ಬೆಂಗಳೂರು: ಈಗಾಗಲೇ ಗ್ಯಾಸ್ ಸಿಲಿಂಡರ್ ಬೆಲೆ ಮತ್ತು ರಸ್ತೆ ಟೋಲ್ ದರಗಳ ಏರಿಕೆಯಿಂದ ಕಂಗೆಟ್ಟಿದ್ದ ಜನರಿಗೆ ಈಗ ಸಿಮೆಂಟ್ ಕಂಪನಿಗಳು ಶಾಕಿಂಗ್ ನ್ಯೂಸ್ ನೀಡಿವೆ. ದೇಶಾದ್ಯಂತ ಎಲ್ಲಾ ಪ್ರಮುಖ ಬ್ರಾಂಡ್ಗಳ ಸಿಮೆಂಟ್ ದರದಲ್ಲಿ ನಾಳೆಯಿಂದ ಭಾರೀ ಏರಿಕೆಯಾಗಲಿದ್ದು, ರಿಯಲ್ ಎಸ್ಟೇಟ್ ವಲಯಕ್ಕೂ ಇದು ದೊಡ್ಡ ಆಘಾತ ನೀಡಿದೆ.
ನಾಳೆಯಿಂದ ಹೊಸ ದರ ಅನ್ವಯ
ಸಿಮೆಂಟ್ ಕಂಪನಿಗಳ ಮೂಲಗಳ ಪ್ರಕಾರ, ಇಂದು (ಮಂಗಳವಾರ) ಬುಕ್ಕಿಂಗ್ ಆಗುವ ಸಿಮೆಂಟ್ ಮೂಟೆಗಳಿಗೆ ಹಳೆಯ ದರವೇ ಅನ್ವಯವಾಗಲಿದೆ. ಆದರೆ, ನಾಳೆಯಿಂದ (ಬುಧವಾರ) ಬುಕ್ಕಿಂಗ್ ಮಾಡುವ ಗ್ರಾಹಕರಿಗೆ ಪರಿಷ್ಕೃತ ದರ ಅನ್ವಯವಾಗಲಿದೆ. ಪ್ರತಿ ಮೂಟೆಗೆ ಕನಿಷ್ಠ 30 ರಿಂದ 50 ರೂಪಾಯಿಗಳಷ್ಟು ಏರಿಕೆಯಾಗುವ ಸಾಧ್ಯತೆಯಿದೆ. ಈ ದಿಢೀರ್ ಏರಿಕೆಯಿಂದಾಗಿ ನಿರ್ಮಾಣ ಹಂತದಲ್ಲಿರುವ ಮನೆಗಳ ಬಜೆಟ್ ಸಂಪೂರ್ಣವಾಗಿ ಏರುಪೇರಾಗಲಿದೆ.
ಏರಿಕೆಗೆ ಅಸಲಿ ಕಾರಣವೇನು ?
ಸಿಮೆಂಟ್ ದರ ಏರಿಕೆಗೆ ಮುಖ್ಯವಾಗಿ ಸಾಗಣೆ ವೆಚ್ಚ (Transportation Cost) ಹೆಚ್ಚಾಗಿರುವುದು ಕಾರಣ ಎನ್ನಲಾಗುತ್ತಿದೆ. ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳಲ್ಲಿನ ಸ್ಥಿರತೆಯ ಕೊರತೆ ಮತ್ತು ಕಚ್ಚಾ ವಸ್ತುಗಳ ಸಾಗಣೆಗೆ ತಗಲುವ ವೆಚ್ಚ ಹೆಚ್ಚಾಗಿರುವುದರಿಂದ ಕಂಪನಿಗಳು ಈ ಹೊರೆಯನ್ನು ಗ್ರಾಹಕರ ಮೇಲೆ ಹಾಕುತ್ತಿವೆ. ಕೆಲವು ಪ್ರೀಮಿಯಂ ಬ್ರಾಂಡ್ಗಳ ಸಿಮೆಂಟ್ ದರವು ಪ್ರತಿ ಮೂಟೆಗೆ 360 ರೂಪಾಯಿಗಳ ಗಡಿ ದಾಟುವ ಮುನ್ಸೂಚನೆ ಸಿಕ್ಕಿದೆ.
ಕಳೆದ ಕೆಲವು ತಿಂಗಳುಗಳಿಂದ ಮರಳು, ಸ್ಟೀಲ್ (ಕಬ್ಬಿಣ) ಮತ್ತು ಜಲ್ಲಿ ಕಲ್ಲುಗಳ ದರದಲ್ಲಿ ಸತತ ಏರಿಕೆಯಾಗುತ್ತಲೇ ಇದೆ. ಇದರ ಬೆನ್ನಲ್ಲೇ ಈಗ ಸಿಮೆಂಟ್ ದರವೂ ಏರಿಕೆಯಾಗಿರುವುದು ಗುತ್ತಿಗೆದಾರರು ಮತ್ತು ರಿಯಲ್ ಎಸ್ಟೇಟ್ ಉದ್ಯಮಿಗಳಿಗೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ. ಅಪಾರ್ಟ್ಮೆಂಟ್ ಮತ್ತು ವಾಣಿಜ್ಯ ಸಂಕೀರ್ಣಗಳ ನಿರ್ಮಾಣ ವೆಚ್ಚ ಹೆಚ್ಚಾಗುವುದರಿಂದ, ಮುಂದಿನ ದಿನಗಳಲ್ಲಿ ಫ್ಲಾಟ್ಗಳ ಬೆಲೆಯೂ ಏರಿಕೆಯಾಗುವ ಸಾಧ್ಯತೆ ಇದೆ.
ಈಗಾಗಲೇ ಬಹಳಷ್ಟು ಜನ ಮುಂದಾಗಿರುತ್ತಾರೆ, ಆದರೆ ಸಿಮೆಂಟ್ನಂತಹ ಮೂಲಭೂತ ವಸ್ತುವಿನ ಬೆಲೆ ಏರಿಕೆಯಾದಾಗ, ಮನೆ ನಿರ್ಮಾಣದ ಒಟ್ಟು ವೆಚ್ಚವು ಲಕ್ಷಾಂತರ ರೂಪಾಯಿಗಳಷ್ಟು ಹೆಚ್ಚಾಗುತ್ತದೆ. ಈಗಾಗಲೇ ಅಗತ್ಯ ವಸ್ತುಗಳ ಬೆಲೆ ಏರಿಕೆಯಿಂದ ತತ್ತರಿಸಿರುವ ಜನರಿಗೆ, ಸಿಮೆಂಟ್ ಕಂಪನಿಗಳ ಈ ನಿರ್ಧಾರ ಗಾಯದ ಮೇಲೆ ಬರೆ ಎಳೆದಂತಾಗಿದೆ