ಬಿಎಸ್ಸಿ ಕಂಪ್ಯೂಟರ್ ಸೈನ್ಸ್ ಪದವಿ ಪಡೆದಿದ್ದರೂ ಶೋಕಿ ಜೀವನಕ್ಕಾಗಿ ಸರಣಿ ಮನೆಗಳ್ಳತನ ಮಾಡುತ್ತಿದ್ದ ಅಂತಾರಾಜ್ಯ ಕಳ್ಳನನ್ನು ಮೈಸೂರು ಪೊಲೀಸರು ಸಿನಿಮಾ ಸ್ಟೈಲ್ನಲ್ಲಿ ಬಂಧಿಸಿದ್ದಾರೆ. ಆಂಧ್ರಪ್ರದೇಶದ ಡಾ. ಬಿ.ಆರ್. ಅಂಬೇಡ್ಕರ್ ಕೋಣಸೀಮ ನಿವಾಸಿ ದ್ವಾರಕಪುರಿ ವೆಂಕಟೇಶ್ವರ ರೆಡ್ಡಿ (34) ಬಂಧಿತ ಆರೋಪಿಯಾಗಿದ್ದಾನೆ. ಈತ ಮೈಸೂರಿನಲ್ಲಿ ಮಾತ್ರವಲ್ಲದೆ ಆಂಧ್ರ, ಪುದುಚೇರಿ, ಕೇರಳ, ಹೈದ್ರಾಬಾದ್, ಹುಬ್ಬಳ್ಳಿ-ಧಾರವಾಡ ಸೇರಿದಂತೆ ಹಲವು ಕಡೆ ಕಳ್ಳತನ ಮಾಡಿದ್ದಾನೆ. ಒಮ್ಮೆ ಪುದುಚೇರಿ ಜೈಲಿನಲ್ಲೂ ಇದ್ದ ಈತ ಜಾಮೀನಿನ ಮೇಲೆ ಬಿಡುಗಡೆಯಾದ ನಂತರ ಮತ್ತೆ ಹಳೇ ಚಾಳಿ ಮುಂದುವರಿಸಿದ್ದ.
ಸರಣಿ ಕಳ್ಳತನದ ಶೈಲಿ ಇತ್ತೀಚೆಗೆ ಮೈಸೂರಿನಲ್ಲಿ ಸರಣಿ ಮನೆಗಳ್ಳತನ ನಡೆದಿತ್ತು. 2025ರ ಡಿಸೆಂಬರ್ 31ರಂದು ರಾಮಕೃಷ್ಣನಗರದ ವಾಸು ಬಡಾವಣೆಯಲ್ಲಿ ಪ್ರೊ. ನಾಗಭೂಷಣ್ ಅವರ ಮನೆಯ ಬೀಗ ಮುರಿದು 150 ಗ್ರಾಂ ಬೆಳ್ಳಿ ವಸ್ತುಗಳು ಮತ್ತು 3 ಸಿಸಿಟಿವಿ ಕ್ಯಾಮರಾಗಳನ್ನು ಕದ್ದಿದ್ದ. ಅದೇ ದಿನ ರಾತ್ರಿ ಕುವೆಂಪುನಗರದಲ್ಲಿ ಬ್ಯಾಂಕ್ ನಿವೃತ್ತ ಅನಂತ ಪದ್ಮನಾಭ ಅವರ ಮನೆಯಿಂದ 40 ಗ್ರಾಂ ಬೆಳ್ಳಿ ನಾಣ್ಯಗಳು ಮತ್ತು 60 ಸಾವಿರ ನಗದು ಕಳುವಾಗಿತ್ತು. 2026ರ ಜನವರಿ 2ರಂದು ಶ್ರೀರಾಂಪುರದಲ್ಲಿ ಮೇಘನಾ ಅವರ ಮನೆಯಿಂದ 120 ಗ್ರಾಂ ಬೆಳ್ಳಿ ಆಭರಣಗಳು ಕಳುವಾಗಿದ್ದವು.
ಪೊಲೀಸರು ಸ್ಥಳಗಳ ಸಿಸಿಟಿವಿ ದೃಶ್ಯಾವಳಿ ಪರಿಶೀಲಿಸಿ ಒಬ್ಬನೇ ವ್ಯಕ್ತಿ ಕೃತ್ಯ ಎಸಗಿದ್ದಾನೆ ಎಂದು ಖಚಿತಪಡಿಸಿಕೊಂಡರು. ತನಿಖೆಯಲ್ಲಿ ಆರೋಪಿ ದ್ವಾರಕಪುರಿ ವೆಂಕಟೇಶ್ವರ ರೆಡ್ಡಿ ಎಂದು ಗುರುತಿಸಲಾಯಿತು.
ಚಾಮುಂಡಿ ಬೆಟ್ಟದಲ್ಲಿ ಪೂಜೆ ನಂತರ ಕಳ್ಳತನ ರೆಡ್ಡಿ ಕಳ್ಳತನಕ್ಕೆ ಬರುವ ಮೊದಲು ಚಾಮುಂಡೇಶ್ವರಿ ದೇಗುಲಕ್ಕೆ ಭೇಟಿ ನೀಡಿ ಪೂಜೆ ಸಲ್ಲಿಸಿ, ಕೃತ್ಯ ಯಶಸ್ವಿಯಾಗಲಿ ಎಂದು ಪ್ರಾರ್ಥಿಸುತ್ತಿದ್ದನು. ನಂತರ ಮೈಸೂರು ಸುತ್ತ ರೌಂಡ್ ಹಾಕಿ ಯಾವ ಮನೆಯಲ್ಲಿ ಬೀಗ ಹಾಕಿದೆ, ಸಿಸಿಟಿವಿ ಇಲ್ಲ, ತಪ್ಪಿಸಿಕೊಳ್ಳಲು ಯಾವ ಮಾರ್ಗ ಸೂಕ್ತ ಎಂದು ಕೂಲಂಕುಶ ಪರಿಶೀಲನೆ ನಡೆಸುತ್ತಿದ್ದ. ಮಧ್ಯರಾತ್ರಿ 1ರಿಂದ ಮುಂಜಾನೆ 4 ಗಂಟೆಯವರೆಗೆ ಕಳ್ಳತನ ಮಾಡಿ ಯಶಸ್ವಿಯಾಗುತ್ತಿದ್ದ. ನಗದು, ಚಿನ್ನ, ಬೆಳ್ಳಿ ದೋಚುತ್ತಿದ್ದರೂ ದೇವರ ಕೋಣೆಯ ವಸ್ತುಗಳನ್ನು ಮಾತ್ರ ಮುಟ್ಟುತ್ತಿರಲಿಲ್ಲ.
ಸಿನಿಮಾ ಸ್ಟೈಲ್ ಬಂಧನ ಮೈಸೂರು ಪೊಲೀಸರು ವಿಶೇಷ ತಂಡ ರಚಿಸಿ ಆರೋಪಿಯನ್ನು ಹಾಸನದಲ್ಲಿ ಬಲೆಗೆ ಬೀಳಿಸಿದರು. 2026ರ ಜನವರಿ 6ರ ಮಧ್ಯರಾತ್ರಿ ಹಾಸನದಲ್ಲಿ ಮನೆಯೊಂದರಲ್ಲಿ ಕಳ್ಳತನಕ್ಕೆ ಹೊಂಚು ಹಾಕುತ್ತಿದ್ದಾಗ ದೂರದಿಂದ ಕಾರು ನಿಲ್ಲಿಸಿ ಕೈಗಾರಿಕೆಯಲ್ಲಿ ಬಂಧಿಸಲಾಯಿತು. ಬಂಧಿತನಿಂದ 310 ಗ್ರಾಂ ಬೆಳ್ಳಿ ವಸ್ತುಗಳು, 67 ಸಾವಿರ ನಗದು, 3 ಸಿಸಿಟಿವಿ ಕ್ಯಾಮರಾಗಳು ಮತ್ತು ಕೃತ್ಯಕ್ಕೆ ಬಳಸಿದ್ದ ಫೋರ್ಡ್ ಕಾರು ವಶಪಡಿಸಿಕೊಳ್ಳಲಾಗಿದೆ.
ಪೊಲೀಸರು ಆರೋಪಿಯನ್ನು ವಶಕ್ಕೆ ಪಡೆದು ತನಿಖೆ ಮುಂದುವರಿಸುತ್ತಿದ್ದಾರೆ. ವಿದ್ಯಾವಂತನಾಗಿದ್ದರೂ ಶೋಕಿಗಾಗಿ ಕಳ್ಳತನ ಮಾಡುತ್ತಿದ್ದ ಈತನ ಬಂಧನದಿಂದ ಮೈಸೂರು ನಗರದಲ್ಲಿ ಸರಣಿ ಕಳ್ಳತನದ ಭಯ ಕಡಿಮೆಯಾಗಿದೆ.