ಬಾಲಿವುಡ್ನ ಖ್ಯಾತ ನಟ ಸುಶಾಂತ್ ಸಿಂಗ್ ರಜಪೂತ್ ಅವರ ಆತ್ಮಹತ್ಯೆ ಪ್ರಕರಣವು ಕಳೆದ ಐದು ವರ್ಷಗಳಿಂದ ಭಾರತದಾದ್ಯಂತ ತೀವ್ರ ಚರ್ಚೆಗೆ ಕಾರಣವಾಗಿದೆ. ‘ಪಿ.ಕೆ.’, ‘ಚಿಚೋರೆ’, ‘ಎಂ.ಎಸ್. ಧೋನಿ: ದಿ ಅನ್ಟೋಲ್ಡ್ ಸ್ಟೋರಿ’ ಮತ್ತು ‘ಪವಿತ್ರ ರಿಶ್ತಾ’, ‘ಝಲಕ್ ದಿಖ್ಲಾಜಾ’ ಟಿವಿ ಶೋಗಳ ಮೂಲಕ ಕೋಟ್ಯಂತರ ಅಭಿಮಾನಿಗಳನ್ನು ಗಳಿಸಿದ್ದ ಸುಶಾಂತ್, ಜೂನ್ 14,2020 ರಂದು ಮುಂಬೈನ ಬಾಂದ್ರಾದಲ್ಲಿರುವ ತಮ್ಮ ಫ್ಲ್ಯಾಟ್ನ ಬೆಡ್ರೂಮ್ನಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದರು. ಈ ಘಟನೆಯು ಆತ್ಮಹತ್ಯೆಯೋ, ಕೊಲೆಯೋ ಎಂಬ ವಿವಾದಕ್ಕೆ ಕಾರಣವಾಗಿತ್ತು. ಈಗ ಕೇಂದ್ರೀಯ ತನಿಖಾ ದಳ (ಸಿಬಿಐ) ಈ ಪ್ರಕರಣದಲ್ಲಿ ನಟಿ ರಿಯಾ ಚಕ್ರವರ್ತಿಗೆ ಕ್ಲೀನ್ ಚಿಟ್ ನೀಡಿದ್ದು, ಈ ಕೇಸ್ನ ತನಿಖೆಯಲ್ಲಿ ಹೊಸ ತಿರುವು ಸೃಷ್ಟಿಯಾಗಿದೆ.
ಸುಶಾಂತ್ರ ಸಾವಿನ ಬಗ್ಗೆ ಮುಂಬೈ ಪೊಲೀಸರು ಆರಂಭಿಕ ತನಿಖೆ ನಡೆಸಿದ್ದರು. ಆದರೆ, ಯಾವುದೇ ಕೊಲೆಯ ಸುಳಿವು ಕಂಡುಬಂದಿರಲಿಲ್ಲ. ಸುಶಾಂತ್ರ ತಂದೆ ಕೆ.ಕೆ. ಸಿಂಗ್ ಅವರು ರಿಯಾ ಚಕ್ರವರ್ತಿ ಮತ್ತು ಆಕೆಯ ಕುಟುಂಬದ ವಿರುದ್ಧ ಆತ್ಮಹತ್ಯೆಗೆ ಪ್ರಚೋದನೆ, ಹಣಕಾಸಿನ ಅವ್ಯವಹಾರ ಮತ್ತು ಕೊಲೆ ಬೆದರಿಕೆಯ ಆರೋಪಗಳೊಂದಿಗೆ ಪಾಟ್ನಾದಲ್ಲಿ ಎಫ್ಐಆರ್ ದಾಖಲಿಸಿದ್ದರು. ಇದಕ್ಕೆ ಪ್ರತಿಯಾಗಿ, ರಿಯಾ ಚಕ್ರವರ್ತಿ, ಸುಶಾಂತ್ರ ಸಹೋದರಿಯರ ವಿರುದ್ಧ ಮುಂಬೈನಲ್ಲಿ ದೂರು ದಾಖಲಿಸಿದ್ದರು. ಸಿಬಿಐ ಈ ಎರಡೂ ಪ್ರಕರಣಗಳನ್ನು ತನಿಖೆ ಮಾಡಿ, ರಿಯಾ ಮತ್ತು ಆಕೆಯ ಕುಟುಂಬಕ್ಕೆ ಕ್ಲೀನ್ ಚಿಟ್ ನೀಡಿದೆ.
ರಿಯಾ ಚಕ್ರವರ್ತಿ ಮತ್ತು ಸುಶಾಂತ್ ಏಪ್ರಿಲ್ 2019 ರಿಂದ ಜೂನ್ 2020 ರವರೆಗೆ ಲಿವ್-ಇನ್ ರಿಲೇಶನ್ಶಿಪ್ನಲ್ಲಿದ್ದರು. ಈ ಅವಧಿಯಲ್ಲಿ ಸುಶಾಂತ್ ರಿಯಾಗಾಗಿ ಸಾಕಷ್ಟು ಹಣ ಖರ್ಚು ಮಾಡಿದ್ದರು ಮತ್ತು ಆಕೆಯನ್ನು ತಮ್ಮ ಕುಟುಂಬದ ಭಾಗವೆಂದು ಆಪ್ತರಿಗೆ ಪರಿಚಯಿಸಿದ್ದರು. ಆದರೆ, ಇಬ್ಬರ ನಡುವೆ ವೈಮನಸ್ಸು ಉಂಟಾಗಿತ್ತು. ಸುಶಾಂತ್ರ ತಂದೆ ರಿಯಾ ಮೇಲೆ ಹಣಕಾಸಿನ ಮೋಸ, ಆತ್ಮಹತ್ಯೆಗೆ ಪ್ರಚೋದನೆ ಮತ್ತು ಕೊಲೆ ಬೆದರಿಕೆಯ ಆರೋಪ ಹೊರಿಸಿದ್ದರು. ಆದರೆ, ಸಿಬಿಐ ತನಿಖೆಯಲ್ಲಿ ಈ ಆರೋಪಗಳಿಗೆ ಯಾವುದೇ ಸಾಕ್ಷ್ಯ ಸಿಗಲಿಲ್ಲ.
ಸಿಬಿಐ ವರದಿಯ ಪ್ರಕಾರ, ರಿಯಾ ಮತ್ತು ಆಕೆಯ ಸಹೋದರ ಶೋವಿಕ್ ಚಕ್ರವರ್ತಿ ಜೂನ್ 8,2020 ರಂದು ಸುಶಾಂತ್ರ ಬಾಂದ್ರಾ ಫ್ಲ್ಯಾಟ್ ತೊರೆದಿದ್ದರು, ಅಂದರೆ ಸುಶಾಂತ್ರ ಸಾವಿಗೆ ಆರು ದಿನಗಳ ಮೊದಲೇ. ರಿಯಾ ತೆಗೆದುಕೊಂಡಿದ್ದು ಕೇವಲ ಒಂದು ಲ್ಯಾಪ್ಟಾಪ್ ಮತ್ತು ಸುಶಾಂತ್ ಉಡುಗೊರೆಯಾಗಿ ನೀಡಿದ್ದ ಆಪಲ್ ವಾಚ್ ಮಾತ್ರ. ಇದನ್ನು ಕಳ್ಳತನ ಎಂದು ಪರಿಗಣಿಸಲಾಗದು ಎಂದು ಸಿಬಿಐ ತಿಳಿಸಿದೆ. ಸುಶಾಂತ್ ತಮ್ಮ ಇಚ್ಛೆಯಂತೆ ರಿಯಾಗಾಗಿ ಹಣ ಖರ್ಚು ಮಾಡಿದ್ದರು, ಮತ್ತು ಇದಕ್ಕೆ ಯಾವುದೇ ಅಕ್ರಮದ ಸಾಕ್ಷ್ಯ ಇಲ್ಲ. ಆತ್ಮಹತ್ಯೆಗೆ ಪ್ರಚೋದನೆಯ ಆರೋಪಕ್ಕೂ ಯಾವುದೇ ಆಧಾರ ಸಿಗಲಿಲ್ಲ. ಕೊಲೆ ಬೆದರಿಕೆಯ ಆರೋಪಕ್ಕೂ ಯಾವುದೇ ಪುರಾವೆ ದೊರಕಿಲ್ಲ.
ಸುಶಾಂತ್ರ ಸಹೋದರಿ ಮೀತು ಸಿಂಗ್ ಜೂನ್ 8 ರಿಂದ ಜೂನ್19,2020 ರವರೆಗೆ ಸುಶಾಂತ್ರೊಂದಿಗೆ ಇದ್ದರು, ಆದರೆ ನಂತರ ಅವರು ಫ್ಲ್ಯಾಟ್ನಲ್ಲಿ ಇರಲಿಲ್ಲ. ಸುಶಾಂತ್ರ ಮ್ಯಾನೇಜರ್ ಶ್ರುತಿ ಮೋದಿ ಕಾಲಿಗೆ ಗಾಯದಿಂದಾಗಿ ಫೆಬ್ರವರಿ 2020 ರಿಂದ ಸುಶಾಂತ್ರ ಮನೆಗೆ ಬಂದಿರಲಿಲ್ಲ ಎಂದು ವರದಿಯಲ್ಲಿ ತಿಳಿಸಲಾಗಿದೆ. ಸಿಬಿಐ ಈ ಎಲ್ಲಾ ಅಂಶಗಳನ್ನು ತನಿಖೆ ಮಾಡಿ, ರಿಯಾ ಚಕ್ರವರ್ತಿ ವಿರುದ್ಧದ ಆರೋಪಗಳನ್ನು ತಳ್ಳಿಹಾಕಿದೆ.ಈ ಪ್ರಕರಣದ ಕ್ಲೋಸರ್ ರಿಪೋರ್ಟ್ನ ಮುಂದಿನ ವಿಚಾರಣೆ ಡಿಸೆಂಬರ್ 20,2025 ರಂದು ಪಾಟ್ನಾದ ನ್ಯಾಯಾಲಯದಲ್ಲಿ ನಡೆಯಲಿದೆ.