ಇಸ್ರೇಲ್-ಹಮಾಸ್ ಪರಿಣಾಮ: ಗಾಜಾದಲ್ಲಿ ಒಂದು ಪ್ಯಾಕ್ ಪಾರ್ಲೆಜಿ ಬಿಸ್ಕೆಟ್ಟಿಗೆ 2500 ರೂ..!

ಗಾಜಾ: ಭಾರತದಲ್ಲಿ ಕೇವಲ ಐದು ರೂಪಾಯಿಗೆ ಸಿಗುವ ಪಾರ್ಲೆ-ಜಿ ಬಿಸ್ಕೆಟ್ ದೇಶದಾದ್ಯಂತ ಜನಪ್ರಿಯವಾಗಿದೆ. ದಶಕಗಳಿಂದ ಈ ಬಿಸ್ಕೆಟ್ ಚಹಾದೊಂದಿಗೆ ಕುರುಕಲು ತಿನಿಸಾಗಿ, ಅಲ್ಪ ಪೌಷ್ಟಿಕಾಂಶದ ಆಹಾರವಾಗಿ ಮನೆಮಾತಾಗಿದೆ. ಆದರೆ, ಗಾಜಾ ಪಟ್ಟಿಯ ಜನರಿಗೆ ಈಗ ಈ ಬಿಸ್ಕೆಟ್ ಮುಖ್ಯ ಆಹಾರವಾಗಿದ್ದು, ಅದರ ಬೆಲೆ ಮೂಲದರಕ್ಕಿಂತ ನೂರಾರು ಪಟ್ಟು ದುಬಾರಿಯಾಗಿದೆ. ಇಸ್ರೇಲ್-ಹಮಾಸ್ ಯುದ್ಧದಿಂದಾಗಿ ಪ್ಯಾಲೆಸ್ಟೇನ್‌ನ ಜನರ ಜೀವನ ಆಸ್ತವ್ಯಸ್ತವಾಗಿದ್ದು, ತುತ್ತು ಆಹಾರಕ್ಕಾಗಿಯೇ ಪರದಾಡುವ ಸ್ಥಿತಿ ಉಂಟಾಗಿದೆ.

ಗಾಜಾದಲ್ಲಿ ಇಸ್ರೇಲ್ ಪಡೆಗಳ ನಿರಂತರ ದಾಳಿಗಳಿಂದ ಜನಜೀವನ ಸಂಪೂರ್ಣವಾಗಿ ಅಸ್ತವ್ಯಸ್ತವಾಗಿದೆ. 2023ರಲ್ಲಿ ಹಮಾಸ್ ಉಗ್ರರು ಇಸ್ರೇಲ್ ನಿವಾಸಿಗಳ ಮೇಲೆ ನಡೆಸಿದ ದಾಳಿಯು ಈ ಸಂಘರ್ಷಕ್ಕೆ ಕಾರಣವಾಯಿತು. ಆ ದಾಳಿಯಲ್ಲಿ ನೂರಾರು ಮಂದಿಯನ್ನು ಕೊಂದು, ಹಲವರನ್ನು ಒತ್ತೆಯಾಳಾಗಿ ಇರಿಸಿಕೊಂಡಿದ್ದರು. ಇದಕ್ಕೆ ಪ್ರತಿಕಾರವಾಗಿ, ಇಸ್ರೇಲ್ ತನ್ನ ಕಾರ್ಯಾಚರಣೆಯನ್ನು ತೀವ್ರಗೊಳಿಸಿತ್ತು. ಕೊನೆಯ ಒತ್ತೆಯಾಳು ಬಿಡುಗಡೆಯಾಗುವವರೆಗೂ ಯುದ್ಧ ನಿಲ್ಲಿಸುವುದಿಲ್ಲ ಎಂದು ಇಸ್ರೇಲ್ ಘೋಷಿಸಿದೆ. ಆದರೆ, ಈ ಯುದ್ಧದಿಂದಾಗಿ ಪ್ಯಾಲೆಸ್ಟೇನ್‌ನ ಸಾಮಾನ್ಯ ಜನರ ಜೀವನವೇ ಹಾಳಾಗಿದೆ. ಹಮಾಸ್‌ನ ಕೃತ್ಯಕ್ಕೆ ತಕ್ಕ ಶಿಕ್ಷೆಯಾಗಿ ಗಾಜಾದ ಜನರು ತೀವ್ರ ಬೆಲೆ ತೆರಬೇಕಾಗಿದೆ.

ಇತ್ತೀಚಿನ ಸಾಮಾಜಿಕ ಜಾಲತಾಣದ ವೀಡಿಯೊವೊಂದರಲ್ಲಿ ಗಾಜಾದ ದುಸ್ಥಿತಿಯನ್ನು ಓರ್ವ ವ್ಯಕ್ತಿ ವಿವರಿಸಿದ್ದಾರೆ. ತನ್ನ ಮಗುವಿಗೆ ಒಂದು ಪ್ಯಾಕ್ ಪಾರ್ಲೆ-ಜಿ ಬಿಸ್ಕೆಟ್ ಖರೀದಿಸಲು 25-30 ಯೂರೋ (ಭಾರತೀಯ ರೂಪಾಯಿಯಲ್ಲಿ ಸುಮಾರು 2500-3000 ರೂ.) ಖರ್ಚು ಮಾಡಬೇಕಾಯಿತು ಎಂದು ಅವರು ಹೇಳಿಕೊಂಡಿದ್ದಾರೆ. “ಹಿಂದೆ ಕೇವಲ 1.5 ಯೂರೋಗೆ ಸಿಗುತ್ತಿದ್ದ ಬಿಸ್ಕೆಟ್ ಈಗ 25 ಪಟ್ಟು ದುಬಾರಿಯಾಗಿದೆ. ಹಲವು ದಿನಗಳ ನಂತರ ನನ್ನ ಮಗನಿಗೆ ಇಷ್ಟವಾದ ಬಿಸ್ಕೆಟ್ ತಂದುಕೊಟ್ಟೆ,” ಎಂದು ಆ ವ್ಯಕ್ತಿ ಹೇಳಿಕೊಂಡಿದ್ದಾರೆ.

ಯುದ್ಧದಿಂದ ಗಾಜಾದಲ್ಲಿ ಆಹಾರ, ನೀರು, ಔಷಧಗಳ ಕೊರತೆ ತೀವ್ರವಾಗಿದೆ. ಮೂಲಭೂತ ಅಗತ್ಯ ವಸ್ತುಗಳ ಬೆಲೆ ಗಗನಕ್ಕೇರಿದೆ. ಜನರು ಕೇವಲ ಬದುಕಲು ದಿನನಿತ್ಯದ ಹೋರಾಟದಲ್ಲಿ ತೊಡಗಿದ್ದಾರೆ. ಹಮಾಸ್‌ನ ಆರಂಭಿಕ ದಾಳಿಯಿಂದ ಉಂಟಾದ ಈ ಯುದ್ಧ, ಇಂದು ಪ್ಯಾಲೆಸ್ಟೇನ್‌ನ ಸಾಮಾನ್ಯ ಜನರ ಜೀವನವನ್ನು ಸಂಪೂರ್ಣವಾಗಿ ನಾಶಮಾಡಿದೆ. ಇಸ್ರೇಲ್‌ನ ದಾಳಿಗಳಿಂದಾಗಿ ಮನೆಗಳು, ಆಸ್ಪತ್ರೆಗಳು, ಶಾಲೆಗಳು ಧ್ವಂಸಗೊಂಡಿವೆ.

ಗಾಜಾದ ಜನರ ಈ ದುಃಖಕರ ಸ್ಥಿತಿಗೆ ಹಮಾಸ್‌ನ ಕೃತ್ಯವೇ ಮೂಲ ಕಾರಣವೆಂದು ಇಸ್ರೇಲ್ ಆರೋಪಿಸಿದೆ. ಆದರೆ, ಈ ಯುದ್ಧದಿಂದ ಸಾಮಾನ್ಯ ಜನರಿಗೆ ಉಂಟಾಗಿರುವ ನಷ್ಟ ಅಪಾರ. ಒಂದು ಕಾಲದಲ್ಲಿ ಶಾಂತಿಯಿಂದ ಕೂಡಿದ್ದ ಗಾಜಾ, ಈಗ ಯುದ್ಧದ ಕಾಟಕ್ಕೆ ಸಿಲುಕಿ, ಜನರ ಜೀವನವನ್ನು ದುರಂತಮಯವಾಗಿಸಿದೆ. ಒಂದು ಸಣ್ಣ ಬಿಸ್ಕೆಟ್ ಪ್ಯಾಕ್‌ಗೆ 2500 ರೂಪಾಯಿ ಖರ್ಚು ಮಾಡಬೇಕಾದ ಸ್ಥಿತಿಯೇ ಗಾಜಾದ ದುಃಸ್ಥಿತಿಯನ್ನು ತೋರಿಸುತ್ತದೆ.