israel iran war: ಮೊದಲ ಬಾರಿಗೆ ‘ಐರನ್ ಬೀಮ್’ ಲೇಸರ್ ಅಸ್ತ್ರ ಪ್ರಯೋಗಿಸಿದ ಇಸ್ರೇಲ್

ಜೆರುಸಲೇಂ: ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಜ್ವಾಲೆ ಹೆಚ್ಚಾಗುತ್ತಿರುವ ಬೆನ್ನಲ್ಲೇ, ಇಸ್ರೇಲ್ ತನ್ನ ಅತ್ಯಾಧುನಿಕ ಮತ್ತು ವಿಶ್ವದ ಮೊದಲ ಲೇಸರ್ ಆಧಾರಿತ ವಾಯು ರಕ್ಷಣಾ ವ್ಯವಸ್ಥೆ ‘ಐರನ್ ಬೀಮ್’ (Iron Beam) ಅನ್ನು ಅಧಿಕೃತವಾಗಿ ಯುದ್ಧರಂಗಕ್ಕೆ ಇಳಿಸಿದೆ. ಇಂದು (ಮಾರ್ಚ್‌ 2, 2026) ಮುಂಜಾನೆ ಲೆಬನಾನ್‌ನ ಹೆಜ್ಬೊಲ್ಲಾ ಉಗ್ರರು ಹಾರಿಸಿದ ಡ್ರೋನ್‌ಗಳನ್ನು ಈ ಲೇಸರ್ ಅಸ್ತ್ರವು ಕ್ಷಣಾರ್ಧದಲ್ಲಿ ಹೊಡೆದುರುಳಿಸಿರುವ ದೃಶ್ಯಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.

ಮೊದಲ ಯುದ್ಧ ಬಳಕೆ: ಏನಿದು ಘಟನೆ ?

ಇರಾನ್‌ನ ಸುಪ್ರೀಂ ಲೀಡರ್ ಅಲಿ ಖಮೇನಿ ಹತ್ಯೆಯ ನಂತರ ಕೆರಳಿರುವ ಹೆಜ್ಬೊಲ್ಲಾ, ಲೆಬನಾನ್‌ನಿಂದ ಇಸ್ರೇಲ್‌ನ ಉತ್ತರ ಗಡಿಯತ್ತ ರಾಕೆಟ್‌ಗಳು ಮತ್ತು ಡ್ರೋನ್‌ಗಳ ಸಮೂಹವನ್ನೇ ಹಾರಿಸಿತ್ತು. ಈ ವೇಳೆ ಶ್ಲೋಮಿಯ ಗಡಿ ಸಮುದಾಯದ ಬಳಿ ಬಂದ ಡ್ರೋನ್ ಅನ್ನು ಐರನ್ ಬೀಮ್ ಲೇಸರ್ ವ್ಯವಸ್ಥೆಯು ಅತ್ಯಂತ ನಿಖರವಾಗಿ ತಡೆದಿದೆ. ಈ ಬೀಮ್‌ ಲೇಸರ್‌ ಅನ್ನು ಒದಲ ಬಾರಿ ಕಾರ್ಯಾಚರಣೆಯ ಬಳಕೆಯಾಗಿದೆ (First Operational Use). ಕಳೆದ ಡಿಸೆಂಬರ್‌ನಲ್ಲಿಷ್ಟೇ ಇದನ್ನು ಇಸ್ರೇಲಿ ವಾಯುಪಡೆಗೆ ಹಸ್ತಾಂತರಿಸಲಾಗಿತ್ತು.

ಐರನ್ ಬೀಮ್ ಕೆಲಸ ಮಾಡುವುದು ಹೇಗೆ?

ರಕ್ಷಣಾ ಸಚಿವಾಲಯದ ಪ್ರಕಾರ, ಐರನ್ ಬೀಮ್ ಒಂದು ‘ಹೈ-ಪವರ್ ಲೇಸರ್’ ಅಸ್ತ್ರವಾಗಿದೆ. ಇದು ಸಾಂಪ್ರದಾಯಿಕ ಕ್ಷಿಪಣಿಗಳ ಬದಲು ಕೇವಲ ಬೆಳಕಿನ ಕಿರಣವನ್ನು ಬಳಸಿ ಶತ್ರುಗಳ ಗುರಿಯನ್ನು ತಲುಪುತ್ತದೆ.

• ವೆಚ್ಚದಾಯಕವಲ್ಲ: ಐರನ್ ಡೋಮ್‌ನ ಒಂದು ಕ್ಷಿಪಣಿಗೆ ಲಕ್ಷಾಂತರ ರೂಪಾಯಿ ಖರ್ಚಾಗುತ್ತದೆ. ಆದರೆ ಲೇಸರ್ ಕಿರಣದ ಒಂದು ದಾಳಿಗೆ ಕೇವಲ ಬೆರಳೆಣಿಕೆಯಷ್ಟು ಹಣ ವ್ಯಯವಾಗುತ್ತದೆ.

• ಅಪಾರ ನಿಖರತೆ: ಇದು ಸುಧಾರಿತ ಎಲೆಕ್ಟ್ರೋ-ಆಪ್ಟಿಕಲ್ ಗುರಿ ವ್ಯವಸ್ಥೆಯನ್ನು ಹೊಂದಿದ್ದು, ರಾಕೆಟ್‌ಗಳು, ಮಾರ್ಟರ್‌ಗಳು ಮತ್ತು ಸಣ್ಣ ಡ್ರೋನ್‌ಗಳನ್ನು 10 ಕಿ.ಮೀ ವ್ಯಾಪ್ತಿಯಲ್ಲೇ ಸುಟ್ಟು ಬೂದಿ ಮಾಡಬಲ್ಲದು.

• ಬಹುಪದರದ ರಕ್ಷಣೆ: ಐರನ್ ಡೋಮ್, ಡೇವಿಡ್ಸ್ ಸ್ಲಿಂಗ್ ಮತ್ತು ಆರೋ ವ್ಯವಸ್ಥೆಗಳ ಜೊತೆಗೆ ಈ ಲೇಸರ್ ವ್ಯವಸ್ಥೆಯು ಇಸ್ರೇಲ್‌ಗೆ ಅಭೇದ್ಯವಾದ ರಕ್ಷಣಾ ಕವಚವನ್ನು ನೀಡಲಿದೆ.

ಹಿಜ್ಬೊಲ್ಲಾ ಸಂಘಟನೆಯು ಹೈಫಾ ಮತ್ತು ಕ್ರಯೋಟ್ ಪ್ರದೇಶಗಳನ್ನು ಗುರಿಯಾಗಿಸಿಕೊಂಡು ನಿಖರ ಕ್ಷಿಪಣಿ ದಾಳಿ ನಡೆಸಿತ್ತು. ಇದಕ್ಕೆ ತಕ್ಕ ಉತ್ತರ ನೀಡಲು ಇಸ್ರೇಲ್ ‘ಆಪರೇಷನ್ ರೋರಿಂಗ್ ಲಯನ್’ (Operation Roaring Lion) ಅಭಿಯಾನದ ಭಾಗವಾಗಿ ಲೆಬನಾನ್‌ನಾದ್ಯಂತ ತೀವ್ರ ವಾಯುದಾಳಿಗಳನ್ನು ನಡೆಸುತ್ತಿದೆ. ನಮ್ಮ ಉತ್ತರದ ನಿವಾಸಿಗಳಿಗೆ ಬೆದರಿಕೆ ಹಾಕಲು ನಾವು ಯಾರಿಗೂ ಬಿಡುವುದಿಲ್ಲ ಮತ್ತು ಸಂಘರ್ಷಕ್ಕೆ ನಾವು ಸಿದ್ಧರಿದ್ದೇವೆ ಎಂದು ಇಸ್ರೇಲಿ ಮಿಲಿಟರಿ ಸ್ಪಷ್ಟಪಡಿಸಿದೆ.

ಜಾಗತಿಕ ರಕ್ಷಣಾ ವಲಯದಲ್ಲಿ ಸಂಚಲನ

ಈವರೆಗೆ ಲೇಸರ್ ಅಸ್ತ್ರಗಳನ್ನು ಸೈನ್ಸ್ ಫಿಕ್ಷನ್ ಸಿನಿಮಾಗಳಲ್ಲಿ ಮಾತ್ರ ನೋಡಲಾಗುತ್ತಿತ್ತು. ಆದರೆ ಇಸ್ರೇಲ್ ಈಗ ಅದನ್ನು ರಿಯಲ್ ಆಗಿ ಯುದ್ಧದಲ್ಲಿ ಬಳಸಿ ತೋರಿಸಿದೆ. ಇದು ಮುಂದಿನ ದಿನಗಳಲ್ಲಿ ಸಾಂಪ್ರದಾಯಿಕ ಯುದ್ಧದ ಸ್ವರೂಪವನ್ನೇ ಬದಲಿಸುವ ನಿರೀಕ್ಷೆಯಿದೆ.