ಕರ್ನಾಟಕದ ಕೆಲವು ಭಾಗಗಳಲ್ಲಿ, ಬಿರುಸಾದ ಶೀತಗಾಳಿಯ ನಡುವೆ, ಜನವರಿ 14ರ ವರೆಗೆ ಚಳಿಯ ವಾತಾವರಣ ನಿರೀಕ್ಷಿಸಲಾಗಿದೆ. ಹವಾಮಾನ ಇಲಾಖೆಯ ವರದಿಯ ಪ್ರಕಾರ, ರಾಜ್ಯದ ದಕ್ಷಿಣ ಒಳನಾಡಿನ ಕೆಲವು ಪ್ರದೇಶಗಳಲ್ಲಿ ಮುಂದಿನ ಎರಡು ದಿನಗಳ ಕಾಲ ಹಗುರ ಮಳೆಯ ಸಾಧ್ಯತೆಯೂ ಇದೆ. ಈ ಕಾರಣದಿಂದಾಗಿ ಸಾರ್ವಜನಿಕರು ಎಚ್ಚರವಾಗಿರಿ ಎಂದು ವೈದ್ಯರು ಸಲಹೆ ನೀಡಿದ್ದಾರೆ..
ಬೆಂಗಳೂರಿನಲ್ಲಿ, ರಾಜಧಾನಿಯ ನಿವಾಸಿಗಳು ತಂಪಾದ ದಿನಗಳನ್ನು ಎದುರಿಸಲಿದ್ದಾರೆ. ಗರಿಷ್ಠ ತಾಪಮಾನ 22 ಡಿಗ್ರಿ ಸೆಲ್ಸಿಯಸ್ ಮತ್ತು ಕನಿಷ್ಠ ತಾಪಮಾನ 19 ಡಿಗ್ರಿ ಸೆಲ್ಸಿಯಸ್ ದಾಖಲಾಗಲಿದೆ. ಇದರಿಂದ ರಾಜ್ಯದ ಜನರು ಬೆಚ್ಚಗಿನ ಉಡುಪನ್ನ ಧರಿಸಬೇಕು. ಹಾಗೆಯೇ, ಚಿಕ್ಕಬಳ್ಳಾಪುರದಲ್ಲಿ ತಾಪಮಾನ ಇನ್ನೂ ತಂಪಾಗಿದೆ, ಅಲ್ಲಿ ಗರಿಷ್ಠ 21 ಡಿಗ್ರಿ ಮತ್ತು ಕನಿಷ್ಠ 17 ಡಿಗ್ರಿ ಸೆಲ್ಸಿಯಸ್ ದಾಖಲಾಗಲಿದೆ.
ಕರಾವಳಿ ಮತ್ತು ಒಳನಾಡಿನ ಹವಾಮಾನದಲ್ಲಿ ಗಮನಾರ್ಹ ವ್ಯತ್ಯಾಸವನ್ನು ಕಾಣಬಹುದು. ಕರಾವಳಿ ನಗರಗಳಾದ ಮಂಗಳೂರು (29-24), ಉಡುಪಿ (30-22) ಮತ್ತು ಕಾರವಾರ (32-22) ಗರಿಷ್ಠ ತಾಪಮಾನದಲ್ಲಿ ತುಲನಾತ್ಮಕವಾಗಿ ಬೆಚ್ಚಗಿನ ವಾತಾವರಣವನ್ನು ಹೊಂದಿವೆ. ಮಲೆನಾಡಿನ ನಗರಗಳಾದ ಮಡಿಕೇರಿ (25-18) ಮತ್ತು ಶಿವಮೊಗ್ಗ (29-18) ಸಹ ಸೌಮ್ಯವಾದ ಹವಾಗುಣವನ್ನು ಹೊಂದಲಿದೆ.
ಆದರೆ, ರಾಜ್ಯದ ಇತರ ಭಾಗಗಳಲ್ಲಿ, ವಿಶೇಷವಾಗಿ ದಕ್ಷಿಣ ಒಳನಾಡು ಮತ್ತು ಉತ್ತರ ಕರ್ನಾಟಕದ ಕೆಲವು ಜಿಲ್ಲೆಗಳಲ್ಲಿ, ಚಳಿಯು ಹೆಚ್ಚು ತೀವ್ರವಾಗಿದೆ. ಚಿಕ್ಕಮಗಳೂರು (23-16), ಹಾಸನ (22-17), ತುಮಕೂರು (23-18), ಮತ್ತು ಬೀದರ್ (27-15) ನಂತರದ ಪ್ರದೇಶಗಳಲ್ಲಿ ಕನಿಷ್ಠ ತಾಪಮಾನ ಗಣನೀಯವಾಗಿ ಕಡಿಮೆಯಾಗಿದೆ. ಉತ್ತರ ಕರ್ನಾಟಕದ ಬಾಗಲಕೋಟೆ (27-18), ವಿಜಯಪುರ (27-17), ಕಲಬುರಗಿ (28-17), ಗದಗ (26-17), ಹುಬ್ಬಳ್ಳಿ (28-18), ಮತ್ತು ಬಳ್ಳಾರಿ (27-18) ನಗರಗಳಲ್ಲಿ ರಾತ್ರಿ ಮತ್ತು ಬೆಳಗ್ಗೆ ಸಮಯದಲ್ಲಿ ತೀವ್ರ ಚಳಿ ಇರಲಿದೆ.
ದಕ್ಷಿಣದ ಜಿಲ್ಲೆಗಳಾದ ಮೈಸೂರು (26-20), ಮಂಡ್ಯ (24-21), ರಾಮನಗರ (24-19), ಚಾಮರಾಜನಗರ (26-19), ಮತ್ತು ದಾವಣಗೆರೆ (29-19) ಗಳಲ್ಲಿ ಹಗುರ ಮಳೆಯ ಸಾಧ್ಯತೆಯಿದ್ದು, ಇದು ತಾಪಮಾನವನ್ನು ಇನ್ನೂ ತಗ್ಗಿಸಬಹುದು. ಹೀಗಾಗಿ ತೀವ್ರ ಎಚ್ಚರಿಕೆ ವಹಿಸಬೇಕು ಎಂದು ವೈದ್ಯರು ತಿಳಿಸಿದ್ದಾರೆ.
ಹವಾಮಾನ ಇಲಾಖೆಯು ರಾಜ್ಯದ ನಾಗರಿಕರಿಗೆ ಸೂಕ್ತ ಮುನ್ನೆಚ್ಚರಿಕೆಗಳನ್ನು ತೆಗೆದುಕೊಳ್ಳಲು ಸಲಹೆ ನೀಡಿದೆ. ಮಂಜು ಮತ್ತು ಶೀತಗಾಳಿಯ ಪ್ರದೇಶಗಳಲ್ಲಿ ವಾಹನ ಚಾಲಕರು ವಿಶೇಷ ಜಾಗರೂಕತೆ ವಹಿಸಬೇಕು. ಮಕ್ಕಳು ಮತ್ತು ವೃದ್ಧರು ಬೆಚ್ಚಗಿನ ಬಟ್ಟೆಗಳನ್ನು ಧರಿಸಬೇಕು. ಹಗುರ ಮಳೆಯ ಸಾಧ್ಯತೆಯಿರುವ ಪ್ರದೇಶಗಳಲ್ಲಿ ಕೃಷಿಕರು ತಮ್ಮ ಬೆಳೆಗಳ ರಕ್ಷಣೆಗೆ ಅಗತ್ಯ ಕ್ರಮಗಳನ್ನು ಕೈಗೊಳ್ಳಲು ಸೂಚಿಸಲಾಗಿದೆ.
ಈ ಹವಾಮಾನ ಪರಿಸ್ಥಿತಿಯು ಜನವರಿ ಮಧ್ಯಭಾಗದ ವರೆಗೆ ಮುಂದುವರೆಯಲಿದ್ದು, ಸಾರ್ವಜನಿಕರು ಹವಾಮಾನ ಇಲಾಖೆಯ ನಿಯಮಿತ ಬುಲೆಟಿನ್ಗಳನ್ನು ಗಮನಿಸುವಂತೆ ಅಧಿಕಾರಿಗಳು ಮನವಿ ಮಾಡಿದ್ದಾರೆ.