ಸ್ಮೈಲ್ ಶ್ರೀನು ನಿರ್ದೇಶನದ ಚಿತ್ರಕ್ಕೆ ಕೆ ಮಂಜು ಬಂಡವಾಳ: ಶೀಘ್ರದಲ್ಲೇ ಟೈಟಲ್ ಲಾಂಚ್

ಕೆ.ಮಂಜು-ಸ್ಮೈಲ್ ಶ್ರೀನು ಕಾಂಬಿನೇಶನ್‌ನಲ್ಲಿ ಮೂಡಬರಲಿದೆ ಅತಿ ದೊಡ್ಡ ಸಿನಿಮಾ

Untitled design 2025 07 16t095218.272

ಯುವ ನಿರ್ದೇಶಕ ಸ್ಮೈಲ್ ಶ್ರೀನು, ಕನ್ನಡ ಚಿತ್ರರಂಗದಲ್ಲಿ ‘ತೂಫಾನ್’, ‘ಬಳ್ಳಾರಿ ದರ್ಬಾರ್’, ‘18 to 25’, ಮತ್ತು ‘ಓ ಮೈ ಲವ್’ನಂತಹ ಮಾಸ್ ಮತ್ತು ಕ್ಲಾಸ್ ಚಿತ್ರಗಳ ಮೂಲಕ ಗುರುತಿಸಿಕೊಂಡವರು. ಇವರು ಈಗ ಪ್ರತಿಷ್ಠಿತ ನಿರ್ಮಾಪಕ ಕೆ.ಮಂಜು ಅವರೊಂದಿಗೆ ಕೈಜೋಡಿಸಿದ್ದಾರೆ. ಕೆ.ಮಂಜು, ‘ರಾಜಾಹುಲಿ’, ‘ರಾಮ ಶಾಮ ಭಾಮ’, ‘ಜಮೀನ್ದಾರ್’, ಮತ್ತು ‘ಮಾತಾಡ್ ಮಾತಾಡ್ ಮಲ್ಲಿಗೆ’ಯಂತಹ ಸದಭಿರುಚಿಯ ಚಿತ್ರಗಳನ್ನು ನಿರ್ಮಿಸಿದ್ದು, ಈ ಬಾರಿ ಸ್ಮೈಲ್ ಶ್ರೀನು ಅವರ ಪ್ರತಿಭೆಯನ್ನು ಗುರುತಿಸಿ ದೊಡ್ಡ ಮಟ್ಟದ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ.

ಈ ಚಿತ್ರವು ಕೆ.ಮಂಜು ಸಿನಿಮಾಸ್‌ನ 44ನೇ ಯೋಜನೆಯಾಗಿದ್ದು, ಕಥೆ ಮತ್ತು ಚಿತ್ರಕಥೆಯ ಕೆಲಸ ಪೂರ್ಣಗೊಂಡಿದೆ. ಸಂಭಾಷಣೆಯ ಕೆಲಸ ಪ್ರಗತಿಯಲ್ಲಿದ್ದು, ಶೀಘ್ರದಲ್ಲೇ ಚಿತ್ರದ ಶೀರ್ಷಿಕೆ, ಕಲಾವಿದರು, ಮತ್ತು ತಾಂತ್ರಿಕ ತಂಡದ ಬಗ್ಗೆ ಮಾಹಿತಿ ಬಿಡುಗಡೆಯಾಗಲಿದೆ. ಈ ಚಿತ್ರವು ರಾಷ್ಟ್ರಮಟ್ಟದಲ್ಲಿ ಗಮನ ಸೆಳೆಯುವಂತಹ ದೊಡ್ಡ ಕ್ಯಾನ್ವಾಸ್‌ನ ಯೋಜನೆಯಾಗಿದೆ.

ನಿರ್ದೇಶಕ ಸ್ಮೈಲ್ ಶ್ರೀನು ಮಾತನಾಡಿ, “ಕೆ.ಮಂಜು ಅವರು ನನ್ನ ಸ್ಕ್ರಿಪ್ಟ್ ಮತ್ತು ನರೇಶನ್‌ನ ಮೇಲೆ ನಂಬಿಕೆಯಿಟ್ಟು ಈ ಜವಾಬ್ದಾರಿಯನ್ನು ವಹಿಸಿದ್ದಾರೆ. ಪ್ರೇಕ್ಷಕರಿಗೆ ಹೊಸತನದ ಚಿತ್ರವೊಂದನ್ನು ಒಡ್ಡಿಕೊಡಲು ಸಿದ್ಧತೆ ನಡೆಯುತ್ತಿದೆ. ಇದು ರಾಷ್ಟ್ರಮಟ್ಟದಲ್ಲಿ ಗುರುತಿಸಿಕೊಳ್ಳುವ ಚಿತ್ರವಾಗಲಿದೆ. ಶೀಘ್ರದಲ್ಲೇ ಚಿತ್ರವನ್ನು ಅದ್ಧೂರಿಯಾಗಿ ಲಾಂಚ್ ಮಾಡುತ್ತೇವೆ,” ಎಂದಿದ್ದಾರೆ.

ಅವರು ಮತ್ತೆ ಮಾತನಾಡಿ, “ನನ್ನ ಕನಸಿನ ಯೋಜನೆಗೆ ಅನುಭವಿ ನಿರ್ಮಾಪಕರೂ ಆಗಿರುವ ಕೆ.ಮಂಜು ಅವರ ಸಹಕಾರ ಸಿಕ್ಕಿರುವುದು ನನ್ನ ಅದೃಷ್ಟ. ಈ ಚಿತ್ರ ಕನ್ನಡ ಚಿತ್ರರಂಗಕ್ಕೆ ಹೊಸ ಆಯಾಮವನ್ನು ತರುವ ಗುರಿಯನ್ನು ಹೊಂದಿದೆ,” ಎಂದು ಕುತೂಹಲ ಹೆಚ್ಚಿಸಿದ್ದಾರೆ.

ಈ ಚಿತ್ರವು ಕನ್ನಡ ಚಿತ್ರರಂಗದಲ್ಲಿ ದೊಡ್ಡ ನಿರೀಕ್ಷೆಯನ್ನು ಹುಟ್ಟುಹಾಕಿದ್ದು, ಶೀಘ್ರದಲ್ಲೇ ಚಾಲನೆಯಾಗಲಿದೆ.

Exit mobile version