ಕರ್ನಾಟಕದ ಕಲಬುರಗಿ ತಾಲೂಕಿನ ಮೇಳಕುಂದಾ ಗ್ರಾಮದಲ್ಲಿ ಒಂದು ಆಘಾತಕಾರಿ ಮರ್ಯಾದೆ ಹತ್ಯೆ ಪ್ರಕರಣ ನಡೆದಿದೆ. ಲಿಂಗಾಯತ ಸಮಾಜದ 18 ವರ್ಷದ ಯುವತಿ ಕವಿತಾ, ಅದೇ ಗ್ರಾಮದ ಕುರುಬ ಸಮಾಜದ ಯುವಕ ಮಾಳಪ್ಪ ಪೂಜಾರಿಯನ್ನು ಪ್ರೀತಿಸುತ್ತಿದ್ದಳು. ಈ ಪ್ರೀತಿಯ ವಿಷಯ ಕವಿತಾಳ ತಂದೆ ಶಂಕರ್ ಕೊಳ್ಳೂರು ಮತ್ತು ಕುಟುಂಬದವರಿಗೆ ತಿಳಿದಾಗ, ಅವರು ಆಕೆಯ ಕಾಲೇಜು ಶಿಕ್ಷಣವನ್ನು ನಿಲ್ಲಿಸಿ ಮನೆಗೆ ಕರೆತಂದಿದ್ದರು. ಆದರೂ, ಕವಿತಾ ಮಾಳಪ್ಪನನ್ನು ಮದುವೆಯಾಗುವ ಪಟ್ಟು ಹಿಡಿದಿದ್ದಳು, ಇದು ಕುಟುಂಬದ ತೀವ್ರ ವಿರೋಧಕ್ಕೆ ಕಾರಣವಾಯಿತು.
ಕವಿತಾಳ ತಂದೆ ಶಂಕರ್ ಕೊಳ್ಳೂರು, ಸಹೋದರ ಶರಣು, ಮತ್ತು ಸಂಬಂಧಿ ದತ್ತು ಚೋಳಾಭರ್ಧಿ ಸೇರಿ, ಮಧ್ಯರಾತ್ರಿಯಲ್ಲಿ ಆಕೆಯ ಕತ್ತು ಹಿಸುಕಿ ಕೊಲೆ ಮಾಡಿದ್ದಾರೆ. ನಂತರ, ಈ ಘಟನೆಯನ್ನು ಆತ್ಮಹತ್ಯೆ ಎಂದು ಬಿಂಬಿಸಲು, ಕವಿತಾಳ ದೇಹದ ಮೇಲೆ ಕೀಟನಾಶಕ ಸಿಂಪಡಿಸಿ, ವಿಷ ಸೇವಿಸಿದಂತೆ ತೋರಿಸಲು ಯತ್ನಿಸಿದ್ದಾರೆ. ಮರುದಿನ ಬೆಳಗ್ಗೆ, ಗ್ರಾಮದ ಹೊರವಲಯದ ಸಂಬಂಧಿಕರ ಜಮೀನಿನಲ್ಲಿ ಆಕೆಯ ದೇಹವನ್ನು ಸುಟ್ಟುಹಾಕಲಾಗಿದೆ.
ಆದರೆ, ಫರಹತಾಬಾದ್ ಪೊಲೀಸ್ ಠಾಣೆಯ ತನಿಖೆಯಿಂದ ಈ ಘನಘೋರ ಕೃತ್ಯ ಬಯಲಿಗೆ ಬಂದಿದೆ. ಪೊಲೀಸರು ಶಂಕರ್ ಕೊಳ್ಳೂರನನ್ನು ಬಂಧಿಸಿದ್ದಾರೆ, ಜೊತೆಗೆ ಕೊಲೆಗೆ ಸಾಥ್ ನೀಡಿದ ಶರಣು ಮತ್ತು ದತ್ತುವಿನ ಬಂಧನಕ್ಕೆ ತೀವ್ರ ಶೋಧ ಕಾರ್ಯಾಚರಣೆ ಆರಂಭಿಸಿದ್ದಾರೆ.
