ಬೀಜಿಂಗ್: ಜನನ ಪ್ರಮಾಣದಲ್ಲಿ ತೀವ್ರ ಕುಸಿತವನ್ನು ಎದುರಿಸುತ್ತಿರುವ ಚೀನಾ ಇದೀಗ ಹೊಸ ನಿರ್ಧಾರ ಕೈಗೊಂಡಿದೆ. ಸುಮಾರು ಮೂರು ದಶಕಗಳ ಕಾಲ ನೀಡಲಾಗಿದ್ದ ತೆರಿಗೆ ವಿನಾಯಿತಿಗೆ ಅಂತ್ಯ ಹಾಡಿ, ಗರ್ಭನಿರೋಧಕ ಔಷಧಗಳು ಹಾಗೂ ಕಾಂಡೋಮ್ಗಳ ಮೇಲೆ ಶೇ.13ರಷ್ಟು ತೆರಿಗೆ ವಿಧಿಸುವಂತೆ ಚೀನಾ ಸರ್ಕಾರ ಆದೇಶ ಹೊರಡಿಸಿದೆ. ಜನವರಿ 1ರಿಂದ ಈ ಪರಿಷ್ಕೃತ ತೆರಿಗೆ ಕಾನೂನು ಜಾರಿಯಾಗಲಿದೆ.
ಚೀನಾದಲ್ಲಿ 1993ರಲ್ಲಿ ಮೊದಲ ಬಾರಿಗೆ ಕಾಂಡೋಮ್ ಮತ್ತು ಗರ್ಭನಿರೋಧಕ ವಸ್ತುಗಳಿಗೆ ತೆರಿಗೆ ವಿನಾಯಿತಿ ನೀಡಲಾಗಿತ್ತು. ಆ ಸಮಯದಲ್ಲಿ ದೇಶದಲ್ಲಿ ಸಾವಿನ ಪ್ರಮಾಣ ಹೆಚ್ಚಾಗುತ್ತಿದ್ದು, ಜನನ ದರ ಸ್ಥಿರವಾಗಿರಲಿಲ್ಲ. ಹೀಗಾಗಿ ಜನಸಂಖ್ಯೆ ಹೆಚ್ಚಿಸಲು ಸರ್ಕಾರ ಈ ನಿರ್ಧಾರ ತೆಗೆದುಕೊಂಡಿತ್ತು. ಆದರೆ ಇದೀಗ ಪರಿಸ್ಥಿತಿ ಬದಲಾಗಿದ್ದು, ಜನನ ದರವನ್ನು ಮತ್ತೊಮ್ಮೆ ಉತ್ತೇಜಿಸಲು ಚೀನಾ ಹೊಸ ತಂತ್ರ ಅನುಸರಿಸುತ್ತಿದೆ.
2023ರಲ್ಲಿ ವಿಶ್ವದ ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ ದೇಶ ಎಂಬ ಸ್ಥಾನವನ್ನು ಚೀನಾ ಕಳೆದುಕೊಂಡು, ಭಾರತ ಆ ಸ್ಥಾನಕ್ಕೆ ಏರಿತ್ತು. ಇದರ ಪ್ರಮುಖ ಕಾರಣವೆಂದರೆ ಚೀನಾದಲ್ಲಿ ಜನನ ಪ್ರಮಾಣಕ್ಕಿಂತ ಮರಣ ದರ ಹೆಚ್ಚಾಗಿರುವುದು. ಕಳೆದ ಮೂರು ವರ್ಷಗಳಿಂದ ಚೀನಾದ ಜನಸಂಖ್ಯೆ ಸತತವಾಗಿ ಇಳಿಕೆಯಾಗುತ್ತಿದ್ದು, ಇದು ಸರ್ಕಾರಕ್ಕೆ ದೊಡ್ಡ ಸವಾಲಾಗಿ ಪರಿಣಮಿಸಿದೆ.
ಅಧಿಕೃತ ಅಂಕಿಅಂಶಗಳ ಪ್ರಕಾರ, 2024ರಲ್ಲಿ ಚೀನಾದಲ್ಲಿ ಕೇವಲ 9.54 ಮಿಲಿಯನ್ ಜನನ ಪ್ರಮಾಣ ದಾಖಲಾಗಿವೆ. ಆದರೆ ಒಂದು ದಶಕದ ಹಿಂದೆ, ಅಂದರೆ 2014–15ರ ವೇಳೆಗೆ ಜನನ ಪ್ರಮಾಣ 18.8 ಮಿಲಿಯನ್ಗಳಷ್ಟಿತ್ತು. ಈ ಕುಸಿತವೇ ಚೀನಾವನ್ನು ಕಠಿಣ ನಿರ್ಧಾರಗಳತ್ತ ಒತ್ತಾಯಿಸಿದೆ.
ಚೀನಾ ಬಹುಕಾಲ ‘ಒಂದು ಮಗು ನೀತಿ’ಯನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸಿತ್ತು. 2015ರಲ್ಲಿ ಈ ನೀತಿಯನ್ನು ಸಡಿಲಿಸಿ ಎರಡು ಮಕ್ಕಳಿಗೆ ಅವಕಾಶ ನೀಡಲಾಯಿತು. ಬಳಿಕ 2021ರಲ್ಲಿ ಮೂರು ಮಕ್ಕಳ ನೀತಿಯನ್ನು ಜಾರಿಗೊಳಿಸಲಾಯಿತು. ಆದರೂ ಜನನ ದರದಲ್ಲಿ ನಿರೀಕ್ಷಿತ ಏರಿಕೆ ಕಂಡುಬಂದಿಲ್ಲ. ಯುವ ಜನತೆ ಮದುವೆ ಮತ್ತು ಮಕ್ಕಳ ವಿಚಾರದಲ್ಲಿ ಹಿಂದೇಟು ಹಾಕುತ್ತಿರುವುದು ಸರ್ಕಾರದ ಆತಂಕವನ್ನು ಹೆಚ್ಚಿಸಿದೆ.
ಈ ಹಿನ್ನಲೆಯಲ್ಲಿ, ಗರ್ಭನಿರೋಧಕ ವಸ್ತುಗಳ ಮೇಲೆ ತೆರಿಗೆ ವಿಧಿಸುವ ಮೂಲಕ ಜನರು ಹೆಚ್ಚಿನ ಮಕ್ಕಳನ್ನು ಹೊಂದುವಂತೆ ಪ್ರೋತ್ಸಾಹಿಸುವ ಉದ್ದೇಶವನ್ನು ಚೀನಾ ಹೊಂದಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ. ಆದರೆ ಈ ನಿರ್ಧಾರ ಹಲವು ವಿವಾದಗಳಿಗೆ ಕಾರಣವಾಗಿದೆ.
ಸಾರ್ವಜನಿಕ ಆರೋಗ್ಯ ತಜ್ಞರು ಈ ಕ್ರಮದ ಬಗ್ಗೆ ಗಂಭೀರ ಎಚ್ಚರಿಕೆ ನೀಡಿದ್ದಾರೆ. ಕಾಂಡೋಮ್ ಹಾಗೂ ಗರ್ಭನಿರೋಧಕಗಳ ಬೆಲೆ ಏರಿಕೆಯಿಂದ ಅನೇಕರು ಅವುಗಳನ್ನು ಬಳಸುವುದನ್ನು ಕಡಿಮೆ ಮಾಡಬಹುದು. ಇದರಿಂದ ಗರ್ಭಧಾರಣೆ, ಹೆಚ್ಚಿದ ಗರ್ಭಪಾತಗಳು ಮತ್ತು ಲೈಂಗಿಕ ಆರೋಗ್ಯ ಸಮಸ್ಯೆಗಳು ಹೆಚ್ಚುವ ಸಾಧ್ಯತೆ ಇದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.