ತನ್ನ ವಿಶಿಷ್ಟ ಸಂಸ್ಕೃತಿ, ಆಧುನಿಕ ತಂತ್ರಜ್ಞಾನ ಹಾಗೂ ತಟಸ್ಥ ವಿದೇಶಾಂಗ ನೀತಿಯಿಂದ ವಿಶ್ವದಲ್ಲೇ ಹೆಸರುವಾಸಿಯಾಗಿರುವ ದೇಶ ಜಪಾನ್. ಭಾರತದ ಆಪ್ತಮಿತ್ರ ರಾಷ್ಟ್ರವೂ ಆಗಿರುವ ಜಪಾನ್ ನಲ್ಲಿ, ಇದೀಗ ಭವಿಷ್ಯವನ್ನು ಕಗ್ಗಂಟಾಗಿಸುವಂತಹ ಪ್ರಮುಖ ಸಮಸ್ಯೆಯೊಂದು ತೀವ್ರವಾಗಿ ಕಾಡುತ್ತಿದೆ.
ಬುದ್ಧಿವಂತರ ಹಾಗೂ ತಂತ್ರಜ್ಞರ ದೇಶ ಎಂದೇ ಗುರುತಿಸಿಕೊಂಡಿರುವ ಜಪಾನ್ ನಲ್ಲಿ ಯುವಜನರ ಸಂಖ್ಯೆ ಗಣನೀಯವಾಗಿ ಕುಸಿಯುತ್ತಿದ್ದು, ವಯೋವೃದ್ಧರ ಸಂಖ್ಯೆ ಹೆಚ್ಚಾಗುತ್ತಿದೆ. ಜಪಾನ್ ಸರ್ಕಾರ ನೀಡಿರುವ ಇತ್ತೀಚಿನ ಅಂಕಿ-ಅಂಶಗಳ ಪ್ರಕಾರ, ದೇಶದಲ್ಲಿ 90 ಲಕ್ಷಕ್ಕೂ (8.99 ಮಿಲಿಯನ್) ಅಧಿಕ ಮನೆಗಳು ವಾಸಿಸಲು ಜನರ ಇಲ್ಲದೇ ಖಾಲಿ ಬಿದ್ದಿವೆ!
ಜನಸಂಖ್ಯಾ ಕುಸಿತ ಮತ್ತು ದೀರ್ಘಾಯುಷ್ಯ: ಜಪಾನ್ ನಲ್ಲಿ ಯುವಜನರು ಮದುವೆ ಹಾಗೂ ಮಕ್ಕಳನ್ನು ಪಡೆಯುವ ಬಗ್ಗೆ ಆಸಕ್ತಿ ಕಳೆದುಕೊಳ್ಳುತ್ತಿದ್ದಾರೆ. ಇದರಿಂದಾಗಿ ಜನನ ಪ್ರಮಾಣ (Birth Rate) ದಾಖಲೆ ಮಟ್ಟಕ್ಕೆ ಕುಸಿದಿದ್ದು, ವಯೋವೃದ್ಧರ ಸಂಖ್ಯೆ ಶೇಕಡಾವಾರು ಆಧಾರದಲ್ಲಿ ಪ್ರಪಂಚದಲ್ಲೇ ಅತ್ಯಂತ ಹೆಚ್ಚಾಗಿದೆ.
ಗ್ರಾಮೀಣ ಭಾಗದಿಂದ ನಗರಗಳಿಗೆ ವಲಸೆ: ಯುವಜನರು ಜಪಾನ್ ದೇಶವನ್ನೇ ತೊರೆಯುತ್ತಿಲ್ಲ; ಬದಲಾಗಿ ಹಳ್ಳಿಗಳನ್ನು ತೊರೆದು ಟೋಕಿಯೊ, ಒಸಾಕಾದಂತಹ ನಗರ ಪ್ರದೇಶಗಳಿಗೆ ಉದ್ಯೋಗ ಮತ್ತು ಶಿಕ್ಷಣಕ್ಕಾಗಿ ವಲಸೆ ಹೋಗುತ್ತಿದ್ದಾರೆ. ಇದರಿಂದ ಗ್ರಾಮೀಣ ಭಾಗದ ಲಕ್ಷಾಂತರ ಮನೆಗಳಿಗೆ ವಾರಸುದಾರರಿಲ್ಲದೆ ‘ಅನಾಥ ಮನೆಗಳು’ (ಸ್ಥಳೀಯವಾಗಿ ‘ಅಕಿಹಾ’ – Akiya) ಆಗಿ ಪರಿವರ್ತನೆಯಾಗುತ್ತಿವೆ.
ಹೊಸ ಮನೆಗಳ ಮೇಲಿನ ಮೋಹ: ಜಪಾನೀಯರು ಹಳೆಯ ಆಸ್ತಿ ಅಥವಾ ಮನೆಗಳನ್ನು ದುರಸ್ತಿ ಮಾಡಿ ವಾಸಿಸಲು ಇಷ್ಟಪಡುವುದಿಲ್ಲ. ಭೂಕಂಪ ನಿರೋಧಕ ತಂತ್ರಜ್ಞಾನವಿರುವ ಹೊಸ ಮನೆಗಳನ್ನೇ ಖರೀದಿಸಲು ಆದ್ಯತೆ ನೀಡುತ್ತಾರೆ.
ಮನೆಗಳ ಮಾರಾಟಕ್ಕಿರುವ ಸವಾಲುಗಳು: ಮನೆಗಳ ಮಾರಾಟ ಅಥವಾ ಬಾಡಿಗೆಯ ವಿಷಯದಲ್ಲಿ ವಿದೇಶಿಗರಿಗೆ ಭಾಷೆಯ ಅಡಚಣೆ ಮತ್ತು ಕಾನೂನು ನಿಯಮಗಳು ಕೆಲವೊಮ್ಮೆ ಸವಾಲಾಗಿರುವುದು ನಿಜ. ಆದರೆ, ಜಪಾನ್ ಸರ್ಕಾರ ಮತ್ತು ಸ್ಥಳೀಯ ಆಡಳಿತಗಳು ಈ ‘ಅಕಿಹಾ’ ಮನೆಗಳನ್ನು ತೀರಾ ಕಡಿಮೆ ದರಕ್ಕೆ ಹಾಗೂ ಕೆಲವು ಕಡೆ ಉಚಿತವಾಗಿಯೂ ನೀಡಲು ಮುಂದಾಗಿವೆ. ಆದಾಗ್ಯೂ, ಆಸ್ತಿ ತೆರಿಗೆ ಮತ್ತು ರಿಪೇರಿ ವೆಚ್ಚಕ್ಕೆ ಹೆದರಿ ಸ್ಥಳೀಯ ಜನರೇ ಇವುಗಳನ್ನು ಕೊಳ್ಳಲು ಮುಂದೆ ಬರುತ್ತಿಲ್ಲ.
ಜಪಾನ್ ಮಾತ್ರವಲ್ಲದೆ ದಕ್ಷಿಣ ಕೊರಿಯಾ ಸೇರಿದಂತೆ ಹಲವು ಪೂರ್ವ ಏಷ್ಯಾದ ದೇಶಗಳಲ್ಲಿ ಜನಸಂಖ್ಯೆ ಕ್ಷೀಣಿಸುತ್ತಿರುವುದು ಜಾಗತಿಕ ಮಟ್ಟದಲ್ಲಿ ದೊಡ್ಡ ಆರ್ಥಿಕ ಮತ್ತು ಸಾಮಾಜಿಕ ಕಳವಳಕ್ಕೆ ಕಾರಣವಾಗಿದೆ.