ಒಂದ್ಕಡೆ ಟಾಕ್ಸಿಕ್.. ಮತ್ತೊಂದ್ಕಡೆ ರಾಮಾಯಣ.. ಯಶ್ ಕರಿಯರ್ ಮತ್ತಷ್ಟು ಮಗದಷ್ಟು ಉತ್ತುಂಗಕ್ಕೇರುತ್ತಲೇ ಇದೆ. ಯೆಸ್.. ಟಾಕ್ಸಿಕ್ ಬೆನ್ನಲ್ಲೇ ರಾಮಾಯಣ ಚಿತ್ರದ ಮೊದಲ ಭಾಗ ಕೂಡ ರಿಲೀಸ್ ಆಗಲಿದ್ದು, ಅದಕ್ಕೂ ಮುನ್ನ ನೋಡುಗರ ಕಣ್ಮನ ಸೆಳೆಯೋ ಅಂತಹ ಟ್ರೈಲರ್ ಬರ್ತಿದೆ. ರಾಮಾಯಣ ಟ್ರೈಲರ್ಗೆ ಮುಹೂರ್ತ ಫಿಕ್ಸ್ ಆಗಿದ್ದು, ಸಪ್ತ ಸಾಗರದಾಚೆ ಎಲ್ಲೋ ರಿಲೀಸ್ ಮಾಡ್ತಿರೋದಾದ್ರೂ ಏಕೆ ಅನ್ನೋ ಕೌತುಕತೆ ಹುಟ್ಟಿದೆ.
- ಜುಲೈ 14ಕ್ಕೆ ರಾಮಾಯಣ ಟ್ರೈಲರ್.. ಲಾಸ್ ಏಂಜಲ್ಸ್ ವೇದಿಕೆ
- ನವೆಂಬರ್ 6ಕ್ಕೆ ರಾಮಾಯಣ ಮೊದಲ ಭಾಗ ದೀಪಾವಳಿ ಗಿಫ್ಟ್
- ಬ್ಯುಸಿನೆಸ್ಗೆ ಬಿಗ್ ಪ್ಲ್ಯಾನ್.. ಗ್ಲೋಬಲ್ ಆಡಿಯೆನ್ಸ್ ಟಾರ್ಗೆಟ್
- ಸಿನಿಮಾಕಾನ್ ವೇದಿಕೆ.. ಯಶ್-ನಮಿತ್ಗೆ ಭರವಸೆ ಡಬಲ್..!!
ರಾಮಾಯಣ.. ನಮ್ಮ ಭಾರತದ ಮಹಾ ದೃಶ್ಯಕಾವ್ಯಗಳಲ್ಲೊಂದು. ಈಗಾಗ್ಲೇ ಸಾಕಷ್ಟು ಸೀರೀಸ್, ಸಿನಿಮಾಗಳು ಬಂದಿದ್ರೂ ಸಹ ಸದ್ಯ ದಂಗಲ್ ಡೈರೆಕ್ಟರ್ ನಿತೇಶ್ ತಿವಾರಿ ಹಾಗೂ ನಮ್ಮ ರಾಕಿಂಗ್ ಸ್ಟಾರ್ ಯಶ್ ಕಾಂಬೋನಲ್ಲಿ ಬರ್ತಿರೋ ರಾಮಾಯಣ ಮಾತ್ರ ಸಾಕಷ್ಟು ಕುತೂಹಲ ಹುಟ್ಟಿಹಾಕಿದೆ. ಯೆಸ್.. ನಮಿತ್ ಮಲ್ಹೋತ್ರಾ ನಿರ್ಮಾಣದ ಈ ಚಿತ್ರದಲ್ಲಿ ಯಶ್ ರಾವಣನಾಗಿ ಬಣ್ಣ ಹಚ್ಚೋದಲ್ಲದೆ, ಸಹ ನಿರ್ಮಾಣ ಕೂಡ ಮಾಡ್ತಿದ್ದಾರೆ.
ರಣ್ಬೀರ್ ಕಪೂರ್ ರಾಮನಾಗಿ, ಸಾಯಿ ಪಲ್ಲವಿ ಸೀತೆಯಾಗಿ ನಟಿಸ್ತಿದ್ರೆ ಲಂಕೇಶ್ವರನಾಗಿ ನಮ್ಮ ಯಶ್ ಮಿಂಚು ಹರಿಸಲಿದ್ದಾರೆ. ಭಾರತೀಯ ಚಿತ್ರರಂಗದ ಅಗ್ರಗಣ್ಯ ಕಲಾವಿದರುಗಳೆಲ್ಲಾ ಒಟ್ಟಿಗೆ ಒಂದೇ ಚಿತ್ರದಲ್ಲಿ ಕಾಣಸಿಗಲಿದ್ದು, ಟೀಸರ್ ಝಲಕ್ನಿಂದ ಸಿನಿಮಾ ಮೇಲಿನ ನಿರೀಕ್ಷೆ ದುಪ್ಪಟ್ಟಾಗಿದೆ. ಅದ್ರಲ್ಲೂ ಸಿನಿಮಾಕಾನ್ ವೇದಿಕೆಯಲ್ಲಿ ಯಶ್ ಹಾಗೂ ನಮಿತ್ ಮಲ್ಹೋತ್ರಾ ಡೈರೆಕ್ಟರ್ ಸಮೇತ ಕಾಣಿಸಿಕೊಂಡಿದ್ರು. ಅದಾದ ಬಳಿಕ ಗ್ಲೋಬಲ್ ಆಡಿಯೆನ್ಸ್ಗೆ ಸಿನಿಮಾನ ತಲುಪಿಸೋ ಅವರಲ್ಲಿನ ತವಕ ಮತ್ತಷ್ಟು ಹೆಚ್ಚಿದೆ.
ಅದೇ ಕಾರಣದಿಂದ ಇದೇ ನವೆಂಬರ್ 6ಕ್ಕೆ ತೆರೆಗೆ ಬರ್ತಿರೋ ರಾಮಾಯಣ ಚಿತ್ರದ ಮೊದಲ ಭಾಗದ ಟ್ರೈಲರ್ ಅಮೆರಿಕಾದ ಲಾಸ್ ಏಂಜಲ್ಸ್ನಲ್ಲಿ ರಿಲೀಸ್ ಮಾಡಲು ಸಜ್ಜಾಗಿದೆ ಚಿತ್ರತಂಡ. ಇದೇ ಜುಲೈ 14ರಂದು ರಾಮಾಯಣ ಚಿತ್ರದ ಟ್ರೈಲರ್ ಅಮೆರಿಕಾದಲ್ಲಿ ಬಿಡುಗಡೆ ಆಗಲಿದ್ದು, ವಿಶ್ವದ ಮೂಲೆ ಮೂಲೆಗೆ ಸಿನಿಮಾನ ತಲುಪಿಸುವುದು ಇದರ ಉದ್ದೇಶವಾಗಿದೆ. ಅಂದಹಾಗೆ 3500 ರಿಂದ 4 ಸಾವಿರ ಕೋಟಿ ಬಜೆಟ್ನಲ್ಲಿ ತಯಾರಾಗ್ತಿರೋ ಈ ಚಿತ್ರದ ಎರಡನೇ ಭಾಗ 2027ರ ದೀಪಾವಳಿಗೆ ರಿಲೀಸ್ ಆಗಲಿದೆ.
ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಗ್ಯಾರಂಟಿ ನ್ಯೂಸ್