ಅಕ್ರಮ ಸಂಬಂಧಗಳು ಅಥವಾ ವಿವಾಹೇತರ ಸಂಬಂಧಗಳ ಬಗ್ಗೆ ಸಮಾಜದಲ್ಲಿ ಅನೇಕ ಚರ್ಚೆಗಳು ನಡೆಯುತ್ತವೆ. ಸಾಮಾನ್ಯವಾಗಿ ಇವುಗಳನ್ನು ನೈತಿಕತೆಯ ದೃಷ್ಟಿಯಿಂದ ನೋಡಲಾಗುತ್ತದೆ. ಆದರೆ ಮನಃಶಾಸ್ತ್ರಜ್ಞರ ಪ್ರಕಾರ, ಇಂತಹ ಸಂಬಂಧಗಳ ಹಿಂದೆ ಕೇವಲ ದೈಹಿಕ ಆಕರ್ಷಣೆಗಿಂತ ಹೆಚ್ಚಾಗಿ ಸಂಕೀರ್ಣವಾದ ಮಾನಸಿಕ ಕಾರಣಗಳು ಅಡಗಿರುತ್ತವೆ.
ಭಾವನಾತ್ಮಕ ಕೊರತೆ
ಸಂಬಂಧದಲ್ಲಿ ಮೋಸ ಮಾಡಲು ಪ್ರಮುಖ ಕಾರಣ ಭಾವನಾತ್ಮಕ ಹಸಿವು. ಸಂಗಾತಿಯ ಜೊತೆಗಿದ್ದರೂ ತಮ್ಮ ಮಾತುಗಳನ್ನು ಯಾರೂ ಕೇಳುತ್ತಿಲ್ಲ, ತಮ್ಮನ್ನು ಅರ್ಥಮಾಡಿಕೊಳ್ಳುತ್ತಿಲ್ಲ ಅಥವಾ ಸತತವಾಗಿ ನಿರ್ಲಕ್ಷ್ಯಕ್ಕೊಳಗಾಗುತ್ತಿದ್ದೇವೆ ಎಂಬ ಭಾವನೆ ಮೂಡಿದಾಗ ವ್ಯಕ್ತಿ ಒಂಟಿತನ ಅನುಭವಿಸುತ್ತಾನೆ. ಇಂತಹ ಸಮಯದಲ್ಲಿ ಮೂರನೇ ವ್ಯಕ್ತಿಯು ತೋರುವ ಸಣ್ಣ ಕಾಳಜಿ ಅಥವಾ ಮೆಚ್ಚುಗೆಯೂ ಅವರಿಗೆ ದೊಡ್ಡ ಆಸರೆಯಂತೆ ಭಾಸವಾಗುತ್ತದೆ. ಆ ಕ್ಷಣದಲ್ಲಿ ಅವರಿಗೆ ಅದು ತಪ್ಪೆಂದು ಅನಿಸುವುದೇ ಇಲ್ಲ.
ಮನಃಶಾಸ್ತ್ರದ ಪ್ರಕಾರ, ಅಕ್ರಮ ಸಂಬಂಧದಲ್ಲಿರುವ ರಿಸ್ಕ್ ಮತ್ತು ಹೊಸತನವು ಮೆದುಳಿನಲ್ಲಿ ಡೋಪಮೈನ್ ಎಂಬ ಸುಖ ನೀಡುವ ರಾಸಾಯನಿಕವನ್ನು ಬಿಡುಗಡೆ ಮಾಡುತ್ತದೆ. ಇದು ಕ್ರಮೇಣ ವ್ಯಸನದಂತೆ (Addiction) ಬದಲಾಗುತ್ತದೆ. ಅವರು ಭವಿಷ್ಯದ ಪರಿಣಾಮಗಳ ಬಗ್ಗೆ ಯೋಚಿಸದೆ, ಕೇವಲ ಈ ಕ್ಷಣದ ಸುಖಕ್ಕೆ ಮಾರು ಹೋಗುತ್ತಾರೆ. ಸಮಾಜಕ್ಕೆ ಹೆದರಿ ಮುಚ್ಚಿಡುವ ರಹಸ್ಯವು ಅವರಿಗೆ ಒಂದು ರೀತಿಯ ಥ್ರಿಲ್ ನೀಡುತ್ತದೆ.
ಅಕ್ರಮ ಸಂಬಂಧದಲ್ಲಿರುವವರು ಎರಡು ಮುಖಗಳೊಂದಿಗೆ ಬದುಕುತ್ತಾರೆ. ಸಮಾಜ ಮತ್ತು ಕುಟುಂಬದ ಮುಂದೆ ಒಬ್ಬ ಆದರ್ಶ ವ್ಯಕ್ತಿಯಾಗಿ ನಟಿಸಿದರೆ, ಒಳಗಡೆ ತೊಳಲಾಡುತ್ತಿರುವ ಭಾವನೆಗಳನ್ನು ಮುಚ್ಚಿಡುತ್ತಾರೆ. ಪ್ರೈವೆಸಿ ಬಗ್ಗೆ ಅತಿಯಾದ ಕಾಳಜಿ, ಫೋನ್ ಬಚ್ಚಿಡುವುದು, ಸಣ್ಣ ವಿಷಯಕ್ಕೂ ಸುಳ್ಳು ಹೇಳುವುದು ಕೇವಲ ಮೋಸ ಮಾಡುವ ಉದ್ದೇಶವಲ್ಲ, ಬದಲಿಗೆ ಸಿಕ್ಕಿಬೀಳುವ ಭಯ ಮತ್ತು ಒಳಮನಸ್ಸಿನಲ್ಲಿರುವ ಅಪರಾಧ ಪ್ರಜ್ಞೆಯ ನಡವಳಿಕೆಯಾಗಿರುತ್ತದೆ.
ನನಗೆ ಬೆಲೆ ಇದೆಯೇ ? ನನ್ನನ್ನು ಯಾರಾದರೂ ಇಷ್ಟಪಡುತ್ತಾರೆಯೇ ? ಎಂಬ ಅನುಮಾನಗಳು ಹಲವರನ್ನು ಕಾಡುತ್ತವೆ. ಪ್ರಸ್ತುತ ಸಂಬಂಧದಲ್ಲಿ ಸಂಗಾತಿಯಿಂದ ಮೆಚ್ಚುಗೆ ಅಥವಾ ಗೌರವ ಕಡಿಮೆಯಾದಾಗ, ಹೊರಗಿನಿಂದ ಸಿಗುವ ಅಲ್ಪ ಗಮನವೂ ಅವರ ಆತ್ಮವಿಶ್ವಾಸವನ್ನು ಹೆಚ್ಚಿಸಿದಂತೆ ಭಾಸವಾಗುತ್ತದೆ. ಆದರೆ ಇದು ಅಸ್ಥಿರವಾದ ಭಾವನೆಯಾಗಿದ್ದು, ಸಂಪೂರ್ಣವಾಗಿ ಬೇರೆಯವರ ಮೇಲೆ ಅವಲಂಬಿತವಾಗಿರುತ್ತದೆ.
ಮಾನಸಿಕ ವಿಶ್ಲೇಷಣೆಗಳ ಪ್ರಕಾರ, ತಪ್ಪು ಮಾಡುತ್ತಿರುವವರು ತಮ್ಮನ್ನು ತಾವು ಸಮರ್ಥಿಸಿಕೊಳ್ಳಲು ನೆಪಗಳನ್ನು ಹುಡುಕುತ್ತಾರೆ. ನನ್ನ ಪರಿಸ್ಥಿತಿ ಬೇರೆ ಇದೆ, “ಅವನು/ಅವಳು ನನ್ನನ್ನು ಚೆನ್ನಾಗಿ ನಡೆಸಿಕೊಳ್ಳುತ್ತಿಲ್ಲ ಎಂಬ ಮಾತುಗಳ ಮೂಲಕ ತಮ್ಮ ತಪ್ಪನ್ನು ಸರಿ ಎಂದು ನಂಬಿಸುತ್ತಾರೆ. ಹೀಗೆ ಮಾಡುವುದರಿಂದ ಸರಿ ಮತ್ತು ತಪ್ಪುಗಳ ನಡುವಿನ ಗೆರೆ ಮಸುಕಾಗುತ್ತದೆ. ಸಂಬಂಧಗಳು ಹದಗೆಟ್ಟಾಗ ಒಬ್ಬರನ್ನೊಬ್ಬರು ದೂಷಿಸುವ ಬದಲು, ಆಂತರಿಕ ಅಗತ್ಯಗಳನ್ನು ಅರ್ಥಮಾಡಿಕೊಂಡು ಮುಕ್ತವಾಗಿ ಸಂವಹನ ನಡೆಸುವುದರಿಂದ ಸಂಬಂಧಗಳನ್ನು ಉಳಿಸಿಕೊಳ್ಳಬಹುದು.