ಅಮೆರಿಕ, ಇಸ್ರೇಲ್ ಮತ್ತು ಇರಾನ್ ನಡುವಿನ ಸಂಘರ್ಷ ಕೇವಲ ತೈಲ ಬೆಲೆ ಏರಿಕೆಗೆ ಸೀಮಿತವಾಗಿಲ್ಲ. ಇಡೀ ವಿಶ್ವವನ್ನು ಬೆಚ್ಚಿಬೀಳಿಸುವ ಹೊಸ ಆತಂಕವೊಂದು ಈಗ ಎದುರಾಗಿದೆ. ಹಾರ್ಮುಜ್ ಜಲಸಂಧಿಯು ವಿಶ್ವದ 20% ಕಚ್ಚಾ ತೈಲ ಮತ್ತು 25% ಎಲ್ಎನ್ಜಿ ಪೂರೈಕೆಯ ಮಾರ್ಗ ಮಾತ್ರವಲ್ಲ, ಅದು ಜಾಗತಿಕ ಇಂಟರ್ನೆಟ್ನ ಜೀವನಾಡಿ. ಈ ಪ್ರದೇಶದಲ್ಲಿ ಯುದ್ಧದ ಉದ್ವಿಗ್ನತೆ ಹೆಚ್ಚಾದರೆ ಅಥವಾ ಸಮುದ್ರದಾಳದ ಕೇಬಲ್ಗಳಿಗೆ ಹಾನಿಯಾದರೆ, ಭಾರತ ಸೇರಿದಂತೆ ವಿಶ್ವಾದ್ಯಂತ ಇಂಟರ್ನೆಟ್ ಯುಗವೇ ಅಂತ್ಯವಾಗುವ ಭೀತಿ ಎದುರಾಗಿದೆ.
ನಾವೆಲ್ಲರೂ ಇಂಟರ್ನೆಟ್ ಉಪಗ್ರಹಗಳ ಮೂಲಕ ಕಾರ್ಯನಿರ್ವಹಿಸುತ್ತದೆ ಎಂದು ಭಾವಿಸುತ್ತೇವೆ. ಆದರೆ ವಾಸ್ತವವಾಗಿ, ಜಾಗತಿಕ ದತ್ತಾಂಶದ (Data) ಶೇ. 97ರಷ್ಟು ಭಾಗವು ಸಮುದ್ರದ ಅಡಿಯಲ್ಲಿ ಹಾಕಲಾಗಿರುವ ಫೈಬರ್ ಆಪ್ಟಿಕ್ ಕೇಬಲ್ಗಳ ಮೂಲಕ ವರ್ಗಾವಣೆಯಾಗುತ್ತದೆ. ಭಾರತವನ್ನು ಯುರೋಪ್, ಆಫ್ರಿಕಾ ಮತ್ತು ಪಶ್ಚಿಮ ಏಷ್ಯಾಕ್ಕೆ ಸಂಪರ್ಕಿಸುವ ಪ್ರಮುಖ ಕೇಬಲ್ ವ್ಯವಸ್ಥೆಗಳಾದ SEA-ME-WE ಮತ್ತು AAE-1 ಹಾರ್ಮುಜ್ ಜಲಸಂಧಿಯ ಮಾರ್ಗದಲ್ಲೇ ಹಾದುಹೋಗುತ್ತವೆ. ಈ ಕೇಬಲ್ಗಳು ಹಾನಿಗೊಳಗಾದರೆ ಡಿಜಿಟಲ್ ಜಗತ್ತಿಗೆ ಇಂಟರ್ನೆಟ್ನ ಅಭಾವ ಉಂಟಾಗಲಿದೆ.
ಭಾರತದ ಡಿಜಿಟಲ್ ಆರ್ಥಿಕತೆಯು ಸಂಪೂರ್ಣವಾಗಿ ಈ ಸಮುದ್ರ ಮಾರ್ಗಗಳ ಮೇಲೆ ಅವಲಂಬಿತವಾಗಿದೆ. ಇಂಟರ್ನೆಟ್ ಸಂಪರ್ಕದಲ್ಲಿ ವ್ಯತ್ಯಯ ಉಂಟಾದರೆ ಆಗುವ ನಷ್ಟಗಳನ್ನ ನೋಡುವುದಾದರೆ,
-
ಐಟಿ ವಲಯಕ್ಕೆ ಕಂಟಕ: ಭಾರತದ ಸುಮಾರು 23.48 ಲಕ್ಷ ಕೋಟಿ ರೂಪಾಯಿ ($250 ಬಿಲಿಯನ್) ಮೌಲ್ಯದ ಐಟಿ ಮತ್ತು ಹೊರಗುತ್ತಿಗೆ ವಲಯವು ನೈಜ-ಸಮಯದ (Real-time) ಇಂಟರ್ನೆಟ್ ಸಂಪರ್ಕವನ್ನು ಅವಲಂಬಿಸಿದೆ. ಸಂಪರ್ಕ ಕಡಿತಗೊಂಡರೆ ಜಾಗತಿಕ ಕಂಪನಿಗಳೊಂದಿಗೆ ಮಾಡಿಕೊಂಡಿರುವ ಸೇವಾ ಒಪ್ಪಂದಗಳ ಉಲ್ಲಂಘನೆಯಾಗಿ ಭಾರಿ ದಂಡ ತೆರಬೇಕಾಗುತ್ತದೆ.
-
ಬ್ಯಾಂಕಿಂಗ್ ಮತ್ತು ಸ್ಟಾಕ್ ಮಾರ್ಕೆಟ್: ಅಂತರರಾಷ್ಟ್ರೀಯ ಬ್ಯಾಂಕಿಂಗ್ ವಹಿವಾಟಿನ SWIFT ವ್ಯವಸ್ಥೆ ನಿಧಾನವಾಗಲಿದೆ. ಮಿಲಿಸೆಕೆಂಡ್ಗಳ ವ್ಯತ್ಯಾಸವೂ ಸ್ಟಾಕ್ ಮಾರುಕಟ್ಟೆಯಲ್ಲಿ ಕೋಟ್ಯಂತರ ರೂಪಾಯಿ ನಷ್ಟಕ್ಕೆ ಕಾರಣವಾಗಬಹುದು.
-
ಸಾಮಾನ್ಯರ ಜೀವನ: ಯೂಟ್ಯೂಬ್, ನೆಟ್ಫ್ಲಿಕ್ಸ್, ಇನ್ಸ್ಟಾಗ್ರಾಮ್ಗಳಲ್ಲಿ ವಿಪರೀತ ಬಫರಿಂಗ್ ಉಂಟಾಗಲಿದೆ. ವೀಡಿಯೊ ಕರೆಗಳು ಮತ್ತು ಕ್ಲೌಡ್ ಸೇವೆಗಳು ಸ್ಥಗಿತಗೊಳ್ಳಬಹುದು.
ಇಂಟರ್ನೆಟ್ ಸಂಪೂರ್ಣ ಬಂದ್ ಆಗುತ್ತದೆಯೇ ?
ತಜ್ಞರ ಪ್ರಕಾರ, ಇಂಟರ್ನೆಟ್ ಸಂಪೂರ್ಣವಾಗಿ ಸ್ಥಗಿತಗೊಳ್ಳುವ ಸಾಧ್ಯತೆ ಕಡಿಮೆ. ಏಕೆಂದರೆ ಒಂದು ಮಾರ್ಗ ಬಂದ್ ಆದಾಗ ದತ್ತಾಂಶವನ್ನು ಪೆಸಿಫಿಕ್ ಮಹಾಸಾಗರದಂತಹ ಪರ್ಯಾಯ ಮಾರ್ಗಗಳಿಗೆ ತಿರುಗಿಸಲಾಗುತ್ತದೆ. ಆದರೆ, ಈ ಪರ್ಯಾಯ ಮಾರ್ಗಗಳ ಮೇಲಿನ ಒತ್ತಡ ಹೆಚ್ಚಾಗುವುದರಿಂದ ಇಂಟರ್ನೆಟ್ ವೇಗವು ಅತ್ಯಂತ ನಿಧಾನವಾಗಲಿದೆ (Slow speed).
ಭಾರತದ ಮುಂದಿನ ಆಯ್ಕೆಗಳೇನು?
ಈ ಡಿಜಿಟಲ್ ಬೆದರಿಕೆಯನ್ನು ಮನಗಂಡಿರುವ ಭಾರತವು ಈಗ ಪರ್ಯಾಯ ಮಾರ್ಗಗಳ ಮೇಲೆ ಹೂಡಿಕೆ ಮಾಡುತ್ತಿದೆ. ಎಲಾನ್ ಮಸ್ಕ್ ಅವರ ‘ಸ್ಟಾರ್ಲಿಂಕ್’ ನಂತಹ ಉಪಗ್ರಹ ಇಂಟರ್ನೆಟ್ ಸೇವೆಗಳನ್ನು ಬ್ಯಾಕಪ್ ಆಗಿ ಬಳಸುವ ಬಗ್ಗೆ ಚರ್ಚೆಗಳು ನಡೆಯುತ್ತಿವೆ. ಭವಿಷ್ಯದಲ್ಲಿ ಸೂಕ್ಷ್ಮ ಪ್ರದೇಶಗಳನ್ನು ಹೊರತುಪಡಿಸಿ ಹೊಸ ಕೇಬಲ್ಗಳನ್ನು ಹಾಕುವ ಯೋಜನೆಗಳು ಚಾಲ್ತಿಯಲ್ಲಿವೆ. ಸದ್ಯಕ್ಕೆ ಹಾರ್ಮುಜ್ನ ಭೌಗೋಳಿಕ ರಾಜಕೀಯ ಉದ್ವಿಗ್ನತೆಗಳು ತೈಲಕ್ಕಿಂತ ಹೆಚ್ಚಾಗಿ ಡಿಜಿಟಲ್ ಜಗತ್ತನ್ನು ಆತಂಕಕ್ಕೆ ದೂಡಿವೆ.