ದಕ್ಷಿಣ ಭಾರತದ ಚಿತ್ರರಂಗದಲ್ಲಿ ತನ್ನದೇ ಆದ ವಿಶಿಷ್ಟ ಛಾಪನ್ನು ಮೂಡಿಸಿರುವ ಸಂಗೀತ ಮಾಂತ್ರಿಕ ಅನೂಪ್ ರೂಬೆನ್ಸ್, ಈಗ ಕನ್ನಡ ಚಿತ್ರರಂಗದಲ್ಲಿ ಗಟ್ಟಿಯಾಗಿ ನೆಲೆಯೂರುತ್ತಿದ್ದಾರೆ. ಸುಮಾರು 80ಕ್ಕೂ ಹೆಚ್ಚು ಚಿತ್ರಗಳಿಗೆ ಸಂಗೀತ ನೀಡಿದ ಅನುಭವ ಹೊಂದಿರುವ ಅನೂಪ್, ತೆಲುಗಿನಂತೆ ಕನ್ನಡದಲ್ಲೂ ಸತತ ಹಿಟ್ ಹಾಡುಗಳನ್ನು ನೀಡುವ ಮೂಲಕ ಮ್ಯೂಸಿಕ್ ಪ್ರಿಯರ ಆಲ್-ಟೈಮ್ ಫೇವರಿಟ್ ಆಗಿ ಹೊರಹೊಮ್ಮುತ್ತಿದ್ದಾರೆ.
ಅನೂಪ್ ರೂಬೆನ್ಸ್ ಎಂದರೆ ನೆನಪಾಗುವುದೇ ಭಾವನಾತ್ಮಕ ಮತ್ತು ರಿದಮಿಕ್ ಮ್ಯೂಸಿಕ್. ತೆಲುಗಿನ ಮನಂ, ಇಷ್ಕ್, ಗೋಪಾಲ ಗೋಪಾಲ ಅಂತಹ ಮ್ಯೂಸಿಕಲ್ ಹಿಟ್ ಚಿತ್ರಗಳ ಮೂಲಕ ಮನೆಮಾತಾದ ಇವರು, ಕನ್ನಡ ಪ್ರೇಕ್ಷಕರಿಗೂ ಅಚ್ಚುಮೆಚ್ಚು.
ಸ್ಯಾಂಡಲ್ವುಡ್ನಲ್ಲಿ ಗೋಲ್ಡನ್ ಸ್ಟಾರ್ ಗಣೇಶ್ ನಟನೆಯ ಖುಷಿ ಖುಷಿಯಾಗಿ ಚಿತ್ರದ ಅರೆ ಅರೆ ಮತ್ತೆ ಹೃದಯ ಹಾಡಿತು ಹಾಡು ಬಿಡುಗಡೆಯಾಗಿ ವರ್ಷಗಳಾದರೂ ಇಂದಿಗೂ ಮೆಲೋಡಿ ಪ್ರಿಯರ ಪ್ಲೇಲಿಸ್ಟ್ನಲ್ಲಿದೆ. ಅದೇ ರೀತಿ ನಿಖಿಲ್ ಕುಮಾರಸ್ವಾಮಿ ಅಭಿನಯದ ಸೀತಾರಾಮ ಕಲ್ಯಾಣ ಚಿತ್ರದ ನಿನ್ನ ರಾಜ ನಾನು ನನ್ನ ರಾಣಿ ನೀನು ಹಾಡು ಹಳ್ಳಿ ಹಳ್ಳಿಗಳಲ್ಲೂ ಧೂಳೆಬ್ಬಿಸಿತ್ತು. ಇಷ್ಟೇ ಅಲ್ಲದೆ, ಗೀತಾ ಚಿತ್ರದ ಮೂಲಕವೂ ಅವರು ತಮ್ಮ ವೈವಿಧ್ಯತೆಯನ್ನು ಸಾಬೀತುಪಡಿಸಿದ್ದರು.
ಸೀತಾ ಪಯಣದಲ್ಲಿ ಅನೂಪ್ ಮ್ಯಾಜಿಕ್
ಸದ್ಯ ಇಡೀ ಚಿತ್ರರಂಗ ಕುತೂಹಲದಿಂದ ಕಾಯುತ್ತಿರುವ ಸಿನಿಮಾ ಸೀತಾ ಪಯಣ. ಆಕ್ಷನ್ ಕಿಂಗ್ ಅರ್ಜುನ್ ಸರ್ಜಾ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ಈ ಚಿತ್ರಕ್ಕೆ ಅನೂಪ್ ರೂಬೆನ್ಸ್ ಅದ್ಭುತ ಸಂಗೀತ ನೀಡಿದ್ದಾರೆ. ಶ್ರೀ ರಾಮ್ ಫಿಲ್ಮ್ಸ್ ಇಂಟರ್ನ್ಯಾಷನಲ್ ಬ್ಯಾನರ್ ಅಡಿಯಲ್ಲಿ ಸಿದ್ಧವಾಗುತ್ತಿರುವ ಈ ಸಿನಿಮಾದ ಹಾಡುಗಳು ಈಗಾಗಲೇ ಟ್ರೆಂಡ್ ಸೃಷ್ಟಿಸಿವೆ.
ಈಗಾಗಲೇ ಬಿಡುಗಡೆಯಾಗಿರುವ ಯಾವೂರಿಗ್ ಹೊಕ್ಕಿಯೆ ಹುಡುಗಿ ಮತ್ತು ಅಸಲಿ ಸಿನಿಮಾ ಹಾಡುಗಳು ಯೂಟ್ಯೂಬ್ ಮತ್ತು ರೀಲ್ಸ್ಗಳಲ್ಲಿ ಸಖತ್ ಸೌಂಡ್ ಮಾಡುತ್ತಿವೆ. ಇತ್ತೀಚೆಗಷ್ಟೇ ಬಿಡುಗಡೆಯಾದ ಮೂರನೇ ಹಾಡಿಗೆ ಆಕ್ಷನ್ ಪ್ರಿನ್ಸ್ ಧ್ರುವ ಸರ್ಜಾ ಧ್ವನಿಗೂಡಿಸಿದ್ದು, ಅದರ ಮಾಸ್ ಅಪೀಲ್ ಯುವಜನತೆಯನ್ನು ಹುಚ್ಚೆಬ್ಬಿಸಿದೆ. ಈ ಹಾಡಿನ ಫ್ರೆಶ್ ಸೌಂಡ್ ಅನೂಪ್ ಅವರ ಕ್ರಿಯೇಟಿವಿಟಿಗೆ ಸಾಕ್ಷಿಯಾಗಿದೆ.
ಕೇವಲ ಅತಿಥಿ ಸಂಗೀತ ನಿರ್ದೇಶಕರಾಗಿ ಉಳಿಯದೆ, ಕನ್ನಡ ಚಿತ್ರರಂಗದ ಅವಿಭಾಜ್ಯ ಅಂಗವಾಗಲು ಅನೂಪ್ ರೂಬೆನ್ಸ್ ಸಿದ್ಧರಾಗಿದ್ದಾರೆ. ಕಥೆಯ ಭಾವನೆಗೆ ತಕ್ಕಂತೆ ರಾಗ ಸಂಯೋಜಿಸುವ ಅವರ ಕಲೆ, ಮುಂಬರುವ ಸಿನಿಮಾಗಳ ಮೇಲೆ ಬೆಟ್ಟದಷ್ಟು ನಿರೀಕ್ಷೆ ಮೂಡಿಸಿದೆ.