ಅನೈತಿಕ ಯುದ್ಧಗಳನ್ನು ಖಂಡಿಸಿ ಪ್ರತಿಭಟನೆ ನಡೆಸಿದರು.
ಈ ಪ್ರತಿಭಟನೆಗಳನ್ನು ಶ್ವೇತಭವನದ ವಕ್ತಾರೆ ಅಬಿಗೈಲ್ ಜಾಕ್ಸನ್ ತಳ್ಳಿಹಾಕಿದ್ದಾರೆ. ಇವು ಎಡಪಂಥೀಯ ಹಣಕಾಸು ಜಾಲಗಳಿಂದ ಪ್ರೇರಿತವಾದ ಕಾರ್ಯಕ್ರಮಗಳಾಗಿದ್ದು, ಇವುಗಳಿಗೆ ಸಾರ್ವಜನಿಕ ಬೆಂಬಲವಿಲ್ಲ ಎಂದು ಅವರು ಟೀಕಿಸಿದ್ದಾರೆ. ರಾಷ್ಟ್ರೀಯ ರಿಪಬ್ಲಿಕನ್ ಕಾಂಗ್ರೆಸ್ ಸಮಿತಿಯು ಈ ರ್ಯಾಲಿಗಳನ್ನು ಅಮೆರಿಕ ವಿರೋಧಿ ಎಂದು ಕರೆದಿದೆ.
ಜೂನ್ನಲ್ಲಿ 5 ಮಿಲಿಯನ್ ಮತ್ತು ಅಕ್ಟೋಬರ್ನಲ್ಲಿ 7 ಮಿಲಿಯನ್ ಜನರನ್ನು ತಲುಪಿದ್ದ ಈ ಚಳವಳಿ, ಈಗ 9 ಮಿಲಿಯನ್ ಗಡಿ ದಾಟುವ ನಿರೀಕ್ಷೆಯಲ್ಲಿದೆ. ಇನ್ಡಿವಿಸಿಬಲ್ (Indivisible) ಸಂಘಟನೆಯ ನೇತೃತ್ವದಲ್ಲಿ ನಡೆಯುತ್ತಿರುವ ಈ ಪ್ರತಿಭಟನೆಗಳು ಮುಂಬರುವ ದಿನಗಳಲ್ಲಿ ಇನ್ನಷ್ಟು ತೀವ್ರಗೊಳ್ಳುವ ಲಕ್ಷಣಗಳು ಕಾಣುತ್ತಿವೆ.