ಟಾಲಿವುಡ್‌ನ ಸೂಪರ್‌ಸ್ಟಾರ್ ರಾಮ್ ಚರಣ್ ಅವರಿಗೆ ವಿಶ್ವದ ಪ್ರತಿಷ್ಠಿತ ಮೇಡಂ ಟುಸಾಡ್ಸ್ ಮ್ಯೂಸಿಯಂನಲ್ಲಿ ಮೇಣದ ಪ್ರತಿಮೆಯ ಗೌರವ ಸಿಕ್ಕಿದೆ. ಲಂಡನ್‌ನ ಮೇಡಂ ಟುಸಾಡ್ಸ್‌ನಲ್ಲಿ ರಾಮ್ ಚರಣ್ ಅವರ ಮೇಣದ ಪ್ರತಿಮೆಯನ್ನು ಅನಾವರಣಗೊಳಿಸಲಾಗಿದೆ. ಕುಟುಂಬ ಸಮೇತರಾಗಿ ಲಂಡನ್‌ಗೆ ತೆರಳಿದ ರಾಮ್ ಚರಣ್, ತಂದೆ ಮೆಗಾಸ್ಟಾರ್ ಚಿರಂಜೀವಿ, ತಾಯಿ ಸುರೇಖ, ಪತ್ನಿ ಉಪಾಸನಾ ಮತ್ತು ತಮ್ಮ ಮುದ್ದಿನ ಶ್ವಾನ ರೈಮ್ ಜೊತೆಗೆ ಈ ಕಾರ್ಯಕ್ರಮದಲ್ಲಿ ಭಾಗವಹಿಸಿದರು.
ಈ ಅನಾವರಣ ಕಾರ್ಯಕ್ರಮದ ವಿಶೇಷತೆ ಏನೆಂದರೆ, ರಾಮ್ ಚರಣ್ ಅವರ ಮೇಣದ ಪ್ರತಿಮೆಯ ಜೊತೆಗೆ ಅವರ ಸಾಕುಪ್ರಾಣಿ ರೈಮ್‌ನ ಮೇಣದ ಪ್ರತಿಮೆಯನ್ನೂ ನಿರ್ಮಿಸಲಾಗಿದೆ. ರಾಣಿ ಎಲಿಜಬೆತ್ ಬಳಿಕ ಸಾಕುಪ್ರಾಣಿಯ ಜೊತೆ ಮೇಣದ ಪ್ರತಿಮೆ ಹೊಂದಿರುವ ಎರಡನೇ ವ್ಯಕ್ತಿಯಾಗಿ ಮತ್ತು ಮೊದಲ ಭಾರತೀಯರಾಗಿ ರಾಮ್ ಚರಣ್ ಇತಿಹಾಸ ನಿರ್ಮಿಸಿದ್ದಾರೆ. ಕಾರ್ಯಕ್ರಮಕ್ಕೆ ರೈಮ್‌ನನ್ನು ಕರೆತಂದಿದ್ದು, ರಾಮ್ ಚರಣ್ ಕುಟುಂಬದೊಂದಿಗೆ ಫೋಟೋಗೆ ಪೋಸ್ ನೀಡಿದ್ದಾರೆ.
ಕಾರ್ಯಕ್ರಮದ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ. ಮೇಣದ ಪ್ರತಿಮೆಯು ಎಷ್ಟು ನಿಖರವಾಗಿದೆ ಎಂದರೆ, ಫೋಟೋದಲ್ಲಿ ಯಾರು ನಿಜವಾದ ರಾಮ್ ಚರಣ್ ಮತ್ತು ಯಾವುದು ಪ್ರತಿಮೆ ಎಂದು ಗುರುತಿಸುವುದು ಕಷ್ಟವಾಗಿದೆ! ಅಭಿಮಾನಿಗಳು ಈ ಫೋಟೋಗಳನ್ನು ವೀಕ್ಷಿಸಿ, ಕಾಮೆಂಟ್‌ಗಳ ಮೂಲಕ ರಾಮ್ ಚರಣ್‌ಗೆ ಅಭಿನಂದನೆ ತಿಳಿಸುತ್ತಿದ್ದಾರೆ.
ರಾಮ್ ಚರಣ್ ಅವರ ಮೇಣದ ಪ್ರತಿಮೆಯನ್ನು ಲಂಡನ್‌ನ ಮೇಡಂ ಟುಸಾಡ್ಸ್‌ನಲ್ಲಿ ಮೇ 19, 2025ರ ವರೆಗೆ ಸಾರ್ವಜನಿಕ ವೀಕ್ಷಣೆಗೆ ಇಡಲಾಗುತ್ತದೆ. ಇದಾದ ಬಳಿಕ, ಈ ಪ್ರತಿಮೆಯನ್ನು ಸಿಂಗಾಪುರದ ಮೇಡಂ ಟುಸಾಡ್ಸ್ ಮ್ಯೂಸಿಯಂಗೆ ಸ್ಥಳಾಂತರಿಸಲಾಗುತ್ತದೆ. ಈ ಗೌರವವು ರಾಮ್ ಚರಣ್ ಅವರ ಜಾಗತಿಕ ಖ್ಯಾತಿಯನ್ನು ಮತ್ತಷ್ಟು ಎತ್ತಿಹಿಡಿಯುತ್ತದೆ.
‘ಆರ್‌ಆರ್‌ಆರ್’ ಸಿನಿಮಾದ ಸೂಪರ್‌ಹಿಟ್ ಯಶಸ್ಸಿನ ಬಳಿಕ ರಾಮ್ ಚರಣ್ ಅವರ ಜನಪ್ರಿಯತೆ ಜಾಗತಿಕ ಮಟ್ಟದಲ್ಲಿ ಗಗನಕ್ಕೇರಿದೆ. ಭಾರತದಾಚೆಗೂ ಅಪಾರ ಅಭಿಮಾನಿಗಳನ್ನು ಹೊಂದಿರುವ ಅವರು, ಪ್ರಸ್ತುತ ‘ಪೆದ್ದಿ’ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಇದೇ ವೇಳೆ, ಲಂಡನ್‌ನಲ್ಲಿ ‘ಆರ್‌ಆರ್‌ಆರ್’ ಸಿನಿಮಾದ ವಿಶೇಷ ಪ್ರದರ್ಶನವನ್ನು ಆಯೋಜಿಸಲಾಗಿದ್ದು, ಇದರಲ್ಲಿ ಜೂನಿಯರ್ ಎನ್‌ಟಿಆರ್ ಮತ್ತು ರಾಜಮೌಳಿ ಕೂಡ ಭಾಗವಹಿಸಿದ್ದಾರೆ.