ಕಮಲ್ ಹಾಸನ್‌ಗೆ ಕಾಲ ಕೆಟ್ಟಂತಿರುವ ಸಮಯದಲ್ಲಿ ಮತ್ತೊಂದು ಆಘಾತ ಎದುರಾಗಿದೆ. ಕನ್ನಡ ಭಾಷೆ ತಮಿಳಿನಿಂದ ಹುಟ್ಟಿದೆ ಎಂದು ವಿವಾದಾತ್ಮಕ ಹೇಳಿಕೆ ನೀಡಿ ಕನ್ನಡಿಗರ ಕೆಂಗಣ್ಣಿಗೆ ಗುರಿಯಾಗಿದ್ದ ಕಮಲ್ ಹಾಸನ್‌ರ ‘ಥಗ್ ಲೈಫ್’ ಸಿನಿಮಾ ಕರ್ನಾಟಕದಲ್ಲಿ ಬಿಡುಗಡೆಯಾಗದಿರುವುದರಿಂದ ಬಾಕ್ಸ್ ಆಫೀಸ್‌ನಲ್ಲಿ ದೊಡ್ಡ ಮುಖಭಂಗಕ್ಕೀಡಾಗಿದೆ. ಇದರ ಜೊತೆಗೆ, ನೆಟ್‌ಫಿಕ್ಸ್ ಒಟಿಟಿ ರೈಟ್ಸ್ ಒಪ್ಪಂದವನ್ನು ಕಡಿಮೆ ಮೊತ್ತಕ್ಕೆ ಮರುಪರಿಶೀಲಿಸುವ ಮೂಲಕ ಕಮಲ್‌ಗೆ ಇನ್ನಷ್ಟು ಮುಜುಗರ ತಂದೊಡ್ಡಿದೆ.
ಕಮಲ್ ಹಾಸನ್ ನಟಿಸಿ, ನಿರ್ಮಿಸಿರುವ ‘ಥಗ್ ಲೈಫ್’ ಸಿನಿಮಾ 200 ಕೋಟಿ ರೂಪಾಯಿಗಳ ಬೃಹತ್ ಬಂಡವಾಳದಲ್ಲಿ ತಯಾರಾಗಿತ್ತು. ಆದರೆ, ಚಿತ್ರವು ಬಾಕ್ಸ್ ಆಫೀಸ್‌ನಲ್ಲಿ ಕೇವಲ 50 ಕೋಟಿ ರೂಪಾಯಿಗಳನ್ನೂ ಗಳಿಸಲು ವಿಫಲವಾಗಿದೆ. ಕರ್ನಾಟಕದಲ್ಲಿ ಕಮಲ್‌ರ ವಿವಾದಾತ್ಮಕ ಹೇಳಿಕೆಯಿಂದ ಉಂಟಾದ ವಿರೋಧದಿಂದಾಗಿ ಚಿತ್ರದ ಬಿಡುಗಡೆಗೆ ನಿಷೇಧ ಹೇರಲಾಗಿತ್ತು. ಇದು ಚಿತ್ರದ ಕಲೆಕ್ಷನ್‌ಗೆ ಭಾರೀ ಪೆಟ್ಟು ನೀಡಿದೆ.
‘ಥಗ್ ಲೈಫ್’ ಚಿತ್ರದ ಒಟಿಟಿ ರೈಟ್ಸ್‌ನ್ನು ಬಿಡುಗಡೆಗೂ ಮುಂಚೆ ನೆಟ್‌ಫಿಕ್ಸ್ 130 ಕೋಟಿ ರೂಪಾಯಿಗಳಿಗೆ ಖರೀದಿಸಿತ್ತು ಎಂಬ ಸುದ್ದಿ ಇತ್ತು. ಆದರೆ, ಚಿತ್ರದ ಬಾಕ್ಸ್ ಆಫೀಸ್ ವೈಫಲ್ಯದಿಂದಾಗಿ, ನೆಟ್‌ಫಿಕ್ಸ್ ಈ ಒಪ್ಪಂದವನ್ನು ಮರುಪರಿಶೀಲಿಸಲು ಮುಂದಾಗಿದೆ. 20-25% ಕಡಿತದೊಂದಿಗೆ ಕಡಿಮೆ ಮೊತ್ತಕ್ಕೆ ಸ್ಟ್ರೀಮಿಂಗ್ ಹಕ್ಕುಗಳನ್ನು ಪಡೆಯಲು ನೆಟ್‌ಫಿಕ್ಸ್ ಯೋಜನೆ ರೂಪಿಸಿದೆ ಎನ್ನಲಾಗುತ್ತಿದೆ. ಇದು ಕಮಲ್ ಹಾಸನ್‌ಗೆ ಆರ್ಥಿಕವಾಗಿ ಮತ್ತೊಂದು ದೊಡ್ಡ ಆಘಾತವನ್ನುಂಟು ಮಾಡಿದೆ.
‘ಥಗ್ ಲೈಫ್’ ಚಿತ್ರವನ್ನು ಖ್ಯಾತ ನಿರ್ದೇಶಕ ಮಣಿರತ್ನಂ ನಿರ್ದೇಶಿಸಿದ್ದು, ಕಮಲ್ ಹಾಸನ್ ಮತ್ತು ಮಣಿರತ್ನಂ ಮೂರು ದಶಕಗಳ ಬಳಿಕ ಮತ್ತೆ ಒಂದಾಗಿದ್ದರು. ಚಿತ್ರದಲ್ಲಿ ತ್ರಿಷಾ, ಸಿಂಬು ಸೇರಿದಂತೆ ದೊಡ್ಡ ತಾರಾಬಳಗವಿತ್ತು. ಆದರೆ, ಈ ಜೋಡಿಯ ಮೋಡಿಯೂ ಪ್ರೇಕ್ಷಕರ ಮೇಲೆ ಪರಿಣಾಮ ಬೀರಲಿಲ್ಲ. ಕಥೆ, ನಿರೂಪಣೆ ಮತ್ತು ವಿವಾದದ ಹಿನ್ನೆಲೆಯಿಂದ ಚಿತ್ರವು ಯಶಸ್ಸು ಕಾಣಲು ವಿಫಲವಾಯಿತು.
ಕಮಲ್ ಹಾಸನ್‌ರ ಕನ್ನಡ ಭಾಷೆಯ ಕುರಿತಾದ ವಿವಾದಾತ್ಮಕ ಹೇಳಿಕೆಯು ಕರ್ನಾಟಕದಲ್ಲಿ ಭಾರೀ ಆಕ್ರೋಶಕ್ಕೆ ಕಾರಣವಾಯಿತು. ಕನ್ನಡಿಗರ ಸಂಘಟನೆಗಳು ಮತ್ತು ಅಭಿಮಾನಿಗಳು ಚಿತ್ರದ ಬಿಡುಗಡೆಯನ್ನು ವಿರೋಧಿಸಿದ್ದರಿಂದ, ಕರ್ನಾಟಕದಲ್ಲಿ ‘ಥಗ್ ಲೈಫ್’ ಬಿಡುಗಡೆಯಾಗಲಿಲ್ಲ. ಈ ವಿವಾದವು ಚಿತ್ರದ ಒಟ್ಟಾರೆ ಕಾರ್ಯಕ್ಷಮತೆಯ ಮೇಲೆ ಗಂಭೀರ ಪರಿಣಾಮ ಬೀರಿತು, ಜೊತೆಗೆ ಕಮಲ್‌ರ ವೃತ್ತಿಜೀವನಕ್ಕೆ ತಾತ್ಕಾಲಿಕ ಹಿನ್ನಡೆಯಾಯಿತು.
