ಟೆಹ್ರಾನ್: ಇರಾನ್ ವಿರುದ್ಧ ನೇರ ಸಮರ ಸಾರಿರುವ ಇಸ್ರೇಲ್, ಈಗ ಇರಾನ್ ಬೆಂಬಲಿತ ಹೆಜ್ಬೊಲ್ಲಾ ಉಗ್ರ ಸಂಘಟನೆಯನ್ನು ಬೇರುಸಹಿತ ಕಿತ್ತೊಗೆಯಲು ಮುಂದಾಗಿದೆ. ಇದರ ಭಾಗವಾಗಿ ನಡೆಸಿದ ವಾಯುದಾಳಿಯಲ್ಲಿ ಹೆಜ್ಬೊಲ್ಲಾ ಮತ್ತು ಇರಾನ್ನ ಖುದ್ಸ್ ಫೋರ್ಸ್ ನಡುವಿನ ಪ್ರಮುಖ ಸಂಪರ್ಕ ಕೊಂಡಿಯಾಗಿದ್ದ, ಸುರಂಗ ಮಾರ್ಗಗಳ ಎಂಜಿನಿಯರ್ ಎಂದೇ ಕುಖ್ಯಾತನಾಗಿದ್ದ ಮಹದಿ ವಫಾಯಿನನ್ನು ಇಸ್ರೇಲ್ ಹತ್ಯೆ ಮಾಡಿದೆ.
ಯಾರು ಈ ಮಹದಿ ವಫಾಯಿ ?
ಮಹದಿ ವಫಾಯಿ ಕೇವಲ ಒಬ್ಬ ಉಗ್ರನಲ್ಲ, ಆತ ಇರಾನ್ನ ಪ್ರಭಾವಿ ‘ಖುದ್ಸ್ ಫೋರ್ಸ್’ನ ಲೆಬನಾನ್ ವಿಭಾಗದ ಮುಖ್ಯಸ್ಥನಾಗಿದ್ದ. ಲೆಬನಾನ್ ಮತ್ತು ಸಿರಿಯಾ ದೇಶಗಳಲ್ಲಿ ಇಸ್ರೇಲ್ ಗಡಿಯೊಳಗೆ ನುಗ್ಗಲು ನಿರ್ಮಿಸಲಾದ ಬೃಹತ್ ಭೂಗತ ಸುರಂಗ ಮಾರ್ಗಗಳ ಯೋಜನೆಗಳ ಹಿಂದಿನ ಮಾಸ್ಟರ್ಮೈಂಡ್ ಈತನಾಗಿದ್ದ. ಭೂಗತವಾಗಿ ಉಗ್ರರ ನೆಲೆಗಳನ್ನು ಸ್ಥಾಪಿಸುವಲ್ಲಿ ಈತ ಪರಿಣೊತನಾಗಿದ್ದರಿಂದ, ಈತನನ್ನು ಉಗ್ರ ಸಂಘಟನೆಗಳ ‘ಚೀಫ್ ಎಂಜಿನಿಯರ್’ ಎಂದು ಕರೆಯಲಾಗುತ್ತಿತ್ತು.
ಇರಾನ್ನ ಮಲ್ಲಾಹತ್ ಪ್ರದೇಶದಲ್ಲಿ ಇಸ್ರೇಲ್ ನಡೆಸಿದ ನಿಖರವಾದ ವೈಮಾನಿಕ ದಾಳಿಯಲ್ಲಿ ಮಹದಿ ವಫಾಯಿ ಹತ್ಯೆಯಾಗಿದ್ದಾನೆ ಎಂದು ಇರಾನ್ ಮೂಲಗಳು ದೃಢಪಡಿಸಿವೆ. ಹೆಜ್ಬೊಲ್ಲಾ ಮತ್ತು ಖುದ್ಸ್ ಫೋರ್ಸ್ ನಡುವಿನ ಸಮನ್ವಯತೆಯನ್ನು ಈತನೇ ನಿರ್ವಹಿಸುತ್ತಿದ್ದ. ಈತನ ಸಾವು ಹೆಜ್ಬೊಲ್ಲಾ ಸಂಘಟನೆಯ ರಕ್ಷಣಾತ್ಮಕ ಮತ್ತು ಆಕ್ರಮಣಕಾರಿ ಸುರಂಗ ಜಾಲಕ್ಕೆ ತುಂಬಲಾರದ ನಷ್ಟವನ್ನುಂಟು ಮಾಡಿದೆ.
ನಮ್ಮ ನಾಗರಿಕರ ಮೇಲೆ ದಾಳಿ ಮಾಡಲು ಸಂಚು ರೂಪಿಸುವ ಯಾವುದೇ ವ್ಯಕ್ತಿಯನ್ನು ನಾವು ಸುಮ್ಮನೆ ಬಿಡುವುದಿಲ್ಲ. ಮಹದಿ ವಫಾಯಿ ಹತ್ಯೆಯು ಹೆಜ್ಬೊಲ್ಲಾ ಸಂಘಟನೆಯ ಬೆನ್ನೆಲುಬು ಮುರಿದಂತಿದೆ ಎಂದು ಇಸ್ರೇಲ್ ರಕ್ಷಣಾ ಪಡೆ (IDF) ಹೇಳಿಕೆ ನೀಡಿದೆ. ಇಸ್ರೇಲ್ ಈಗ ಇರಾನ್ ಜೊತೆಗೆ ಲೆಬನಾನ್ ಮತ್ತು ಸಿರಿಯಾದಲ್ಲಿರುವ ಉಗ್ರರ ಅಡಗುತಾಣಗಳ ಮೇಲೆ ಸತತ ದಾಳಿ ನಡೆಸುತ್ತಿದೆ.
ಮಹದಿ ವಫಾಯಿ ಹತ್ಯೆಯಿಂದ ರೊಚ್ಚಿಗೆದ್ದಿರುವ ಇರಾನ್ ಮತ್ತು ಹೆಜ್ಬೊಲ್ಲಾ, ಇಸ್ರೇಲ್ ಮೇಲೆ ಪ್ರತೀಕಾರ ತೀರಿಸಿಕೊಳ್ಳುವುದಾಗಿ ಎಚ್ಚರಿಕೆ ನೀಡಿವೆ. ಈ ಬೆಳವಣಿಗೆಯಿಂದಾಗಿ ಪಶ್ಚಿಮ ಏಷ್ಯಾದಲ್ಲಿ ಯುದ್ಧದ ಕಿಚ್ಚು ಮತ್ತಷ್ಟು ಜೋರಾಗಿದ್ದು, ಜಾಗತಿಕ ಸಮುದಾಯವು ಆತಂಕದಿಂದ ಪರಿಸ್ಥಿತಿಯನ್ನು ಗಮನಿಸುತ್ತಿದೆ.