ಬೆಂಗಳೂರು: ಜಗತ್ತಿನ ಯಾವುದಾದರೂ ಮೂಲೆಯಲ್ಲಿ ಯುದ್ಧದ ಕಾರ್ಮೋಡ ಕವಿದರೆ ಸಾಕು, ಹೂಡಿಕೆದಾರರು ಸುರಕ್ಷಿತ ಹೂಡಿಕೆಯೆಂದು ಭಾವಿಸಿ ಚಿನ್ನದ ಮೊರೆ ಹೋಗುತ್ತಾರೆ. ಇದರಿಂದ ಚಿನ್ನದ ಬೆಲೆ ರಾಕೆಟ್ ವೇಗದಲ್ಲಿ ಏರುತ್ತದೆ. ಆದರೆ, ಪ್ರಸ್ತುತ ನಡೆಯುತ್ತಿರುವ ಇರಾನ್ ಸಂಘರ್ಷವು ಈ 40 ವರ್ಷಗಳ ಇತಿಹಾಸವನ್ನೇ ತಿರುಗಿಬರೆದಿದೆ. ಯುದ್ಧ ತೀವ್ರಗೊಳ್ಳುತ್ತಿದ್ದರೂ ಚಿನ್ನ ಮತ್ತು ಬೆಳ್ಳಿಯ ಬೆಲೆಗಳು ಅನಿರೀಕ್ಷಿತವಾಗಿ ಕುಸಿಯುತ್ತಿರುವುದು ಹೂಡಿಕೆದಾರರಲ್ಲಿ ಅಚ್ಚರಿ ಮೂಡಿಸಿದೆ.
ಇರಾನ್ ಸಂಘರ್ಷ ಆರಂಭವಾಗಿ ಸುಮಾರು ನಾಲ್ಕು ವಾರಗಳಾಗುತ್ತ ಬಂದಿವೆ. ಸಾಮಾನ್ಯ ಲೆಕ್ಕಾಚಾರದ ಪ್ರಕಾರ ಈ ವೇಳೆಗೆ ಚಿನ್ನದ ಬೆಲೆ ಗಗನಕ್ಕೇರಬೇಕಿತ್ತು. ಆದರೆ ಕಳೆದ 25 ದಿನಗಳಲ್ಲಿ ಚಿನ್ನದ ಬೆಲೆ ಪ್ರತಿ 10 ಗ್ರಾಂಗೆ ಸುಮಾರು 2,500 ರಿಂದ 3,000 ರೂ. ಇಳಿಕೆಯಾಗಿದೆ. ಬೆಳ್ಳಿಯ ಸ್ಥಿತಿಯಂತೂ ಇನ್ನೂ ಶೋಚನೀಯವಾಗಿದ್ದು, ಕೆಜಿಗೆ ಸುಮಾರು 60,000 ರೂ. ವರೆಗೆ ಭಾರಿ ಕುಸಿತ ಕಂಡಿದೆ. ಇದು 1983ರ ನಂತರ ದಾಖಲಾದ ಅತಿದೊಡ್ಡ ವಾರದ ಕುಸಿತವೆಂದು ಮಾರುಕಟ್ಟೆ ತಜ್ಞರು ವಿಶ್ಲೇಷಿಸುತ್ತಿದ್ದಾರೆ.
ಹಿಂದಿನ ಯುದ್ಧಗಳು ಮತ್ತು ಚಿನ್ನದ ನಂಟು
-
ವಿಯೆಟ್ನಾಂ ಯುದ್ಧ: ಈ ಸಮಯದಲ್ಲಿ ಚಿನ್ನದ ಬೆಲೆ ಸುಮಾರು 5 ಪಟ್ಟು ಹೆಚ್ಚಾಗಿತ್ತು.
-
ರಷ್ಯಾ-ಉಕ್ರೇನ್ ಯುದ್ಧ: ಯುದ್ಧ ಆರಂಭವಾದ ಬೆನ್ನಲ್ಲೇ ಬೆಲೆ 15% ರಷ್ಟು ಜಿಗಿದಿತ್ತು.
-
ಇಸ್ರೇಲ್-ಹಮಾಸ್ ಸಂಘರ್ಷ: 10 ಗ್ರಾಂ ಚಿನ್ನದ ಬೆಲೆ 58 ಸಾವಿರದಿಂದ 75 ಸಾವಿರದ ಗಡಿ ದಾಟಿತ್ತು. ಆದರೆ ಈ ಬಾರಿ ಇರಾನ್ ಯುದ್ಧದ ಸಮಯದಲ್ಲಿ ಮಾತ್ರ ಬೆಲೆ ಇಳಿಕೆಯ ಹಾದಿ ಹಿಡಿದಿದೆ.
ಬೆಲೆ ಇಳಿಕೆಗೆ ಕಾರಣವಾದ 4 ಪ್ರಮುಖ ಅಂಶಗಳು
-
ಬಲಗೊಂಡ ಅಮೆರಿಕನ್ ಡಾಲರ್: ಪ್ರಸ್ತುತ ಹೂಡಿಕೆದಾರರು ಚಿನ್ನಕ್ಕಿಂತಲೂ ಅಮೆರಿಕನ್ ಡಾಲರ್ ಮೇಲೆ ಹೆಚ್ಚು ನಂಬಿಕೆ ಇಟ್ಟಿದ್ದಾರೆ. ಡಾಲರ್ ಸೂಚ್ಯಂಕ ಬಲಗೊಳ್ಳುತ್ತಿರುವುದರಿಂದ ಜಾಗತಿಕ ಹೂಡಿಕೆ ಡಾಲರ್ನತ್ತ ಹರಿಯುತ್ತಿದೆ.
-
ಅಮೆರಿಕದ ಫೆಡರಲ್ ರಿಸರ್ವ್ ನಿಲುವು: ಕಚ್ಚಾ ತೈಲ ಬೆಲೆ ಏರಿಕೆಯಿಂದ ಹಣದುಬ್ಬರ ಹೆಚ್ಚಾಗಬಹುದು ಎಂಬ ಭೀತಿಯಿಂದ ಅಮೆರಿಕ ತನ್ನ ಬಡ್ಡಿದರವನ್ನು ಇಳಿಸಲು ನಿರಾಕರಿಸಿದೆ. ಹೂಡಿಕೆದಾರರು ಶೂನ್ಯ ಬಡ್ಡಿ ನೀಡುವ ಚಿನ್ನಕ್ಕಿಂತ, ಹೆಚ್ಚಿನ ಲಾಭ ನೀಡುವ ಅಮೆರಿಕದ ಸರ್ಕಾರಿ ಬಾಂಡ್ಗಳತ್ತ ಆಕರ್ಷಿತರಾಗುತ್ತಿದ್ದಾರೆ.
-
ನಗದು ಲಭ್ಯತೆ (Liquidity): ಮಾರುಕಟ್ಟೆಯಲ್ಲಿ ಅಸ್ಥಿರತೆ ಉಂಟಾದಾಗ ಹೂಡಿಕೆದಾರರು ಇತರ ಕ್ಷೇತ್ರಗಳಲ್ಲಿ ಉಂಟಾದ ನಷ್ಟವನ್ನು ಸರಿದೂಗಿಸಲು ತಮ್ಮ ಬಳಿಯಿರುವ ಚಿನ್ನವನ್ನು ಮಾರಿ ನಗದು ಮಾಡಿಕೊಳ್ಳುತ್ತಿದ್ದಾರೆ.
-
ಪ್ರಾಫಿಟ್ ಬುಕ್ಕಿಂಗ್: ಕಳೆದ ವರ್ಷ ಚಿನ್ನವು ದಾಖಲೆ ಮಟ್ಟದ ಲಾಭ ನೀಡಿತ್ತು. ಈಗ ಬೆಲೆ ಇಳಿಯುವ ಮುನ್ಸೂಚನೆ ಸಿಗುತ್ತಿದ್ದಂತೆ ದೊಡ್ಡ ಹೂಡಿಕೆದಾರರು ತಮ್ಮ ಪಾಲಿನ ಚಿನ್ನವನ್ನು ಮಾರಿ ಲಾಭವನ್ನು ನಗದೀಕರಿಸುತ್ತಿದ್ದಾರೆ (Profit Booking).
ಮುಂದಿನ ದಿನಗಳಲ್ಲಿ ಏನಾಗಬಹುದು ?
ತಜ್ಞರ ಅಂದಾಜಿನ ಪ್ರಕಾರ, ಬೆಲೆ ಇಳಿಕೆಯ ಹಾದಿ ಹೀಗೆಯೇ ಮುಂದುವರಿದರೆ 10 ಗ್ರಾಂ ಚಿನ್ನದ ಬೆಲೆ ಒಂದು ಲಕ್ಷದ ಗಡಿಯಿಂದ ಸಾಕಷ್ಟು ಕೆಳಗೆ ತಲುಪಬಹುದು. ಆದರೆ, ಇದು ತಾತ್ಕಾಲಿಕ ವಿದ್ಯಮಾನ ಎಂಬ ಅಭಿಪ್ರಾಯವೂ ಇದೆ.