ನಾನ್-ಸ್ಟಿಕ್ ಪಾತ್ರೆಗಳು ಇಂದು ಅಡುಗೆಮನೆಯಲ್ಲಿ ಸಾಮಾನ್ಯವಾಗಿವೆ. ಗರಿಗರಿಯಾದ ದೋಸೆ, ಆಮ್ಲೆಟ್ನಂತಹ ಖಾದ್ಯಗಳನ್ನು ತಯಾರಿಸಲು ಇವು ಗೃಹಿಣಿಯರ ನೆಚ್ಚಿನ ಆಯ್ಕೆಯಾಗಿವೆ. ಆದರೆ, ಈ ಪಾತ್ರೆಗಳ ಬಳಕೆಯಿಂದ ಗಂಭೀರ ಆರೋಗ್ಯ ಸಮಸ್ಯೆಗಳು ಉಂಟಾಗಬಹುದು ಎಂಬ ಆಘಾತಕಾರಿ ಸತ್ಯವನ್ನು ಇತ್ತೀಚಿನ ವರದಿಯೊಂದು ಬಹಿರಂಗಪಡಿಸಿದೆ.
ಪಾಲಿಮರ್ ಫ್ಯೂಮ್ ಫೀವರ್: ವಿಷಕಾರಿ ಹೊಗೆಯಿಂದ ಅಪಾಯ
‘ಪಾಲಿಮರ್ ಫ್ಯೂಮ್ ಫೀವರ್’ ಎಂಬ ಅಪರೂಪದ ಕಾಯಿಲೆಯು ನೂರಾರು ಜನರಲ್ಲಿ ಕಂಡುಬಂದಿದೆ. ಇದಕ್ಕೆ ಕಾರಣ, ಬಿಸಿಯಾದ ನಾನ್-ಸ್ಟಿಕ್ ಪಾತ್ರೆಗಳಿಂದ ಬಿಡುಗಡೆಯಾಗುವ ವಿಷಕಾರಿ ಹೊಗೆ. ಈ ಹೊಗೆಯನ್ನು ಉಸಿರಾಡಿದಾಗ, ವಿಶೇಷವಾಗಿ ಮಹಿಳೆಯರಲ್ಲಿ ಜ್ವರದಂತಹ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ ಎಂದು ಅಮೆರಿಕದ ಪಾಯ್ಸನ್ ಸೆಂಟರ್ ವರದಿ ಮಾಡಿದೆ.
ನಾನ್-ಸ್ಟಿಕ್ ಪಾತ್ರೆಗಳ ಟೆಫ್ಲಾನ್ ಕೋಟಿಂಗ್ (PTFE) ವಿಷಕಾರಿ ಅಂಶಗಳನ್ನು ಒಳಗೊಂಡಿರುತ್ತದೆ. ಒಲೆಯ ಮೇಲೆ ಪಾತ್ರೆಯನ್ನು ಬಿಸಿಮಾಡಿದಾಗ, ಈ ಕೋಟಿಂಗ್ನಿಂದ ವಿಷಕಾರಿ ಅನಿಲಗಳು ಹೊಗೆಯ ರೂಪದಲ್ಲಿ ಹೊರಬರುತ್ತವೆ. ಈ ಹೊಗೆ ಉಸಿರಾಟದ ಮೂಲಕ ದೇಹಕ್ಕೆ ಸೇರಿದರೆ, ಉಸಿರಾಟದ ತೊಂದರೆ, ಕಫ, ತಲೆನೋವು, ತಲೆಸುತ್ತುವಿಕೆ, ಸುಸ್ತು, ಮತ್ತು ವಾಂತಿಯಂತಹ ಲಕ್ಷಣಗಳು ಕಾಡಬಹುದು ಎಂದು ಫರಿದಾಬಾದ್ನ ಏಷಿಯಾ ಆಸ್ಪತ್ರೆಯ ವೈದ್ಯ ಡಾ. ಸಂತೋಷ್ ಕುಮಾರ್ ಅಗ್ರವಾಲ್ ಎಚ್ಚರಿಕೆ ನೀಡಿದ್ದಾರೆ.
ಗೀರು ಬಿದ್ದ ಪಾತ್ರೆಗಳಿಂದ ಮೈಕ್ರೋಪ್ಲಾಸ್ಟಿಕ್ ಅಪಾಯ:
ಗೀರು ಬಿದ್ದ ನಾನ್-ಸ್ಟಿಕ್ ಪಾತ್ರೆಗಳು ಇನ್ನಷ್ಟು ಗಂಭೀರ ಸಮಸ್ಯೆಯನ್ನುಂಟುಮಾಡುತ್ತವೆ. ಒಂದು ಸಣ್ಣ ಗೀರಿನಿಂದ 9,000 ಮೈಕ್ರೋಪ್ಲಾಸ್ಟಿಕ್ ಕಣಗಳು ಆಹಾರಕ್ಕೆ ಸೇರಬಹುದು. ಗೀರುಗಳ ಸಂಖ್ಯೆ ಹೆಚ್ಚಾದಂತೆ, ಆಹಾರದೊಂದಿಗೆ ಸೇರುವ ಮೈಕ್ರೋಪ್ಲಾಸ್ಟಿಕ್ಗಳ ಸಂಖ್ಯೆಯೂ ಗಣನೀಯವಾಗಿ ಏರಿಕೆಯಾಗುತ್ತದೆ. ಪ್ರತಿ ಅಡುಗೆಯ ಸಂದರ್ಭದಲ್ಲಿ ಸರಾಸರಿ 20 ಲಕ್ಷ ಮೈಕ್ರೋಪ್ಲಾಸ್ಟಿಕ್ ಕಣಗಳು ಆಹಾರಕ್ಕೆ ಬಿಡುಗಡೆಯಾಗುತ್ತವೆ, ಇದು ದೀರ್ಘಕಾಲೀನ ಆರೋಗ್ಯ ಸಮಸ್ಯೆಗಳಿಗೆ ಕಾರಣವಾಗಬಹುದು.
ನಾನ್-ಸ್ಟಿಕ್ ಪಾತ್ರೆಗಳನ್ನು ಸ್ವಚ್ಛಗೊಳಿಸುವಾಗ ಸ್ಟೀಲ್ ಸೌಟುಗಳ ಬದಲಿಗೆ ಮರದ ಸೌಟುಗಳನ್ನು ಬಳಸಿ. ಒಂದೇ ಒಂದು ಗೀರು ಬಿದ್ದರೂ ಆ ಪಾತ್ರೆಯನ್ನು ಬಳಸದಿರುವುದು ಒಳಿತು. ಆರೋಗ್ಯದ ದೃಷ್ಟಿಯಿಂದ ಸ್ಟೇನ್ಲೆಸ್ ಸ್ಟೀಲ್, ಕಬ್ಬಿಣದ ಪಾತ್ರೆಗಳು ಅಥವಾ ಗಾಜಿನ ಪಾತ್ರೆಗಳಂತಹ ಸುರಕ್ಷಿತ ಆಯ್ಕೆಗಳನ್ನು ಬಳಸಲು ತಜ್ಞರು ಶಿಫಾರಸು ಮಾಡಿದ್ದಾರೆ.
