ಚೆನ್ನೈ: ಪ್ರಸಿದ್ಧ ನಟ ಮತ್ತು ರಾಜಕಾರಣಿ ಕಮಲ್ ಹಾಸನ್ ಅವರು ಸನಾತನ ಧರ್ಮದ ಬಗ್ಗೆ ನೀಡಿದ ವಿವಾದಾತ್ಮಕ ಹೇಳಿಕೆಗಳಿಗೆ ತೀವ್ರ ಪ್ರತಿಕ್ರಿಯೆ ಬಂದಿದೆ. ಅವರ ಮಾತುಗಳಿಗೆ ಬಹಿಷ್ಕಾರದ ಕರೆಗಳು ಹೆಚ್ಚಾದ ನಂತರ, ಈಗ ಅವರಿಗೆ ಕೊಲೆ ಬೆದರಿಕೆ ಬಂದಿದೆ. ತಮಿಳು ಚಿತ್ರರಂಗದ ಹಿರಿಯ ನಟ ರವಿಚಂದ್ರನ್ ಕೂಡ ಕಮಲ್ ಹಾಸನ್‌ಗೆ ಬೆದರಿಕೆ ಹಾಕಿದ್ದಾರೆ.
ಕಮಲ್ ಹಾಸನ್ ಅವರು ಸೂರ್ಯ ಅವರ ಅಗರಂ ಫೌಂಡೇಶನ್‌ನ 15ನೇ ವರ್ಷದ ಆಚರಣೆಯ ಸಂದರ್ಭದಲ್ಲಿ ಮಾತನಾಡಿದ್ದರು. ಅಲ್ಲಿ ಅವರು NEET (ರಾಷ್ಟ್ರೀಯ ಅರ್ಹತಾ ಮತ್ತು ಪ್ರವೇಶ ಪರೀಕ್ಷೆ) ಬಗ್ಗೆ ಟೀಕಿಸಿದ್ದರು. ಅವರ ಹೇಳಿಕೆ ಪ್ರಕಾರ, “NEET ಪರೀಕ್ಷೆಯು ಎಂಬಿಬಿಎಸ್ ಆಕಾಂಕ್ಷಿಗಳ ಕನಸುಗಳನ್ನು ಪುಡಿಮಾಡಿದೆ. ಇದು ಸನಾತನ ಧರ್ಮದ ಕೆಟ್ಟ ಪರಿಣಾಮ” ಎಂದು ಹೇಳಿದ್ದರು. ಈ ಮಾತುಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ಭಾರೀ ಚರ್ಚೆಗೆ ಕಾರಣವಾಯಿತು.
ಹಿಂದೂ ಸಂಘಟನೆಗಳು ಮತ್ತು ರಾಷ್ಟ್ರವಾದಿಗಳು ಕಮಲ್ ಹಾಸನ್‌ನ ಹೇಳಿಕೆಗಳನ್ನು “ಹಿಂದೂ ವಿರೋಧಿ” ಎಂದು ಖಂಡಿಸಿದ್ದಾರೆ. #BoycottKamalHaasan ಹ್ಯಾಶ್ಟ್ಯಾಗ್ ಸಾಮಾಜಿಕ ಮಾಧ್ಯಮದಲ್ಲಿ ಟ್ರೆಂಡ್ ಆಗಿತ್ತು.
ತಮಿಳು ಚಿತ್ರರಂಗದ ಹಿರಿಯ ನಟ ರವಿಚಂದ್ರನ್ ಯೂಟ್ಯೂಬ್ ಸಂದರ್ಶನವೊಂದರಲ್ಲಿ ಕಮಲ್ ಹಾಸನ್ ಬಗ್ಗೆ ಕಟು ಟೀಕೆ ಮಾಡಿದ್ದಾರೆ. ಅವರು ಕಮಲ್ ಹಾಸನ್ ಅವರನ್ನು “ಮುಗ್ಧ ರಾಜಕಾರಣಿ” ಎಂದು ಕರೆದು, “ಸನಾತನ ಧರ್ಮದ ವಿರುದ್ಧ ಮಾತನಾಡಿದರೆ, ನಿಮ್ಮ ಕತ್ತು ಸೀಳಲೂ ಸಿದ್ಧ!” ಎಂದು ಬೆದರಿಕೆ ಹಾಕಿದ್ದಾರೆ.
ಈ ಬೆದರಿಕೆಯ ಕುರಿತು ಕಮಲ್ ಹಾಸನ್ ಭದ್ರತೆಯ ವಿಷಯದಲ್ಲಿ ಆತಂಕ ವ್ಯಕ್ತಪಡಿಸಿದ್ದು, ಅಭಿಮಾನಿಗಳು ಕೂಡ ಕಳವಳ ವ್ಯಕ್ತಪಡಿಸಿದ್ದಾರೆ. ಇದರಿಂದ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆ ನಡೆಯುತ್ತಿದ್ದು, ರಾಜಕೀಯ ಮತ್ತು ಧಾರ್ಮಿಕ ಹಿನ್ನಲೆಯಲ್ಲಿ ಪ್ರಕರಣ ಗಂಭೀರ ತಿರುವು ಪಡೆಯುವ ಲಕ್ಷಣವಿದೆ.