ಲೋಕದ ವಿವಿಧ ದೇಶಗಳಲ್ಲಿ ವಿಚಿತ್ರ ಹಾಗೂ ಅಚ್ಚರಿಯ ಬೆಳವಣಿಗೆಗಳು ನಡೆಯುತ್ತಲೇ ಇರುತ್ತವೆ. ಇತ್ತೀಚೆಗೆ ಯುರೋಪಿನ ಒಂದು ದೇಶದಿಂದ ಹೊರಬಂದಿರುವ ಸುದ್ದಿ ಇದೀಗ ಜಾಗತಿಕ ಮಟ್ಟದಲ್ಲಿ ವೈರಲ್ ಆಗಿದೆ. ಲಾಟ್ವಿಯಾ (Latvia) ಎಂಬ ಈ ದೇಶದಲ್ಲಿ ಮಹಿಳೆಯರು ಗಂಡನನ್ನೇ ಬಾಡಿಗೆಗೆ ಪಡೆಯುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಕೇಳಲು ಅಚ್ಚರಿಯಾದರೂ, ಲಿಂಗತ್ವ ಸಮಾನತೆ ಕುಸಿದ (Gender Imbalance) ಪರಿಣಾಮ ಎಂದು ತಜ್ಞರು ಹೇಳುತ್ತಿದ್ದಾರೆ.
ಯುರೋಸ್ಟಾಟ್ (Eurostat) ಬಿಡುಗಡೆ ಮಾಡಿದ ಅಧಿಕೃತ ಅಂಕಿಅಂಶಗಳ ಪ್ರಕಾರ, ಲಾಟ್ವಿಯಾದಲ್ಲಿ ಪುರುಷರಿಗಿಂತ ಮಹಿಳೆಯರ ಸಂಖ್ಯೆ 15.5% ಹೆಚ್ಚು ಇದೆ. ಇದು ಯುರೋಪಿಯನ್ ಯೂನಿಯನ್ನ ಸರಾಸರಿ ಲಿಂಗ ಅಂತರಕ್ಕಿಂತ ಬಹಳ ಹೆಚ್ಚಾಗಿದೆ. ವಿಶೇಷವಾಗಿ 65 ವರ್ಷ ಮೇಲ್ಪಟ್ಟ ವಯೋವರ್ಗದಲ್ಲಿ, ಮಹಿಳೆಯರ ಸಂಖ್ಯೆ ಪುರುಷರಿಗಿಂತ ಎರಡು ಪಟ್ಟು ಹೆಚ್ಚು ಇದೆ ಎಂದು ವರ್ಡ್ ಅಟ್ಲಾಸ್ (World Atlas) ವರದಿ ತಿಳಿಸಿದೆ.
ಪುರುಷರ ಕೊರತೆ ಕೆಲಸದ ಸ್ಥಳಗಳಲ್ಲಿ ಮತ್ತು ದೈನಂದಿನ ಜೀವನದಲ್ಲೂ ಸ್ಪಷ್ಟವಾಗಿ ಗೋಚರಿಸುತ್ತಿದೆ. ಕೆಲಸದ ಸ್ಥಳಗಳು, ಸಾಮಾಜಿಕ ಕಾರ್ಯಕ್ರಮಗಳು, ಹಬ್ಬ-ಹರಿದಿನಗಳು ಎಲ್ಲೆಡೆ ಮಹಿಳೆಯರೇ ಹೆಚ್ಚು ಕಾಣಿಸುತ್ತಿದ್ದಾರೆ. ಹಬ್ಬಗಳಲ್ಲಿ ಕೆಲಸ ಮಾಡುವ ಡೇನಿಯಾ ಎಂಬ ಮಹಿಳೆ, “ನಮ್ಮ ತಂಡದಲ್ಲಿ ಬಹುತೇಕ ಮಹಿಳೆಯರೇ ಇದ್ದಾರೆ. ಅವರೊಂದಿಗೆ ಕೆಲಸ ಮಾಡುವುದರಲ್ಲಿ ನನಗೆ ಯಾವುದೇ ಸಮಸ್ಯೆ ಇಲ್ಲ. ಆದರೆ ಲಿಂಗ ಸಮತೋಲನ ಇದ್ದರೆ ಸಾಮಾಜಿಕ ಸಂವಹನ ಇನ್ನಷ್ಟು ಚೆನ್ನಾಗಿರುತ್ತಿತ್ತು” ಎಂದು ಹೇಳಿದ್ದಾಳೆ.
ದೇಶದಲ್ಲೇ ಸಂಗಾತಿಗಳು ಸಿಗುವುದು ಕಷ್ಟವಾಗುತ್ತಿರುವುದರಿಂದ ಅನೇಕ ಲಾಟ್ವಿಯನ್ ಮಹಿಳೆಯರು ವಿದೇಶಗಳಿಗೆ ತೆರಳಿ ಜೀವನ ಸಂಗಾತಿಯನ್ನು ಹುಡುಕುತ್ತಿದ್ದಾರೆ. ಡೇನಿಯಾದ ಸ್ನೇಹಿತೆ ಝಾನೆ ಹೇಳುವಂತೆ, “ನಮ್ಮ ದೇಶದಲ್ಲಿ ಪುರುಷರ ಸಂಖ್ಯೆ ಕಡಿಮೆಯಾಗುತ್ತಿರುವುದರಿಂದ ಮದುವೆ ಮತ್ತು ಕುಟುಂಬ ಜೀವನಕ್ಕೂ ಇದು ದೊಡ್ಡ ಸಮಸ್ಯೆಯಾಗಿದೆ.” ಎಂದಿದ್ದಾರೆ.
ಇಂತಹ ಪರಿಸ್ಥಿತಿಯಲ್ಲಿ, ಮನೆ ಕೆಲಸಗಳನ್ನು ನಿಭಾಯಿಸಲು ಅನೇಕ ಮಹಿಳೆಯರು ಹೊಸ ಪರಿಹಾರವನ್ನು ಕಂಡುಕೊಂಡಿದ್ದಾರೆ. “ರೆಂಟ್ ಎ ಹಸ್ಬೆಂಡ್” ಸೇವೆ. ಲಾಟ್ವಿಯಾದಲ್ಲಿ Komanda24 ಎಂಬ ವೇದಿಕೆ “ಗೋಲ್ಡನ್ ಹ್ಯಾಂಡ್ಸ್ ಇರುವ ಪುರುಷರು” ಎಂಬ ಹೆಸರಿನಲ್ಲಿ ಸೇವೆ ಒದಗಿಸುತ್ತಿದೆ. ಪ್ಲಂಬಿಂಗ್, ಮರಕೆಲಸ, ವಿದ್ಯುತ್ ರಿಪೇರಿ, ಟಿವಿ ಇನ್ಸ್ಟಾಲೇಷನ್ ಮುಂತಾದ ಕೆಲಸಗಳಿಗೆ ಪುರುಷ ಕಾರ್ಮಿಕರನ್ನು ಬಾಡಿಗೆಗೆ ಕರೆಸಿಕೊಳ್ಳಬಹುದು.
ಇದೇ ರೀತಿಯಲ್ಲಿ Remontdarbi.lv ಎಂಬ ಮತ್ತೊಂದು ವೆಬ್ಸೈಟ್ನಲ್ಲಿ “ಒಂದು ಗಂಟೆಗೆ ಗಂಡ” ಎಂಬ ಸೇವೆ ಲಭ್ಯವಿದೆ. ಮಹಿಳೆಯರು ಆನ್ಲೈನ್ ಅಥವಾ ಫೋನ್ ಮೂಲಕ ಬುಕ್ ಮಾಡಿದರೆ, ಕೆಲಸಗಾರರು ತಕ್ಷಣ ಮನೆಗೆ ಬಂದು ಬಣ್ಣ ಹಚ್ಚುವುದು, ಪರದೆ ಸರಿಪಡಿಸುವುದು, ಸಣ್ಣ-ಪುಟ್ಟ ದುರಸ್ತಿ ಕೆಲಸಗಳನ್ನು ಮಾಡಿಕೊಡುತ್ತಾರೆ. ಇಲ್ಲಿ “ಗಂಡ” ಎನ್ನುವ ಪದವು ವೈವಾಹಿಕ ಅರ್ಥದಲ್ಲಲ್ಲ, ಬದಲಾಗಿ ಮನೆಯ ಪುರುಷ ಸದಸ್ಯರಿಂದ ಸಾಮಾನ್ಯವಾಗಿ ಮಾಡುವ ಕೆಲಸಗಳಿಗೆ ಸೀಮಿತವಾಗಿದೆ.
ತಜ್ಞರ ಪ್ರಕಾರ, ಲಾಟ್ವಿಯಾದಲ್ಲಿನ ಈ ಲಿಂಗ ಅಸಮತೋಲನಕ್ಕೆ ಪುರುಷರ ಕಡಿಮೆ ಆಯಸ್ಸು ಪ್ರಮುಖ ಕಾರಣ. ಹೆಚ್ಚು ಧೂಮಪಾನ, ಅಸ್ವಸ್ಥ ಜೀವನಶೈಲಿ ಹಾಗೂ ಆರೋಗ್ಯ ಸಮಸ್ಯೆಗಳು ಇದಕ್ಕೆ ಕಾರಣವಾಗಿವೆ. ವರ್ಲ್ಡ್ ಅಟ್ಲಾಸ್ ವರದಿ ಪ್ರಕಾರ, ಲಾಟ್ವಿಯಾದ ಪುರುಷರಲ್ಲಿ 31% ಜನ ಧೂಮಪಾನ ಮಾಡುತ್ತಾರೆ, ಮಹಿಳೆಯರಲ್ಲಿ ಇದು ಕೇವಲ 10% ಮಾತ್ರ. ಜೊತೆಗೆ ಸ್ಥೂಲಕಾಯ ಮತ್ತು ಮದ್ಯಪಾನ ಸಮಸ್ಯೆಗಳೂ ಪುರುಷರಲ್ಲಿ ಹೆಚ್ಚಾಗಿ ಕಂಡುಬರುತ್ತವೆ.
ಈ ರೀತಿಯ ಗಂಡ ಬಾಡಿಗೆ ಸಂಸ್ಕೃತಿ ಲಾಟ್ವಿಯಾದಲ್ಲಷ್ಟೇ ಸೀಮಿತವಾಗಿಲ್ಲ. ಯುಕೆಯಲ್ಲಿ 2022ರಲ್ಲಿ ಲೌರಾ ಯಂಗ್ ತಮ್ಮ ಗಂಡ ಜೇಮ್ಸ್ ಮೂಲಕ “Rent My Handy Husband” ಎಂಬ ವ್ಯವಹಾರ ಆರಂಭಿಸಿ ಸಾಕಷ್ಟು ಗಮನ ಸೆಳೆದಿದ್ದರು. ಜೇಮ್ಸ್ ಗಂಟೆ ಅಥವಾ ದಿನದ ಆಧಾರದ ಮೇಲೆ ಮನೆ ಕೆಲಸಗಳನ್ನು ಮಾಡಿ ಉತ್ತಮ ಆದಾಯ ಗಳಿಸುತ್ತಿದ್ದಾರೆ.