ವಿಜಯದಶಮಿಯ ಸಂಭ್ರಮದ ಸಂದರ್ಭದಲ್ಲಿ ‘ಮಿಸ್ ಮ್ಯಾಚ್’ ಚಿತ್ರದ ಮೊದಲ ಹಾಡು ‘ಚಲಿಸಿತು ಮೋಡ’ ಅನಾವರಣಗೊಂಡಿದೆ. ಪ್ರೀತಿ ಮೊಳೆಯುವ ಸುಂದರ ಕ್ಷಣಗಳನ್ನು ಮಧುರವಾಗಿ ಕಟ್ಟಿಕೊಡುವ ಈ ಹಾಡು, ಇಂದಿನ ಪೀಳಿಗೆಯ ಮನಸ್ಸಿಗೆ ಹತ್ತಿರವಾಗುವ ಭರವಸೆ ಮೂಡಿಸಿದೆ. ವಿಶೇಷವೆಂದರೆ, ಇದು ತೇಜಸ್ ಪಬ್ಲಿಕೇಷನ್ಸ್ ಹೊಸದಾಗಿ ಆರಂಭಿಸಿರುವ ಸಂಗೀತ ಮುದ್ರಿಕೆಯ ಮೊದಲ ಬಿಡುಗಡೆಯೂ ಹೌದು.
ಜೂಡಾ ಸ್ಯಾಂಡಿ ಸಂಗೀತ ಸಂಯೋಜಿಸಿರುವ ಈ ಗೀತೆಗೆ ನಾಗಾರ್ಜುನ್ ಶರ್ಮ ಸಾಹಿತ್ಯ ಬರೆದಿದ್ದು, ಶ್ರೀಲಕ್ಷ್ಮಿ ಬೆಳ್ಮಣ್ಣು ತಮ್ಮ ಸುಮಧುರ ಧ್ವನಿಯಲ್ಲಿ ಹಾಡಿದ್ದಾರೆ. ಮುಂಜಾನೆಯ ಹೊಂಗಿರಣದಂತೆ ಪ್ರೀತಿಯ ಹೊಸ ಭಾವನೆಗಳನ್ನು ಮೂಡಿಸುವ ‘ಚಲಿಸಿತು ಮೋಡ’ ಹಾಡು ತೇಜಸ್ ಪಬ್ಲಿಕೇಷನ್ಸ್‌ನ ಯೂಟ್ಯೂಬ್ ವಾಹಿನಿಯಲ್ಲಿ ಲಭ್ಯವಿದೆ. ಚಿತ್ರದ ಸಂಪೂರ್ಣ ಆಲ್ಬಂನ ಸಂಗೀತ ಹಕ್ಕುಗಳೂ ಸಂಸ್ಥೆಯ ಬಳಿಯೇ ಇವೆ.
ಕವನ ಸಂಕಲನದಿಂದ ಸಂಗೀತ ಲೋಕದವರೆಗೆ
ಒಂದು ಕವನ ಸಂಕಲನದಿಂದ ಆರಂಭವಾದ ಹದಿನಾಲ್ಕು ವರ್ಷಗಳ ಪಯಣ ಇದೀಗ ಸಂಗೀತ ಲೋಕದತ್ತ ಹೊಸ ಹೆಜ್ಜೆಯಿಟ್ಟಿದೆ. 2012ರಲ್ಲಿ ಎಂಜಿನಿಯರಿಂಗ್ ಪದವಿ ಪೂರ್ಣಗೊಳಿಸಿದ್ದ ತೇಜಸ್ ವೆಂಕಟೇಶ್ ಅವರು ‘ಭಾವೋದ್ವೇಗಗಳ ಪ್ರತಿಬಿಂಬ’ ಎಂಬ ತಮ್ಮ ಮೊದಲ ಕನ್ನಡ ಕವನ ಸಂಕಲನವನ್ನು ಪ್ರಕಟಿಸುವ ಮೂಲಕ ‘ತೇಜಸ್ ಪಬ್ಲಿಕೇಷನ್ಸ್’ ಸಂಸ್ಥೆಯನ್ನು ಆರಂಭಿಸಿದ್ದರು.
ಒಂದು ದಶಕಕ್ಕೂ ಹೆಚ್ಚು ಕಾಲ ಕೃತಕ ಬುದ್ಧಿಮತ್ತೆ (ಎಐ) ತಂತ್ರಜ್ಞಾನ ಕ್ಷೇತ್ರದಲ್ಲಿ ಕೆಲಸ ಮಾಡಿದ ಅವರು, ಆ ಕ್ಷೇತ್ರದಿಂದ ವಿರಾಮ ಪಡೆದು ‘ಮಿಸ್ ಮ್ಯಾಚ್’ ಚಿತ್ರದ ನಿರ್ಮಾಣದ ಮೂಲಕ ಚಿತ್ರರಂಗಕ್ಕೆ ಪ್ರವೇಶಿಸಿದ್ದಾರೆ. ಇದೀಗ ತಮ್ಮದೇ ಸಂಗೀತ ಮುದ್ರಿಕೆಯನ್ನು ಆರಂಭಿಸುವ ಮೂಲಕ ಸಂಸ್ಥೆಯ ಕಾರ್ಯವ್ಯಾಪ್ತಿಯನ್ನು ವಿಸ್ತರಿಸಿದ್ದಾರೆ.
ಈ ಕುರಿತು ಮಾತನಾಡಿರುವ ತೇಜಸ್ ವೆಂಕಟೇಶ್, “ತೇಜಸ್ ಪಬ್ಲಿಕೇಷನ್ಸ್‌ನ ಪ್ರತಿಯೊಂದು ಹೊಸ ಅಧ್ಯಾಯವೂ ಸವಾಲುಗಳೊಂದಿಗೆ ಆರಂಭವಾಗಿದೆ. 2012ರಲ್ಲಿ ‘ಭಾವೋದ್ವೇಗಗಳ ಪ್ರತಿಬಿಂಬ’ ಕವನ ಸಂಕಲನದ ಮೂಲಕ ಆರಂಭವಾದ ನಮ್ಮ ಪಯಣ ಇಂದು ‘ಮಿಸ್ ಮ್ಯಾಚ್’ ಚಿತ್ರದವರೆಗೆ ಬಂದಿದೆ. ತಂತ್ರಜ್ಞಾನ ಕ್ಷೇತ್ರದಿಂದ ವಿರಾಮ ಪಡೆದು, ನನಗೆ ಸಂಪೂರ್ಣ ನಂಬಿಕೆಯಿರುವ ಪ್ರತಿಭಾವಂತ ತಂಡದೊಂದಿಗೆ ಈ ಚಿತ್ರವನ್ನು ನಿರ್ಮಿಸಿದ್ದೇನೆ. ಜೂಡಾ ಸ್ಯಾಂಡಿ ಸಂಯೋಜಿಸಿದ ಸಂಗೀತವನ್ನು ಕೇಳಿದಾಗ ನಮ್ಮದೇ ಸಂಗೀತ ಮುದ್ರಿಕೆಯ ಮೂಲಕ ಆಲ್ಬಂ ಬಿಡುಗಡೆ ಮಾಡಬೇಕೆಂಬ ಆಲೋಚನೆ ಮೂಡಿತು. ‘ಮಿಸ್ ಮ್ಯಾಚ್’ ನಮ್ಮ ಮೊದಲ ಆಲ್ಬಂ. ಮುಂದಿನ ದಿನಗಳಲ್ಲಿ ಯುವ ಕಲಾವಿದರು, ಗಾಯಕರು ಹಾಗೂ ಗೀತರಚನೆಕಾರರು ತಮ್ಮ ಪ್ರತಿಭೆಯನ್ನು ಪರಿಚಯಿಸಿಕೊಳ್ಳುವ ವೇದಿಕೆಯಾಗಿ ಈ ಸಂಗೀತ ಮುದ್ರಿಕೆ ಬೆಳೆಯಬೇಕು ಎಂಬುದು ನಮ್ಮ ಆಶಯ,” ಎಂದಿದ್ದಾರೆ.
ಪ್ರತಿಭಾವಂತ ಕಲಾವಿದರ ಸಂಗಮ
ಹಿಂದೂಸ್ತಾನಿ ಶಾಸ್ತ್ರೀಯ ಸಂಗೀತ ಹಾಗೂ ಹಿನ್ನೆಲೆ ಗಾಯನ ಕ್ಷೇತ್ರದಲ್ಲಿ ಗುರುತಿಸಿಕೊಂಡಿರುವ ಶ್ರೀಲಕ್ಷ್ಮಿ ಬೆಳ್ಮಣ್ಣು, ‘ಸಪ್ತ ಸಾಗರದಾಚೆ ಎಲ್ಲೋ’ ಚಿತ್ರದ ‘ಕಡಲನು’ ಹಾಡಿನ ಮೂಲಕ ಜನಪ್ರಿಯರಾಗಿದ್ದಾರೆ. ಗೀತರಚನೆಕಾರ ನಾಗಾರ್ಜುನ್ ಶರ್ಮ ಅವರು ‘ಅವನೇ ಶ್ರೀಮನ್ನಾರಾಯಣ’ ಚಿತ್ರದ ‘ಹ್ಯಾಂಡ್ಸ್ ಅಪ್’, ‘ನಾರಾಯಣ ನಾರಾಯಣ’ ಹಾಗೂ ‘ಕವಲುದಾರಿ’ ಚಿತ್ರದ ‘ನಿಗೂಢ’ ಸೇರಿದಂತೆ ಹಲವು ಜನಪ್ರಿಯ ಹಾಡುಗಳಿಗೆ ಸಾಹಿತ್ಯ ರಚಿಸಿದ್ದಾರೆ.
ಮಲೆನಾಡಿನ ಹಿನ್ನೆಲೆಯಲ್ಲಿ ‘ಮಿಸ್ ಮ್ಯಾಚ್’
ನಿರ್ದೇಶಕ ಸಾಯಿ ಶ್ರೀನಿಧಿ ಅವರ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ‘ಮಿಸ್ ಮ್ಯಾಚ್’ ಮಲೆನಾಡಿನ ಹಿನ್ನೆಲೆಯಲ್ಲಿ ನಡೆಯುವ ಕೌಟುಂಬಿಕ ಪ್ರಣಯ ಹಾಸ್ಯಮಯ ಚಿತ್ರವಾಗಿದೆ. ಕೌಶಿಕ್ ಗೌಡ ಮತ್ತು ಅಶ್ವಿತಾ ಹೆಗ್ಡೆ ನಾಯಕ-ನಾಯಕಿಯಾಗಿ ಅಭಿನಯಿಸಿದ್ದು, ತೇಜೇಶ್, ಅಮೃತಾ, ಅನಿರುದ್ಧ್ ಆಚಾರ್ಯ, ನಾಗೇಂದ್ರ ಶಾ ಹಾಗೂ ಲಕ್ಷ್ಮಿ ಸಿದ್ದಯ್ಯ ಪ್ರಮುಖ ಪೋಷಕ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
ತೇಜಸ್ ವೆಂಕಟೇಶ್ ಅವರು ತೇಜಸ್ ಪಬ್ಲಿಕೇಷನ್ಸ್ ಮತ್ತು ಸಟಾಯರ್ ಬ್ಯಾನರ್ ಅಡಿಯಲ್ಲಿ ಚಿತ್ರವನ್ನು ನಿರ್ಮಿಸಿದ್ದಾರೆ. ಗಣೇಶ್ ಮಹಾಬಲ ಛಾಯಾಗ್ರಹಣ ಹಾಗೂ ದೀಪಕ್ ಕುಲಾಲ್ ಸಂಕಲನದ ಜವಾಬ್ದಾರಿ ನಿರ್ವಹಿಸಿದ್ದಾರೆ.