ಸಿಂಗಲ್ ಸಾಂಗ್ ಹಾಗೂ ಟೀಸರ್‌ನಿಂದ ಎಲ್ಲರ ಕಣ್ಣು ಕುಕ್ಕುವಂತೆ ಮಾಡಿದ್ದ ಎಕ್ಕ ಟೀಂ, ಅದರ ಶೂಟಿಂಗ್ ಮುಗಿಯೋಕೆ ಮೊದಲೇ ಸುಕ್ಕಾ ಸೂರಿ ಜೊತೆ ಕೈ ಜೋಡಿಸಿದೆ. ದಿನದಿಂದ ದಿನಕ್ಕೆ ಯುವರಾಜನ ದುನಿಯಾ ದೊಡ್ಡದಾಗ್ತಿದ್ದು, ಭೀಮ ಬಲ ಕೂಡ ಬಂದಾಗಿದೆ.
ಕೂಡಿ ಬಾಳಿದರೆ ಸ್ವರ್ಗ ಸುಖ ಅಂತಾರಲ್ವಾ ಹಾಗೆ ಒಬ್ಬೊಬ್ಬರೇ ಸಿನಿಮಾ ಮಾಡೋದಕ್ಕಿಂತ ಒಂದೊಳ್ಳೆ ಕಾಂಬಿನೇಷನ್‌ನಲ್ಲಿ ಚಿತ್ರಗಳನ್ನು ಮಾಡಿದ್ರೆ ಹಿತ ಅನಿಸುತ್ತೆ. 90 ವರ್ಷಗಳ ಇತಿಹಾಸವಿರೋ ನಮ್ಮ ಸ್ಯಾಂಡಲ್‌ವುಡ್‌‌‌‌ನಲ್ಲಿ ಇತ್ತೀಚೆಗೆ ಒಳ್ಳೆಯ ಕಾಂಬಿನೇಷನ್‌ಗಳು ಏರ್ಪಡುತ್ತಿವೆ. ಆ ಪೈಕಿ ಪಿಆರ್‌ಕೆ, ಕೆಆರ್‌‌ಜಿ ಹಾಗೂ ಜಯಣ್ಣ ಫಿಲಂಸ್ ಮೂವರೂ ಒಟ್ಟಿಗೆ ಚಿತ್ರ ನಿರ್ಮಾಣಕ್ಕೆ ಕೈ ಹಾಕಿರೋದು ಇಂಟರೆಸ್ಟಿಂಗ್. ಈ ಟ್ರಯೋ ಕಾಂಬೋನ ಚೊಚ್ಚಲ ಚಿತ್ರ ಎಕ್ಕ.
ದೊಡ್ಮನೆಯ ಯುವರಾಜ್ಕುಮಾರ್ ಜೊತೆ ಎಕ್ಕ ಸಿನಿಮಾ ಶುರು ಮಾಡಿದ ಇವರುಗಳು ರೋಹಿತ್ ಪದಕಿ ನಿರ್ದೇಶನದಲ್ಲಿ ಆ ಸಿನಿಮಾನ ಮುಗಿಸೋ ಹಂತಕ್ಕೆ ತಂದಿದ್ದಾರೆ. ಬಹುಶಃ ಇದೇ ಮೇ 10ನೇ ತಾರೀಖಿನ ವೇಳೆಗೆ ಶೂಟಿಂಗ್ ಕಂಪ್ಲೀಟ್ ಮಾಡಿ ಕುಂಬಳಕಾಯಿ ಒಡೆಯಲಿದ್ದಾರೆ. ಸಿಂಗಲ್ ಸಾಂಗ್ ಹಾಗೂ ಟೀಸರ್‌ನಿಂದ ಎಕ್ಕ ಸಖತ್ ಕಿಕ್ಕು ಕೊಡ್ತಿದ್ದು, ಯುವ ಬಳಿಕ ಯುವರಾಜ್ಕುಮಾರ್ 2ನೇ ಸಿನಿಮಾ ಸಖತ್ ಪ್ರಾಮಿಸಿಂಗ್ ಅನಿಸಿದೆ.
ಇದೀಗ ಎಕ್ಕ ಸಿನಿಮಾದ ಚಿತ್ರೀಕರಣ ಮುಗಿಯೋಕೆ ಮೊದಲೇ ಅದೇ ಎಕ್ಕ ಟೀಂ ಸುಕ್ಕಾ ಸೂರಿ ಜೊತೆ ಕೈ ಜೋಡಿಸಿದೆ. ಇನ್ನೂ ಹೆಸರಿಡದ ಪ್ರೊಡಕ್ಷನ್ ನಂ.2 ಸಿನಿಮಾ, ಅಕ್ಷಯ ತೃತೀಯದ ಶುಭ ದಿನದಂದು ಶೇಶಾದ್ರಿಪುರಂನಲ್ಲಿರೋ ಸುಬ್ರಹ್ಮಣ್ಯ ಸ್ವಾಮಿ ಆಲಯದಲ್ಲಿ ಸರಳವಾಗಿ ಸೆಟ್ಟೇರಿದೆ. ಇದು ಯುವರಾಜ್ಕುಮಾರ್ ಮೂರನೇ ಸಿನಿಮಾ ಆಗಲಿದ್ದು, ಒನ್ಸ್ ಅಗೈನ್ KRG, PRK ಹಾಗೂ ಜಯಣ್ಣ ಫಿಲಂಸ್ ಒಟ್ಟಾಗಿ ನಿರ್ಮಾಣ ಮಾಡ್ತಿದೆ.
ಸ್ಯಾಂಡಲ್‌ವುಡ್ ಭೀಮ ಅಂತಲೇ ಫೇಮಸ್ ಆಗಿರೋ ದುನಿಯಾ ವಿಜಯ್ ಸಿನಿಮಾದ ಮೊದಲ ದೃಶ್ಯಕ್ಕೆ ಕ್ಲಾಪ್ ಮಾಡಿ ಶುಭ ಕೋರಿದ್ರೆ, ರಾಜರತ್ನ ಅಪ್ಪು ಮಗಳು ಧೃತಿ ಪುನೀತ್ ರಾಜ್ಕುಮಾರ್ ಕ್ಯಾಮೆರಾ ಚಾಲನೆ ಮಾಡಿದ್ರು. ವಿಶೇಷ ಅಂದ್ರೆ ಯುವಗೆ ಈ ಚಿತ್ರದಲ್ಲಿ ನಾಯಕನಟಿಯಾಗಿ ಬಣ್ಣ ಹಚ್ಚುತ್ತಿರೋದು ದುನಿಯಾ ವಿಜಯ್‌ರ ಹಿರಿಯ ಮಗಳು ರಿತನ್ಯಾ. ಹೌದು.. ಈಗಾಗ್ಲೇ ತಂದೆ ಜೊತೆ ಲ್ಯಾಂಡ್‌‌ಲಾರ್ಡ್‌ ಸಿನಿಮಾದಲ್ಲಿ ಎರಡನೇ ಲೀಡ್‌‌ನಲ್ಲಿ ಬಣ್ಣ ಹಚ್ಚಿರೋ ರಿತನ್ಯಾ, ಇದೀಗ ಯುವ-ಸೂರಿ ಕಾಂಬೋ ಚಿತ್ರದ ಮೂಲಕ ಎರಡನೇ ವೆಂಚರ್‌ ಶುಭಾರಂಭ ಮಾಡಿದ್ದಾರೆ.
ಟಗರು ಬ್ಲಾಕ್ ಬಸ್ಟರ್ ಹಿಟ್ ಬಳಿಕ ಬ್ಯಾಡ್ ಮ್ಯಾನರ್ಸ್‌ ಸಿನಿಮಾ ಮಾಡಿದ ರಾ ಫಿಲ್ಮ್ ಮೇಕರ್ ಸೂರಿ, ಸುಕ್ಕಾ ಸೂರಿ ಅಂತಲೇ ಫೇಮಸ್. ಅವ್ರ ಮೇಕಿಂಗ್‌ ಸ್ಟೈಲ್‌‌ಗೆ ಫಿದಾ ಆಗದವರೇ ಇಲ್ಲ. ಇದೀಗ ಸೂರಿ ಸಿನಿದುನಿಯಾದಲ್ಲಿ ಯುವ-ರಿತನ್ಯಾ ಪಯಣಿಸಲಿದ್ದು, ಈ ಸಿನಿಮಾ ಮೇಲೆ ಎಲ್ಲಿಲ್ಲದ ಕುತೂಹಲ ಮೂಡಿದೆ.
ಅಂದಹಾಗೆ ದುನಿಯಾ ವಿಜಯ್ ಅವರೇ ನಿರ್ದೇಶಿಸುತ್ತಿರೋ ಸಿಟಿ ಲೈಟ್ಸ್ ಸಿನಿಮಾದಲ್ಲಿ ಸ್ಯಾಂಡಲ್‌ವುಡ್ ಸಲಗ ವಿಜಯ್ ಅವರ ಕಿರಿ ಮಗಳು ಮೋನಿಷಾ ನಾಯಕಿಯಾಗಿ ನಟಿಸುತ್ತಿದ್ದು, ವಿನಯ್ ರಾಜ್ಕುಮಾರ್ ನಾಯಕನಟನಾಗಿದ್ದಾರೆ. ಅಲ್ಲಿಗೆ ದುನಿಯಾ ವಿಜಯ್ ಇಬ್ಬರೂ ಮಕ್ಕಳು ದೊಡ್ಮನೆ ಯಂಗ್‌ಸ್ಟರ್ಸ್‌ ಜೊತೆ ಕಮಾಲ್ ಮಾಡ್ತಿದ್ದು, ಇದೊಂದು ಒಳ್ಳೆಯ ಬೆಳವಣಿಗೆಯಾಗಿ ಕಾಣ್ತಿದೆ. ಈ ರೀತಿಯ ಕಾಂಬಿನೇಷನ್‌ಗಳು ಮತ್ತಷ್ಟು, ಮಗದಷ್ಟು ಮರುಕಳಿಸಿದ್ರೆ ಇಂಡಸ್ಟ್ರಿಗೆ ಒಳಿತಾಗಲಿದೆ.