ಟಾಕ್ಸಿಕ್ ಸಿನಿಮಾ ಚಿತ್ರಮಂದಿರಗಳಲ್ಲಿ ಯಶಸ್ವಿಯಾಗಿ ಪ್ರದರ್ಶನ ಮುಂದುವರಿಸಿದ್ದು, ಐದನೇ ದಿನದ ಬಾಕ್ಸ್ ಆಫೀಸ್ ಕಲೆಕ್ಷನ್ ವಿವರಗಳು ಇದೀಗ ಗಮನ ಸೆಳೆದಿವೆ. ಆರಂಭದ ದಿನ ಭರ್ಜರಿ ಓಪನಿಂಗ್ ಪಡೆದಿದ್ದ ಚಿತ್ರಕ್ಕೆ ದಿನಗಳು ಕಳೆದಂತೆ ಗಳಿಕೆಯಲ್ಲಿ ಇಳಿಕೆ ಕಂಡುಬಂದಿದ್ದರೂ, ಒಟ್ಟಾರೆ ಕಲೆಕ್ಷನ್ ವಿಚಾರದಲ್ಲಿ ಸಿನಿಮಾ ಉತ್ತಮ ಪ್ರದರ್ಶನ ಮುಂದುವರಿಸಿದೆ.
ಐದನೇ ದಿನವಾದ ಭಾನುವಾರ ‘ಟಾಕ್ಸಿಕ್’ ದೇಶಾದ್ಯಂತ 16,241 ಶೋಗಳಿಂದ ಸುಮಾರು ₹23 ಕೋಟಿ ನೆಟ್ ಕಲೆಕ್ಷನ್ ಮಾಡಿದೆ ಎನ್ನಲಾಗಿದೆ. ಇದರಿಂದ ಭಾರತದಲ್ಲಿ ಚಿತ್ರದ ಒಟ್ಟು ನೆಟ್ ಗಳಿಕೆ ₹214.10 ಕೋಟಿಗೆ ತಲುಪಿದೆ. ಇನ್ನು ಚಿತ್ರದ ಒಟ್ಟು ಗ್ರಾಸ್ ಕಲೆಕ್ಷನ್ ₹255.95 ಕೋಟಿಯಾಗಿದೆ.
ವಿದೇಶಿ ಮಾರುಕಟ್ಟೆಯಲ್ಲಿಯೂ ‘ಟಾಕ್ಸಿಕ್’ ಸಾಧಾರಣ ಪ್ರದರ್ಶನ ಮುಂದುವರಿಸಿದೆ. ಐದನೇ ದಿನ ಸಿನಿಮಾ ಸುಮಾರು ₹2 ಕೋಟಿ ಗಳಿಸಿದ್ದು, ವಿದೇಶಿ ಮಾರುಕಟ್ಟೆಯ ಒಟ್ಟು ಕಲೆಕ್ಷನ್ ₹29.25 ಕೋಟಿಗೆ ಏರಿಕೆಯಾಗಿದೆ. ಭಾರತ ಹಾಗೂ ವಿದೇಶಿ ಮಾರುಕಟ್ಟೆಯ ಗಳಿಕೆಯನ್ನು ಸೇರಿಸಿದರೆ ಚಿತ್ರದ ಜಾಗತಿಕ ಕಲೆಕ್ಷನ್ ಸುಮಾರು ₹285.20 ಕೋಟಿಗೆ ತಲುಪಿದೆ.
ಆದರೆ ಚಿತ್ರದ ಗಳಿಕೆ ದಿನದಿಂದ ದಿನಕ್ಕೆ ಕಡಿಮೆಯಾಗುತ್ತಿರುವುದು ಚಿತ್ರತಂಡ ಹಾಗೂ ಅಭಿಮಾನಿಗಳಲ್ಲಿ ಆತಂಕ ಮೂಡಿಸಿದೆ. ಮೊದಲ ದಿನವೇ ಸಿನಿಮಾ ₹101.10 ಕೋಟಿ ಗಳಿಸಿ ಬಾಕ್ಸ್ ಆಫೀಸ್ನಲ್ಲಿ ಭರ್ಜರಿ ಆರಂಭ ಕಂಡಿತ್ತು. ಆದರೆ ಎರಡನೇ ದಿನ ಕಲೆಕ್ಷನ್ ₹37.65 ಕೋಟಿಗೆ ಇಳಿಕೆಯಾಯಿತು. ಮೂರನೇ ದಿನ ₹27.20 ಕೋಟಿ, ನಾಲ್ಕನೇ ದಿನ ₹25.15 ಕೋಟಿ ಹಾಗೂ ಐದನೇ ದಿನ ₹23 ಕೋಟಿ ಗಳಿಸಿದೆ. ಹೀಗಾಗಿ ಆರಂಭಿಕ ದಿನದ ಗಳಿಕೆಗೆ ಹೋಲಿಸಿದರೆ ಐದನೇ ದಿನದ ಕಲೆಕ್ಷನ್ನಲ್ಲಿ ಗಣನೀಯ ಕುಸಿತ ಕಂಡುಬಂದಿದೆ.
ಥಿಯೇಟರ್ ಆಕ್ಯುಪೆನ್ಸಿಯಲ್ಲಿಯೂ ಏರಿಳಿತ ಕಂಡುಬಂದಿದೆ. ಎರಡನೇ ದಿನ ಶೇ.26.6, ಮೂರನೇ ದಿನ ಶೇ.25.5, ನಾಲ್ಕನೇ ದಿನ ಶೇ.24.3 ಹಾಗೂ ಐದನೇ ದಿನ ಶೇ.25.3ರಷ್ಟು ಆಕ್ಯುಪೆನ್ಸಿ ದಾಖಲಾಗಿದೆ ಎನ್ನಲಾಗಿದೆ. ಚಿತ್ರಕ್ಕೆ ವ್ಯಕ್ತವಾಗುತ್ತಿರುವ ನೆಗೆಟಿವ್ ವಿಮರ್ಶೆಗಳು ಗಳಿಕೆ ಕುಸಿತಕ್ಕೆ ಕಾರಣವಾಗಿರಬಹುದು ಎಂದು ಬಾಕ್ಸ್ ಆಫೀಸ್ ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.
ಭಾಷಾವಾರು ಕಲೆಕ್ಷನ್ ನೋಡಿದರೆ ಹಿಂದಿ ಆವೃತ್ತಿ ಐದನೇ ದಿನವೂ ಮುಂಚೂಣಿಯಲ್ಲಿದೆ. 11,734 ಶೋಗಳಿಂದ ಹಿಂದಿ ಆವೃತ್ತಿ ₹14.50 ಕೋಟಿ ಗಳಿಸಿದೆ. ಕನ್ನಡದ ಮೂಲ ಆವೃತ್ತಿ 1,297 ಶೋಗಳನ್ನು ಕಂಡಿದ್ದು, ಶೇ.50ರಷ್ಟು ಆಕ್ಯುಪೆನ್ಸಿಯೊಂದಿಗೆ ₹6.40 ಕೋಟಿ ಗಳಿಸಿದೆ. ತೆಲುಗು ಆವೃತ್ತಿಯಿಂದ ₹1.40 ಕೋಟಿ, ತಮಿಳಿನಿಂದ ₹60 ಲಕ್ಷ ಹಾಗೂ ಮಲಯಾಳಂ ಆವೃತ್ತಿಯಿಂದ ₹10 ಲಕ್ಷ ಕಲೆಕ್ಷನ್ ಆಗಿದೆ ಎನ್ನಲಾಗಿದೆ.
‘ಟಾಕ್ಸಿಕ್’ ₹285 ಕೋಟಿ ಜಾಗತಿಕ ಕಲೆಕ್ಷನ್ ದಾಟಿರುವುದು ಚಿತ್ರತಂಡಕ್ಕೆ ದೊಡ್ಡ ಮೈಲಿಗಲ್ಲಾಗಿದೆ. ಮುಂದಿನ ದಿನಗಳಲ್ಲಿ ಸಿನಿಮಾ ಯಾವ ಮಟ್ಟಿಗೆ ಗಳಿಕೆ ಮಾಡಲಿದೆ ಎಂಬುದು ಕುತೂಹಲ ಮೂಡಿಸಿದೆ.