ನವದೆಹಲಿ: ಸಿಬಿಎಸ್ಇ (ಕೇಂದ್ರೀಯ ಪ್ರೌಢ ಶಿಕ್ಷಣ ಮಂಡಳಿ) 2026ನೇ ಸಾಲಿನ 10ನೇ ತರಗತಿಯ ಫಲಿತಾಂಶವನ್ನು ಇಂದು ಅಧಿಕೃತವಾಗಿ ಪ್ರಕಟಿಸಿದ್ದು, ಲಕ್ಷಾಂತರ ವಿದ್ಯಾರ್ಥಿಗಳ ನಿರೀಕ್ಷೆಗೆ ತೆರೆ ಬಿದ್ದಿದೆ. ದೇಶದಾದ್ಯಂತ ಸುಮಾರು 25 ಲಕ್ಷಕ್ಕೂ ಅಧಿಕ ವಿದ್ಯಾರ್ಥಿಗಳು ಈ ಪರೀಕ್ಷೆಗೆ ಹಾಜರಾಗಿದ್ದು, ಈ ಬಾರಿ ಒಟ್ಟು ಶೇ. 93.70 ರಷ್ಟು ವಿದ್ಯಾರ್ಥಿಗಳು ಉತ್ತೀರ್ಣರಾಗುವ ಮೂಲಕ ಉತ್ತಮ ಸಾಧನೆ ಮಾಡಿದ್ದಾರೆ.
ಪ್ರತಿವರ್ಷದಂತೆ ಈ ಬಾರಿಯೂ ಹುಡುಗಿಯರು ಮೇಲುಗೈ ಸಾಧಿಸಿದ್ದಾರೆ. ಒಟ್ಟು 94.99% ಹುಡುಗಿಯರು ಉತ್ತೀರ್ಣರಾಗಿದ್ದು, ಹುಡುಗರಿಗಿಂತ ಮುಂಚೂಣಿಯಲ್ಲಿದ್ದಾರೆ. ಇನ್ನೊಂದೆಡೆ, ಹುಡುಗರ ಪಾಸ್ ಪ್ರಮಾಣ 92.6% ಆಗಿದೆ. ಈ ಬಾರಿ ಫಲಿತಾಂಶದಲ್ಲಿ ಯಾವುದೇ ಟಾಪರ್ಗಳ ಪಟ್ಟಿಯನ್ನು ಪ್ರಕಟಿಸದೇ, ಎಲ್ಲಾ ವಿದ್ಯಾರ್ಥಿಗಳ ಸಮಾನ ಸಾಧನೆಯನ್ನು ಉತ್ತೇಜಿಸುವ ದೃಷ್ಠಿಯಿಂದ ಸಿಬಿಎಸ್ಇ ಕ್ರಮ ಕೈಗೊಂಡಿದೆ.
ವಿದ್ಯಾರ್ಥಿಗಳು ತಮ್ಮ ಫಲಿತಾಂಶವನ್ನು ಅಧಿಕೃತ ವೆಬ್ಸೈಟ್ಗಳಾದ cbse.gov.in ಮತ್ತು results.cbse.nic.in ಮೂಲಕ ಪರಿಶೀಲಿಸಬಹುದು. ಇದಲ್ಲದೆ, ಡಿಜಿಟಲ್ ತಂತ್ರಜ್ಞಾನವನ್ನು ಬಳಸಿ DigiLocker ಹಾಗೂ UMANG ಆ್ಯಪ್ ಮೂಲಕವೂ ಅಂಕಪಟ್ಟಿ ಪಡೆಯಲು ಅವಕಾಶ ಕಲ್ಪಿಸಲಾಗಿದೆ. ಇವು ವಿದ್ಯಾರ್ಥಿಗಳಿಗೆ ವೇಗವಾಗಿ ಹಾಗೂ ಸುಲಭವಾಗಿ ಫಲಿತಾಂಶ ವೀಕ್ಷಿಸಲು ನೆರವಾಗುತ್ತವೆ.
DigiLocker ಮೂಲಕ ಅಂಕಪಟ್ಟಿ ಪಡೆಯುವ ವಿಧಾನ
DigiLocker ವಿದ್ಯಾರ್ಥಿಗಳಿಗೆ ಅತ್ಯಂತ ಸುಲಭ ಮತ್ತು ವೇಗವಾದ ಮಾರ್ಗವಾಗಿದೆ. ಮೊದಲಿಗೆ digilocker.gov.in ವೆಬ್ಸೈಟ್ಗೆ ಭೇಟಿ ನೀಡಬೇಕು ಅಥವಾ ಆ್ಯಪ್ ತೆರೆಯಬೇಕು. ನಂತರ ಆಧಾರ್ ಅಥವಾ ಮೊಬೈಲ್ ಸಂಖ್ಯೆಯ ಮೂಲಕ ಲಾಗಿನ್ ಆಗಿ ‘Education’ ವಿಭಾಗವನ್ನು ಆಯ್ಕೆಮಾಡಬೇಕು. ಅಲ್ಲಿ ‘CBSE Class X Marksheet 2026’ ಆಯ್ಕೆ ಮಾಡಿ, ರೋಲ್ ಸಂಖ್ಯೆ, ಶಾಲಾ ಕೋಡ್ ಹಾಗೂ ಸೆಕ್ಯೂರಿಟಿ ಪಿನ್ ನಮೂದಿಸಿದರೆ, ತಕ್ಷಣವೇ ಡಿಜಿಟಲ್ ಅಂಕಪಟ್ಟಿ ಲಭ್ಯವಾಗುತ್ತದೆ.
UMANG ಆ್ಯಪ್ ಮತ್ತು SMS ಸೇವೆ
ಇಂಟರ್ನೆಟ್ ಸೌಲಭ್ಯ ಇಲ್ಲದಿದ್ದರೂ ವಿದ್ಯಾರ್ಥಿಗಳು ತಮ್ಮ ಫಲಿತಾಂಶವನ್ನು SMS ಮೂಲಕ ಪಡೆಯಬಹುದು. ಮೊಬೈಲ್ನ ಮೆಸೇಜ್ ಬಾಕ್ಸ್ನಲ್ಲಿ “CBSE10 <ರೋಲ್ ಸಂಖ್ಯೆ> <ಜನ್ಮ ದಿನಾಂಕ> <ಶಾಲಾ ಸಂಖ್ಯೆ> <ಕೇಂದ್ರ ಸಂಖ್ಯೆ>” ಎಂದು ಟೈಪ್ ಮಾಡಿ 7738299899 ಸಂಖ್ಯೆಗೆ ಕಳುಹಿಸಿದರೆ, ಕೆಲವೇ ಕ್ಷಣಗಳಲ್ಲಿ ಅಂಕಗಳು ಸಂದೇಶ ರೂಪದಲ್ಲಿ ಲಭ್ಯವಾಗುತ್ತವೆ. UMANG ಆ್ಯಪ್ ಮೂಲಕವೂ ಇದೇ ರೀತಿಯಲ್ಲಿ ಫಲಿತಾಂಶ ವೀಕ್ಷಿಸಬಹುದು.