ಬೆಂಗಳೂರು: ದಶಕಗಳ ಕಾಲ ಸ್ಮಾರ್ಟ್ಫೋನ್ ಜಗತ್ತನ್ನು ಆಳಿದ ಟೆಕ್ ದೈತ್ಯ ಕಂಪನಿ ಗೂಗಲ್, ಇತ್ತೀಚೆಗೆ ಪಿಸಿ ಮಾರುಕಟ್ಟೆಯತ್ತ ತನ್ನ ಗಮನ ಹರಿಸಿದೆ. ಕಂಪನಿಯು ತನ್ನದೇ ಆದ ಆಂಡ್ರಾಯ್ಡ್ ಆಪರೇಟಿಂಗ್ ಸಿಸ್ಟಮ್ ಅನ್ನು ಚಲಾಯಿಸುವ ಲ್ಯಾಪ್ಟಾಪ್ಗಳು ಮತ್ತು ಡೆಸ್ಕ್ಟಾಪ್ ಪಿಸಿಗಳನ್ನು ಮಾರುಕಟ್ಟೆಗೆ ತರಲು ಮುಂದಾಗಿದೆಯೆಂದು ತಿಳಿದುಬಂದಿದೆ. ಗೂಗಲ್ನ ಸಾಧನಗಳು ಮತ್ತು ಸೇವೆಗಳ ಹಿರಿಯ ಉಪಾಧ್ಯಕ್ಷ ರಿಕ್ ಓಸ್ಟರ್ಲೋಕ್ ಅವರು, ಲ್ಯಾಪ್ಟಾಪ್ಗಳು ಮತ್ತು ಡೆಸ್ಕ್ಟಾಪ್ಗಳಿಗೂ ಆಂಡ್ರಾಯ್ಡ್ ಆಪರೇಟಿಂಗ್ ಸಿಸ್ಟಮ್ ಅನ್ನು ತರುವ ಗುರಿ ಹೊಂದಿದ್ದೇವೆ ಎಂದು ತಿಳಿಸಿದ್ದಾರೆ.
ಈ ಯೋಜನೆಯ ಹಿಂದಿರುವ ಮುಖ್ಯ ಉದ್ದೇಶವೆಂದರೆ ಪಿಸಿ ಮತ್ತು ಡೆಸ್ಕ್ಟಾಪ್ ಕಂಪ್ಯೂಟಿಂಗ್ ವ್ಯವಸ್ಥೆಗಳಿಗೆ ಒಂದೇ ಸಾಮಾನ್ಯ ತಾಂತ್ರಿಕ ಅಡಿಪಾಯವನ್ನು ನಿರ್ಮಿಸುವುದು. ಪ್ರಸ್ತುತ ಮೊಬೈಲ್ ಫೋನ್ಗಳಿಗೆ ಆಂಡ್ರಾಯ್ಡ್ ಮತ್ತು ಲ್ಯಾಪ್ಟಾಪ್ಗಳಿಗೆ ಕ್ರೋಮ್ ಓಎಸ್ ಅನ್ನು ಪ್ರತ್ಯೇಕವಾಗಿ ನಿರ್ವಹಿಸುತ್ತಿರುವ ಗೂಗಲ್, ಈಗ ಒಂದೇ ಏಕೀಕೃತ ವೇದಿಕೆಯನ್ನು ನಿರ್ಮಿಸುವ ನಿಟ್ಟಿನಲ್ಲಿ ಕ್ವಾಲ್ಕಾಮ್ ಕಂಪನಿಯೊಂದಿಗೆ ಕೆಲಸ ಮಾಡುತ್ತಿದೆ. ಈ ಪ್ರಯತ್ನವು ವೈಯಕ್ತಿಕ ಕಂಪ್ಯೂಟರ್ಗಳನ್ನು ಒಳಗೊಂಡಂತೆ ಹಲವಾರು ಕಂಪ್ಯೂಟಿಂಗ್ ವಿಭಾಗಗಳಲ್ಲಿ ಆಂಡ್ರಾಯ್ಡ್ ಕಾರ್ಯನಿರ್ವಹಿಸಲು ಅವಕಾಶ ಕಲ್ಪಿಸಲಿದೆ.
AI ಕೇಂದ್ರಬಿಂದು
ಗೂಗಲ್ ಪರಿಚಯಿಸಲಿರುವ ಪಿಸಿ ಮತ್ತು ಲ್ಯಾಪ್ಟಾಪ್ಗಳು ಕ್ವಾಲ್ಕಾಮ್ನ ಸ್ನಾಪ್ಡ್ರಾಗನ್ ಚಿಪ್ಸೆಟ್ನಲ್ಲಿ ಕಾರ್ಯನಿರ್ವಹಿಸಲಿವೆ ಮತ್ತು ಇವುಗಳನ್ನು AI ಮತ್ತು ಚಲನಶೀಲತೆಯನ್ನು ಗಮನದಲ್ಲಿಟ್ಟುಕೊಂಡು ವಿನ್ಯಾಸಗೊಳಿಸಲಾಗಿದೆ. ಈ ಹೊಸ ಸಾಧನಗಳ ಮೂಲಕ ಗೂಗಲ್ ತನ್ನ ಜೆಮಿನಿ ಎಐ, ಗೂಗಲ್ ಅಸಿಸ್ಟೆಂಟ್ ಮತ್ತು ವ್ಯಾಪಕವಾದ ಅಪ್ಲಿಕೇಶನ್ಗಳು ಮತ್ತು ಸೇವೆಗಳನ್ನು ಬಳಕೆದಾರರಿಗೆ ನೇರವಾಗಿ ಒದಗಿಸಲು ಮುಂದಾಗಿದೆ. ಈ ಏಕೀಕರಣದಿಂದ ಎಐ, ಜೆಮಿನಿ ಮಾದರಿಗಳು, ಸಹಾಯಕ ಹಾಗೂ ಎಲ್ಲಾ ಅಪ್ಲಿಕೇಶನ್ಗಳು ಮತ್ತು ಡೆವಲಪರ್ ಸಮುದಾಯವನ್ನು ಪಿಸಿ ವಲಯಕ್ಕೆ ತರುವಲ್ಲಿ ಸಹಾಯವಾಗುವುದರ ಜೊತೆಗೆ, ಆಂಡ್ರಾಯ್ಡ್ ಎಲ್ಲ ಕಂಪ್ಯೂಟಿಂಗ್ ವರ್ಗದ ಬಳಕೆದಾರರಿಗೆ ಸೇವೆ ನೀಡಲು ಸಾಧ್ಯವಾಗಲಿದೆ.
ಪಿಕ್ಸೆಲ್ ಬ್ರಾಂಡೆಡ್ ಆಂಡ್ರಾಯ್ಡ್ ಲ್ಯಾಪ್ಟಾಪ್ ಬಗ್ಗೆ ಸಾಕಷ್ಟು ವದಂತಿಗಳು ಹರಿದಾಡುತ್ತಲೇ ಇವೆ. ಕ್ರೋಮ್ ಓಎಸ್ ಮತ್ತು ಆಂಡ್ರಾಯ್ಡ್ ಅನ್ನು ವಿಲೀನಗೊಳಿಸುವ ಗೂಗಲ್ ತೆಗೆದುಕೊಂಡ ಕ್ರಮಗಳು ಕಳೆದ ಕೆಲವು ತಿಂಗಳಿನಿಂದಲೂ ಸುದ್ದಿಯಾಗಿವೆ. ಆದಾಗ್ಯೂ, ಈ ಬಗ್ಗೆ ಗೂಗಲ್ ಇನ್ನೂ ಯಾವುದೇ ಅಧಿಕೃತ ಬಿಡುಗಡೆ ದಿನಾಂಕವನ್ನು ಘೋಷಿಸಿಲ್ಲ. ತಜ್ಞರ ಅಭಿಪ್ರಾಯದಲ್ಲಿ, ಕ್ರೋಮ್ ಓಎಸ್ ಮತ್ತು ಆಂಡ್ರಾಯ್ಡ್ ವಿಲೀನಗೊಂಡ ಏಕೀಕೃತ ವೇದಿಕೆಯು ಸಮೀಪದಲ್ಲಿದೆ ಎಂಬುದು ಸ್ಪಷ್ಟವಾಗಿದೆ.
ಗೂಗಲ್ ಈ ಯೋಜನೆಯಿಂದ ಟೆಕ್ ಲೋಕದಲ್ಲಿ ಅತಿ ದೊಡ್ಡ ಕ್ರಾಂತಿಯನ್ನು ಎಬ್ಬಿಸಲು ತಯಾರಿ ನಡೆಸಿದೆ. ಈ ಕ್ರಮವು ವಿಂಡೋಸ್ ಮತ್ತು ಮ್ಯಾಕ್ ಓಎಸ್ಗಳನ್ನು ಚಲಾಯಿಸುವ ಪರಂಪರಾಗತ ಪಿಸಿ ಮಾರುಕಟ್ಟೆಗೆ ಬೃಹತ್ ಸವಾಲು ಹಾಕುವ ಸಾಧ್ಯತೆಯಿದೆ. ಬಳಕೆದಾರರು ತಮ್ಮ ಸ್ಮಾರ್ಟ್ಫೋನ್ಗಳಲ್ಲಿ ಬಳಸುವ ಪರಿಚಿತ ಆಂಡ್ರಾಯ್ಡ್ ಪರಿಸರವನ್ನೇ ಈಗ ಲ್ಯಾಪ್ಟಾಪ್ಗಳಲ್ಲಿ ಅನುಭವಿಸಬಹುದಾಗಿದೆ. ಇದರಿಂದಾಗಿ ಡೆವಲಪರ್ಗಳಿಗೆ ಒಂದೇ ಬಾರಿಗೆ ಅಪ್ಲಿಕೇಶನ್ನ್ನು ರಚಿಸಿ, ಬಹುವಿಧದ ಸಾಧನಗಳಲ್ಲಿ ಚಲಾಯಿಸಲು ಸುಲಭವಾಗಬಹುದು. ಗೂಗಲ್ನ ಈ ಆಂಡ್ರಾಯ್ಡ್ ಆಧಾರಿತ ಪಿಸಿ ಮತ್ತು ಲ್ಯಾಪ್ಟಾಪ್ಗಳು ಟೆಕ್ ಉದ್ಯಮದಲ್ಲಿ ಹೇಗೆ ಬದಲಾವಣೆ ತರುತ್ತವೆ ಎಂಬುದು ಇನ್ನು ಮುಂದೆ ನೋಡಬೇದೆ.