ಡಿಬಾಸ್ ದರ್ಶನ್ ಇಂದು ಪರಪ್ಪನ ಅಗ್ರಹಾರ ಜೈಲಿನಲ್ಲಿ ಇರಬಹುದು. ಆದ್ರೆ ಅವ್ರನ್ನ ಪ್ರತಿ ದಿನ ಪ್ರತಿ ಕ್ಷಣ ಆರಾಧಿಸೋ, ಪೂಜಿಸೋ ಅಭಿಮಾನಿಗಳಿದ್ದಾರೆ. ಅದ್ರಲ್ಲೂ ಲೇಡಿ ಸೂಪರ್ ಸ್ಟಾರ್ ರಚಿತಾ ರಾಮ್ ಅಂತೂ ಎಲ್ಲೇ ಹೋದ್ರೂ ದರ್ಶನ್‌‌ನ ನೆನಪಿಸಿಕೊಳ್ಳದೆ ಆ ವೇದಿಕೆಯಿಂದ ಕೆಳಗಿಳಿದ ನಿದರ್ಶನವೇ ಇಲ್ಲ. ಯುವ ದಸರಾ ಸ್ಟೇಜ್‌‌ನಲ್ಲಿ ಆಗಿದ್ದೇನು..? ದಚ್ಚು ಅಂದ್ರೆ ರಚ್ಚುಗ್ಯಾಕೆ ಅಷ್ಟೊಂದು ನಿಷ್ಠೆ ಅನ್ನೋದಕ್ಕೆ ಉತ್ತರ ಇಲ್ಲಿದೆ.
- ಯುವ ದಸರಾ ವೇದಿಕೆ.. ರಚ್ಚು ಬಾಯಲ್ಲಿ ದಚ್ಚು ವೇದಘೋಷ
- ನನ್ನ ಇಂಡಸ್ಟ್ರಿಗೆ ತಂದಿದ್ದೇ ಅವ್ರು.. ಉಸಿರಿರೋ ತನಕ ಮರೆಯಲ್ಲ
- ದರ್ಶನ್ ಜೈಲಲ್ಲಿದ್ರೂ ಆರಾಧಿಸುವವರ ಸಂಖ್ಯೆ ಕಮ್ಮಿ ಆಗಿಲ್ಲ
- ಸ್ಯಾಂಡಲ್‌‌ವುಡ್ ಸ್ಕ್ರೀನ್‌‌ಗೆ ಮರಳಿ ಬರಲಿ ಡಿಬಾಸ್ ಆ ಗತ್ತು
ಚಾಲೆಂಜಿಂಗ್ ಸ್ಟಾರ್ ದರ್ಶನ್.. ಕಾನೂನು ಸಂಕಷ್ಟಕ್ಕೆ ಸಿಲುಕಿ ಇಂದು ಜೈಲಲ್ಲೇ ಇರಬಹುದು. ಆದ್ರೆ ಅವರ ಸ್ಟಾರ್‌‌ಡಮ್ ಮಾತ್ರ ಕಿಂಚಿತ್ತೂ ಕಮ್ಮಿ ಆಗಿಲ್ಲ. ಯಾಕಂದ್ರೆ ಪ್ರತಿ ದಿನ ಅವರನ್ನ ಆರಾಧಿಸೋ, ಪೂಜಿಸೋ, ಧ್ಯಾನಿಸೋ ಅಸಂಖ್ಯಾತ ಅಭಿಮಾನಿಗಳಿದ್ದಾರೆ. ಅದರಲ್ಲೂ ಡಿಂಪಲ್ ಕ್ವೀನ್ ರಚಿತಾ ರಾಮ್ ಅಂತಹ ಶಿಷ್ಯಂದಿರು ಸಾಕಷ್ಟು ಮಂದಿ ಇದ್ದಾರೆ. ಈಕೆ ಯಾವುದೇ ವೇದಿಕೆ ಹತ್ತಿದ್ರೂ.. ಎಂಥದ್ದೇ ಪರಿಸ್ಥಿತಿ ಎದುರಾದ್ರೂ ಸಹ ನಟ ದರ್ಶನ್ ಹೆಸರು ಹೇಳದೆ ಆ ವೇದಿಕೆ ಇಳಿದ ನಿದರ್ಶನವೇ ಇಲ್ಲ.
ನಿನ್ನೆ ರಾತ್ರಿ ಅರಮನೆ ನಗರಿ ಮೈಸೂರಿನಲ್ಲಿ ನಡೆದ ಯುವ ದಸರಾ ವೇದಿಕೆಯಲ್ಲಿ ಕೂಡ ರಚ್ಚು ಬಾಯಲ್ಲಿ ದಚ್ಚು ಹೆಸರು ಮಾರ್ದನಿಸಿತು. ನನ್ನ ಇಂಡಸ್ಟ್ರಿಗೆ ತಂದವರು ದರ್ಶನ್. ಅವರ ಉಸಿರಿರೋ ತನಕ ಹಾಗೂ ನನ್ನ ಉಸಿರಿರೋ ತನಕ ನಾನು ಅವರನ್ನ ಮರೆಯಲ್ಲ ಅಂದಿದ್ದಾರೆ. ಅಷ್ಟೇ ಅಲ್ಲ.. ಇದು ಡಿಬಾಸ್ ಹುಟ್ಟಿದ ಊರು. ನಾನು ಈ ದಸರಾ ವೇದಿಕೆಗೆ ಬರೋಕೂ ಅವರೇ ಕಾರಣ ಎಂದಿದ್ದಾರೆ. ರಚಿತಾ ಖಚಿತವಾಗಿ ದಚ್ಚು ಬಗ್ಗೆ ಮಾತಾಡಿದ್ದು ನೋಡಿ ಅಲ್ಲಿ ನೆರೆದಿದ್ದ ಡಿಬಾಸ್ ಫ್ಯಾನ್ಸ್ ಅಕ್ಷರಶಃ ದಿಲ್‌ಖುಷ್ ಆಗಿದ್ದಾರೆ.
ಹೌದು.. ಬುಲ್‌‌ಬುಲ್ ಸಿನಿಮಾದಿಂದ ನಾಯಕನಟಿಯಾಗಿ ಚಿತ್ರರಂಗಕ್ಕೆ ರಚಿತಾ ಪದಾರ್ಪಣೆ ಮಾಡಿದ್ದೇ ದರ್ಶನ್ ಸಿನಿಮಾದಿಂದ ಮತ್ತು ದಚ್ಚು ಹೋಮ್ ಬ್ಯಾನರ್‌‌ನಿಂದ ಅನ್ನೋದು ಎಲ್ಲರಿಗೂ ಗೊತ್ತೇಯಿದೆ. ರಚಿತಾಗೆ ಆ್ಯಂಕರ್ ಅನುಶ್ರೀ ಕೂಡ ಸಾಥ್ ನೀಡಿದ್ದು, ನಿಂತ ನೋಡೋ ಯಜಮಾನ ಹಾಡು ಗುನುಗಿ ಎಲ್ಲರನ್ನ ರಂಜಿಸಿದ್ರು. ಅಲ್ಲದೆ.. ದರ್ಶನ್ ನಟನೆಯ ಕೊನೆಯ ಸಿನಿಮಾ ಡೆವಿಲ್‌ನ ಇದ್ರೆ ನೆಮ್ದಿಯಾಗ್ ಇರ್ಬೇಕ್ ಹಾಡು ಹಾಡಿದ ಅನಿರುದ್ದ್ ಶಾಸ್ತ್ರಿ.. ಆ ಹಾಡಿನ ಹಿಂದಿನ ಅಸಲಿ ಕಥೆ ಬಿಚ್ಚಿಟ್ಟರು.
ಒಟ್ಟಾರೆ ಎಲ್ಲೇ ಹೋದ್ರೂ.. ದರ್ಶನ್ ಹೆಸರು ರಾರಾಜಿಸ್ತಿರುತ್ತೆ. ಆದಷ್ಟು ಬೇಗ ಆ ಆರಡಿ ಕಟೌಟ್ ಗತ್ತು ಮತ್ತೆ ಚಿತ್ರರಂಗಕ್ಕೆ ಮರಳುವಂತಾಗಲಿ. ಅವರಿಗೆ ಅಂಟಿರೋ ಕಳಂಕ ದೂರ ಆಗಲಿ. ಚಿತ್ರರಂಗಕ್ಕೆ ಮತ್ತೆ ಹಳೆಯ ಚೈತನ್ಯ, ಹುರುಪು, ಹುಮ್ಮಸ್ಸು ಸಿಗಲಿ ಅನ್ನೋದು ಅಸಂಖ್ಯಾತ ಚಿತ್ರಪ್ರೇಮಿಗಳ ಆಶಯವಾಗಿದೆ.
ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಗ್ಯಾರಂಟಿ ನ್ಯೂಸ್