ಗುಜರಾತ್‌ನ ಅಹಮದಾಬಾದ್‌ನ ಸರ್ದಾರ್ ವಲ್ಲಭಭಾಯಿ ಪಟೇಲ್ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಲಂಡನ್‌ನ ಗ್ಯಾಟ್ವಿಕ್‌ಗೆ ತೆರಳುತ್ತಿದ್ದ ಏರ್ ಇಂಡಿಯಾದ ವಿಮಾನ AI171, ಬೋಯಿಂಗ್ 787-8 ಡ್ರೀಮ್‌ಲೈನರ್, ಇಂದು (ಜೂನ್ 12) ಟೇಕ್‌ಆಫ್ ಆದ ಕೆಲವೇ ಕ್ಷಣಗಳಲ್ಲಿ ಪತನಗೊಂಡಿದೆ. ವಿಮಾನದಲ್ಲಿ 242 ಜನರಿದ್ದರು, ಇವರಲ್ಲಿ 169 ಭಾರತೀಯರು, 53 ಬ್ರಿಟಿಷ್ ನಾಗರಿಕರು, ಒಬ್ಬ ಕೆನಡಾ ಪ್ರಜೆ, ಮತ್ತು ಏಳು ಪೋರ್ಚುಗೀಸ್ ನಾಗರಿಕರು ಸೇರಿದ್ದರು. ಈ ದುರಂತವು ವಿಮಾನ ನಿಲ್ದಾಣದ ಸಮೀಪದ ಮೇಘನಿ ನಗರದ ಜನನಿಬಿಡ ಪ್ರದೇಶದಲ್ಲಿ ಸಂಭವಿಸಿದ್ದು, ಇದು ಬೋಯಿಂಗ್ 787 ಡ್ರೀಮ್‌ಲೈನರ್‌ನ ಮೊದಲ ದಾಖಲಿತ ಅಪಘಾತವಾಗಿದೆ.
ಬೋಯಿಂಗ್ 787 ಡ್ರೀಮ್‌ಲೈನರ್‌ನ ಬೆಲೆ ಎಷ್ಟು?
ಬೋಯಿಂಗ್ 787-8 ಡ್ರೀಮ್‌ಲೈನರ್‌ನ ಸರಾಸರಿ ಬೆಲೆ ಸುಮಾರು 224 ರಿಂದ 248 ಮಿಲಿಯನ್ ಯುಎಸ್ ಡಾಲರ್ (ಅಂದಾಜು 1860 ರಿಂದ 2060 ಕೋಟಿ ರೂಪಾಯಿ) ಆಗಿದೆ, ಆದರೆ ಇದು ಕಾನ್ಫಿಗರೇಶನ್, ಆರ್ಡರ್ ಸಮಯ, ಮತ್ತು ಗ್ರಾಹಕರೊಂದಿಗಿನ ಒಪ್ಪಂದಗಳನ್ನು ಅವಲಂಬಿಸಿರುತ್ತದೆ. ಏರ್ ಇಂಡಿಯಾದ ಈ ವಿಮಾನಗಳು 2012 ರಿಂದ ಸೇವೆಯಲ್ಲಿದ್ದು, ಇವುಗಳ ಸರಾಸರಿ ವಯಸ್ಸು 12-13 ವರ್ಷಗಳಾಗಿವೆ. ಹೊಸ ವಿಮಾನದ ಬೆಲೆಗಿಂತ ಈ ಬಳಕೆಯಾದ ವಿಮಾನಗಳ ಮೌಲ್ಯ ಕಡಿಮೆಯಿರಬಹುದು, ಆದರೆ ಇದು ಏರ್ ಇಂಡಿಯಾದ ಫ್ಲೀಟ್‌ನ ಪ್ರಮುಖ ಆಸ್ತಿಯಾಗಿದೆ.
ವಿಮಾನದ ವಿಶೇಷತೆಗಳುಗಳೇನು?
ಏರ್ ಇಂಡಿಯಾದ ಬೋಯಿಂಗ್ 787-8 ಡ್ರೀಮ್‌ಲೈನರ್ ತನ್ನ ಆಧುನಿಕ ತಂತ್ರಜ್ಞಾನ ಮತ್ತು ಪ್ರಯಾಣಿಕರ ಸೌಕರ್ಯಕ್ಕೆ ಹೆಸರುವಾಸಿಯಾಗಿದೆ. ಈ ವಿಮಾನದ ಕೆಲವು ಪ್ರಮುಖ ಲಕ್ಷಣಗಳು:
- ಆಸನ ಸಂರಚನೆ: 18 ಬಿಸಿನೆಸ್ ಕ್ಲಾಸ್ ಆಸನಗಳು (ಫ್ಲಾಟ್-ಬೆಡ್ ಸೀಟುಗಳು, ವಿಶೇಷ ಚೆಕ್-ಇನ್, ಲೌಂಜ್ ಪ್ರವೇಶ) ಮತ್ತು 238 ಎಕಾನಮಿ ಕ್ಲಾಸ್ ಆಸನಗಳು (ಉತ್ತಮ ತಾಪಮಾನ ನಿಯಂತ್ರಣ, ವಿಭಿನ್ನ ಆಹಾರ ಆಯ್ಕೆಗಳು, ಉಚಿತ ಪಾನೀಯಗಳು).
- ಇಂಧನ ದಕ್ಷತೆ: ಇದೇ ಗಾತ್ರದ ಇತರ ವಿಮಾನಗಳಿಗಿಂತ 20% ಹೆಚ್ಚು ಇಂಧನ ದಕ್ಷತೆ.
- ಮನರಂಜನೆ ಮತ್ತು ಸೌಕರ್ಯ: ಆಧುನಿಕ ಮನರಂಜನಾ ವ್ಯವಸ್ಥೆ, ಹೆಚ್ಚಿನ ಸ್ಥಳಾವಕಾಶದ ಆಸನಗಳು, ಮತ್ತು ಸುಧಾರಿತ ಕ್ಯಾಬಿನ್ ಒತ್ತಡ ವ್ಯವಸ್ಥೆಯಿಂದ ದೀರ್ಘ ಪ್ರಯಾಣದಲ್ಲಿ ಆರಾಮದಾಯಕ ಅನುಭವ.
- ತಂತ್ರಜ್ಞಾನ: ಸುಧಾರಿತ ಏರೋಡೈನಾಮಿಕ್ಸ್ ಮತ್ತು ಕಾರ್ಬನ್ ಫೈಬರ್ ಕಾಂಪೋಸಿಟ್‌ಗಳ ಬಳಕೆಯಿಂದ ತೂಕ ಕಡಿಮೆ ಮತ್ತು ದಕ್ಷತೆ ಹೆಚ್ಚು.
ಏರ್ ಇಂಡಿಯಾದ ಡ್ರೀಮ್‌ಲೈನರ್ ಫ್ಲೀಟ್
ಏರ್ ಇಂಡಿಯಾ ತನ್ನ ಮೊದಲ ಬೋಯಿಂಗ್ 787-8 ಡ್ರೀಮ್‌ಲೈನರ್ ಅನ್ನು ಸೆಪ್ಟೆಂಬರ್ 2012 ರಲ್ಲಿ ಸ್ವೀಕರಿಸಿತು ಮತ್ತು 2017 ರಲ್ಲಿ ಒಟ್ಟು 27 ವಿಮಾನಗಳನ್ನು ಪೂರ್ಣಗೊಳಿಸಿತು. ಈ ವಿಮಾನಗಳನ್ನು ಅಂತರರಾಷ್ಟ್ರೀಯ ದೀರ್ಘ-ಪ್ರಯಾಣದ ಮಾರ್ಗಗಳಾದ ಲಂಡನ್, ಸಿಂಗಾಪುರ್, ಮತ್ತು ಸಿಡ್ನಿಗೆ ಬಳಸಲಾಗುತ್ತದೆ. ಇದರ ಜೊತೆಗೆ, ಏರ್ ಇಂಡಿಯಾ 787-9 ಮಾದರಿಗೆ ಆರ್ಡರ್ ನೀಡಿದ್ದು, 2025 ರ ಅಂತ್ಯದ ವೇಳೆಗೆ ಈ ಹೊಸ ವಿಮಾನಗಳು ಫ್ಲೀಟ್‌ಗೆ ಸೇರಲಿವೆ.
ಅಪಘಾತದ ಪರಿಣಾಮ
ಈ ಅಪಘಾತವು ವಿಮಾನಯಾನ ಉದ್ಯಮದಲ್ಲಿ ಆಘಾತವನ್ನುಂಟುಮಾಡಿದ್ದು, ಬೋಯಿಂಗ್‌ನ ಷೇರುಗಳು ಶೇಕಡಾ 8 ರಷ್ಟು ಕುಸಿದಿವೆ. ಅಹಮದಾಬಾದ್ ವಿಮಾನ ನಿಲ್ದಾಣವನ್ನು ತಾತ್ಕಾಲಿಕವಾಗಿ ಬಂದ್ ಮಾಡಲಾಗಿದ್ದು, ರಕ್ಷಣಾ ಕಾರ್ಯಾಚರಣೆಗಳು ನಡೆಯುತ್ತಿವೆ. ಏರ್ ಇಂಡಿಯಾ 1800 5691 444 ಎಂಬ ಹೆಲ್ಪ್‌ಲೈನ್ ಸಂಖ್ಯೆಯನ್ನು ಪ್ರಕಟಿಸಿದ್ದು, ಪ್ರಯಾಣಿಕರ ಕುಟುಂಬಗಳಿಗೆ ಮಾಹಿತಿ ಒದಗಿಸುತ್ತಿದೆ. ಭಾರತ ಸರ್ಕಾರ ಮತ್ತು ಬೋಯಿಂಗ್ ತಂಡಗಳು ತನಿಖೆಯನ್ನು ಆರಂಭಿಸಿವೆ.