ಚಂದಿರನ ಅಂಗಳದಿಂದ ಭೂಮಿಯ ಅಪರೂಪದ ನೋಟ! ಅರ್ಟೆಮಿಸ್ II ಗಗನಯಾತ್ರಿಗಳು ಸೆರೆಹಿಡಿದ ‘ಅರ್ಥ್‌ಸೆಟ್’ ಫೋಟೋ ಸೆರೆ

ಬಾಹ್ಯಾಕಾಶ ಸಂಶೋಧನೆಯ ಇತಿಹಾಸದಲ್ಲಿ ಮತ್ತೊಂದು ಮೈಲಿಗಲ್ಲು ಸ್ಥಾಪಿತವಾಗಿದೆ. ಅರ್ಟೆಮಿಸ್ II (Artemis II) ಮಿಷನ್‌ನ ಭಾಗವಾಗಿ ಚಂದ್ರನ ಸುತ್ತ ಹಾರಾಟ ನಡೆಸುತ್ತಿರುವ ಗಗನಯಾತ್ರಿಗಳು, ಭೂಮಿಯ ಅತ್ಯಂತ ಸುಂದರ ಮತ್ತು ಐತಿಹಾಸಿಕ ಚಿತ್ರವನ್ನು ಸೆರೆಹಿಡಿದಿದ್ದಾರೆ.

ಏಪ್ರಿಲ್ 6, 2026ರಂದು ಓರಿಯನ್ ನೌಕೆಯಿಂದ ತೆಗೆದ ಈ ಚಿತ್ರಕ್ಕೆ ನಾಸಾ ‘ಅರ್ಥ್‌ಸೆಟ್’ (Earthset) ಎಂದು ಹೆಸರಿಸಿದೆ. ಇದರಲ್ಲಿ ನೀಲಿ ಬಣ್ಣದ ಭೂಮಿ ಮತ್ತು ಬಿಳಿ ಮೋಡಗಳು ಚಂದ್ರನ ಒರಟಾದ ಮೇಲ್ಮೈ ಮತ್ತು ಕುಳಿಗಳ ಹಿನ್ನೆಲೆಯಲ್ಲಿ ಮರೆಯಾಗುತ್ತಿರುವುದು ಕಾಣುತ್ತದೆ. ವಿಶೇಷವಾಗಿ ಆಸ್ಟ್ರೇಲಿಯಾ ಮತ್ತು ಓಷಿಯಾನಿಯಾ ಖಂಡಗಳ ಮೇಲಿನ ಮೋಡಗಳ ರಾಶಿ ಸ್ಪಷ್ಟವಾಗಿ ಗೋಚರಿಸುತ್ತಿದೆ.

ಅಪೊಲೊ 8ರ ‘ಅರ್ಥ್‌ರೈಸ್’ ನೆನಪು ಈ ಚಿತ್ರವು 58 ವರ್ಷಗಳ ಹಿಂದೆ ಅಪೊಲೊ 8 ಮಿಷನ್‌ನಲ್ಲಿ ಬಿಲ್ ಆಂಡರ್ಸ್ ತೆಗೆದ ಪ್ರಸಿದ್ಧ ‘ಅರ್ಥ್‌ರೈಸ್’ (Earthrise) ಚಿತ್ರವನ್ನು ನೆನಪಿಸುತ್ತದೆ ಎಂದು ನಾಸಾ ಬಣ್ಣಿಸಿದೆ. ಆದರೆ ಇದು ‘ಅರ್ಥ್‌ಸೆಟ್’ ಚಂದ್ರನ ಹಿಂಭಾಗದಿಂದ ಭೂಮಿ ಮರೆಯಾಗುತ್ತಿರುವ ದೃಶ್ಯವಾಗಿದೆ.

ಚಿತ್ರದಲ್ಲಿ ಕಂಡ ‘ಓಮ್ ಕ್ರೇಟರ್’ ಚಿತ್ರದ ಮುಂಭಾಗದಲ್ಲಿ ಚಂದ್ರನ ಮೇಲಿರುವ ಓಮ್ ಕ್ರೇಟರ್ ಎಂಬ ಬೃಹತ್ ಕುಳಿ ಸ್ಪಷ್ಟವಾಗಿ ಕಾಣುತ್ತಿದೆ. ಈ ಕುಳಿಯ ಮಧ್ಯಭಾಗದಲ್ಲಿ ಸಣ್ಣ ಪರ್ವತದಂತಹ ಶಿಖರಗಳಿವೆ. ನಾಸಾ ಪ್ರಕಾರ, ಬಾಹ್ಯಾಕಾಶ ಕಾಯವು ಚಂದ್ರನಿಗೆ ಡಿಕ್ಕಿ ಹೊಡೆದಾಗ ಉಂಟಾದ ದ್ರವದಂತಹ ಮೇಲ್ಮೈ ಚಿಮ್ಮಿ ಇಂತಹ ಶಿಖರಗಳು ಸೃಷ್ಟಿಯಾಗುತ್ತವೆ.

ಅರ್ಟೆಮಿಸ್ II ಮಿಷನ್‌ನ ಉದ್ದೇಶ ಇದು ಕಳೆದ 50 ವರ್ಷಗಳಲ್ಲಿ ಚಂದ್ರನ ಹತ್ತಿರಕ್ಕೆ ಹೋದ ಮೊದಲ ಮಾನವಸಹಿತ ಪರೀಕ್ಷಾರ್ಥ ಮಿಷನ್ ಆಗಿದೆ. 2028ರಲ್ಲಿ ಚಂದ್ರನ ಮೇಲೆ ಮಾನವರನ್ನು ಇಳಿಸುವ ಮತ್ತು ಮಂಗಳ ಗ್ರಹಕ್ಕೆ ಪ್ರಯಾಣ ಬೆಳೆಸುವ ನಾಸಾದ ಬೃಹತ್ ಯೋಜನೆಯ ಮೊದಲ ಹಂತ ಇದಾಗಿದೆ. ಎಸ್‌ಎಲ್‌ಎಸ್ ರಾಕೆಟ್ ಮತ್ತು ಓರಿಯನ್ ಕ್ಯಾಪ್ಸುಲ್‌ನ ಸಾಮರ್ಥ್ಯವನ್ನು ಇದು ಪರೀಕ್ಷಿಸುತ್ತಿದೆ.

ಮಿಷನ್ ಕಮಾಂಡರ್ ರೀಡ್ ವೈಸ್‌ಮನ್ ನೇತೃತ್ವದ ತಂಡದಲ್ಲಿ ನಾಸಾದ ವಿಕ್ಟರ್ ಗ್ಲೋವರ್, ಕ್ರಿಸ್ಟಿನಾ ಕೋಚ್ ಮತ್ತು ಕೆನಡಾ ಬಾಹ್ಯಾಕಾಶ ಸಂಸ್ಥೆಯ ಜೆರೆಮಿ ಹ್ಯಾನ್ಸೆನ್ ಇದ್ದಾರೆ. ಈ ನಾಲ್ವರು ಗಗನಯಾತ್ರಿಗಳು ಚಂದ್ರನ ಹತ್ತಿರದಲ್ಲಿ ಸುಮಾರು ಏಳು ಗಂಟೆಗಳ ಕಾಲ ಶ್ರಮಿಸಿ ಈ ಅದ್ಭುತ ಚಿತ್ರಗಳನ್ನು ಸೆರೆಹಿಡಿದಿದ್ದಾರೆ.

ವೈಟ್ ಹೌಸ್ ಕೂಡ ಈ ಚಿತ್ರವನ್ನು ಶ್ಲಾಘಿಸಿದ್ದು, “ಮತ್ತೊಂದು ಕಡೆಯಿಂದ ಕಂಡ ಮಾನವಕುಲ” ಎಂದು ಬಣ್ಣಿಸಿದೆ. ಇದರೊಂದಿಗೆ ಬಾಹ್ಯಾಕಾಶದಿಂದ ಕಂಡ ಸೂರ್ಯಗ್ರಹಣದ ಚಿತ್ರವನ್ನೂ ನಾಸಾ ಹಂಚಿಕೊಂಡಿದೆ.

ಈ ಐತಿಹಾಸಿಕ ಚಿತ್ರಗಳು ಬಾಹ್ಯಾಕಾಶ ವಿಜ್ಞಾನದಲ್ಲಿ ಮಾನವನ ಸಾಧನೆಯ ಹೊಸ ಅಧ್ಯಾಯಕ್ಕೆ ಸಾಕ್ಷಿಯಾಗಿವೆ. ಅರ್ಟೆಮಿಸ್ ಕಾರ್ಯಕ್ರಮವು ಮುಂದಿನ ದಶಕಗಳಲ್ಲಿ ಚಂದ್ರ ಮತ್ತು ಮಂಗಳ ಗ್ರಹದ ಸಂಶೋಧನೆಗೆ ಮಾರ್ಗದರ್ಶನ ನೀಡುತ್ತದೆ.