ಮುಂಬೈ (ಏಪ್ರಿಲ್ 15, 2026): ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಯುಪಿಐ ವಹಿವಾಟುಗಳಿಗೆ ಸಂಬಂಧಿಸಿದಂತೆ ಮಹತ್ವದ ಬದಲಾವಣೆಯನ್ನು ತರಲು ಸಜ್ಜಾಗಿದೆ. ಇಲ್ಲಿಯವರೆಗೆ ಸೆಕೆಂಡುಗಳಲ್ಲಿ ನಡೆಯುತ್ತಿದ್ದ ಯುಪಿಐ ಹಣ ವರ್ಗಾವಣೆ ಈಗ 10,000 ರೂಪಾಯಿಗಳಿಗಿಂತ ಹೆಚ್ಚಿನ ಮೊತ್ತಕ್ಕೆ 1 ಗಂಟೆಯ ಕೂಲಿಂಗ್ ಪೀರಿಡ್ (Cooling Period) ಗೆ ಒಳಪಡಲಿದೆ. ಅಂದರೆ, ನೀವು ಮೊದಲ ಬಾರಿಗೆ ಯಾರಿಗಾದರೂ ₹10,000 ಕ್ಕಿಂತ ಹೆಚ್ಚು ಹಣ ಕಳುಹಿಸಿದರೆ, ಆ ವಹಿವಾಟನ್ನು ಒಂದು ಗಂಟೆಯ ಕಾಲ ತಡೆಹಿಡಿಯಲಾಗುತ್ತದೆ. ಆ ಸಮಯ ಮುಗಿದ ನಂತರವೇ ಹಣವು ಸ್ವೀಕೃತಿದಾರರ ಖಾತೆಗೆ ಜಮೆಯಾಗುತ್ತದೆ.
ಏಕೆ ಈ ಕ್ರಮ?
UPI ಮೂಲಕ ದಿನೇ ದಿನೇ ಹೆಚ್ಚುತ್ತಿರುವ ಸೈಬರ್ ವಂಚನೆಗಳನ್ನು ತಡೆಗಟ್ಟುವುದೇ ಈ ಕಠಿಣ ನಿಯಮದ ಉದ್ದೇಶವಾಗಿದೆ. ಅನೇಕ ಸಂದರ್ಭಗಳಲ್ಲಿ, ಬಳಕೆದಾರರು ಮೋಸದ ಕೊಂಡಿಗಳಿಗೆ ಕ್ಲಿಕ್ ಮಾಡಿ ಅಥವಾ ವಂಚಕರ ಮಾತು ಕೇಳಿ ಅಪರಿಚಿತರಿಗೆ ಹಣ ಕಳುಹಿಸಿಕೊಡುತ್ತಾರೆ. ಈ ನಿಯಮದಿಂದ, ವಹಿವಾಟು ನಡೆಸಿದ ಒಂದು ಗಂಟೆಯೊಳಗಾಗಿ ಬಳಕೆದಾರರು ತಪ್ಪು ಎಂದು ಅರಿತು ಬ್ಯಾಂಕ್ಗೆ ದೂರು ನೀಡಲು ಸಾಧ್ಯವಾಗುತ್ತದೆ.
ಎಲ್ಲರಿಗೂ ಅನ್ವಯಿಸುತ್ತದೆಯೇ? – ವಿನಾಯಿತಿಗಳು: RBI ಈ ನಿಯಮಕ್ಕೆ ಕೆಲವು ಪ್ರಮುಖ ವಿನಾಯಿತಿಗಳನ್ನು ನೀಡಿದೆ.
-
ಹೊಸ ಪಾವತಿದಾರರಿಗೆ ಮಾತ್ರ: ನೀವು ಮೊದಲ ಬಾರಿಗೆ ಯಾರಿಗಾದರೂ ಹಣ ಕಳುಹಿಸುತ್ತಿದ್ದರೆ ಮಾತ್ರ ಈ ಒಂದು ಗಂಟೆಯ ಕಾಯುವಿಕೆ ಅನ್ವಯಿಸುತ್ತದೆ. ನೀವು ಹಿಂದೆ ಹಣ ಕಳುಹಿಸಿರುವ ವ್ಯಕ್ತಿಗಳಿಗೆ ಯಾವುದೇ ವಿಳಂಬವಿರುವುದಿಲ್ಲ.
-
ನೋಂದಾಯಿತ ವ್ಯಾಪಾರಿಗಳು: ಮಾನ್ಯತೆ ಪಡೆದ ಅಂಗಡಿಗಳು, ಇ-ಕಾಮರ್ಸ್ ಸೈಟ್ಗಳು ಮತ್ತು ಇತರ ವ್ಯಾಪಾರಿಗಳಿಗೆ ಪಾವತಿ ಮಾಡುವಾಗ ಈ ನಿಯಮ ಅನ್ವಯಿಸುವುದಿಲ್ಲ.
-
ವೈಟ್ ಲಿಸ್ಟ್ ಸೌಲಭ್ಯ: ಬಳಕೆದಾರರು ತಮ್ಮ ಕುಟುಂಬ, ಆಪ್ತರು, ನಂಬಿಕಸ್ಥ ಸ್ನೇಹಿತರು ಮತ್ತು ನಿಯಮಿತ ವ್ಯವಹಾರ ಪಾಲುದಾರರನ್ನು ‘ವೈಟ್ ಲಿಸ್ಟ್’ ನಲ್ಲಿ ಸೇರಿಸಬಹುದು. ಅವರಿಗೆ ಹಣ ಕಳುಹಿಸಲು ಯಾವುದೇ ನಿರ್ಬಂಧವಿರುವುದಿಲ್ಲ.
ಹಣಕಾಸು ವಲಯದ ಆಕ್ಷೇಪ
RBIನ ಈ ನಿರ್ಧಾರವು ಬ್ಯಾಂಕುಗಳು ಮತ್ತು ಫಿನ್ಟೆಕ್ ಕಂಪನಿಗಳಲ್ಲಿ ಆತಂಕ ಸೃಷ್ಟಿಸಿದೆ. ಯುಪಿಐನ ಮುಖ್ಯ ಆಕರ್ಷಣೆಯೇ ಅದರ ರಿಯಲ್-ಟೈಮ್ ವೇಗ. ಒಂದು ಗಂಟೆ ತಡೆಯುವುದರಿಂದ ಡಿಜಿಟಲ್ ಪಾವತಿ ವ್ಯವಸ್ಥೆಯ ಮೂಲ ಉದ್ದೇಶವೇ ಹಾಳಾಗುತ್ತದೆ ಎಂದು ಅವರು ವಾದಿಸುತ್ತಿದ್ದಾರೆ. “ರೋಗಕ್ಕಿಂತ ಚಿಕಿತ್ಸೆಯೇ ಭಯಾನಕವಾಗಿದೆ” ಎಂಬ ಮಾತಿಗೆ ಈ ನಿಯಮ ಹೋಲಿಸಲಾಗುತ್ತಿದೆ.
ಜನರ ಮೇಲಾಗುವ ಪರಿಣಾಮ
NEFT ಅಥವಾ IMPS ನಂತಹ ವಿಧಾನಗಳಿಗೆ ಖಾತೆ ಸಂಖ್ಯೆ ಮತ್ತು IFSC ಕೋಡ್ ಅಗತ್ಯವಿರುತ್ತದೆ. ಯುಪಿಐ ಈ ತೊಡಕನ್ನು ನಿವಾರಿಸಿತ್ತು. ಆದರೆ ಈ ಹೊಸ ನಿಯಮದಿಂದ ಸಾಮಾನ್ಯ ಜನರು ಡಿಜಿಟಲ್ ಪಾವತಿಯಿಂದ ದೂರವಾಗಿ ಮತ್ತೆ ನಗದು ಬಳಕೆಗೆ ಮುಖ ಮಾಡಬಹುದು ಎಂಬ ಆತಂಕವಿದೆ. ತುರ್ತು ಸಂದರ್ಭಗಳಲ್ಲಿ (ಉದಾ: ಆಸ್ಪತ್ರೆ ಬಿಲ್ ಪಾವತಿ, ತುರ್ತು ಸಹಾಯ) ಒಂದು ಗಂಟೆ ಕಾಯುವುದು ಅಸಾಧ್ಯವಾಗಬಹುದು.