ಚಿತ್ರರಂಗದಲ್ಲಿ ಕೋಟ್ಯಂತರ ಅಭಿಮಾನಿಗಳನ್ನು ಸಂಪಾದಿಸಿ ಮ್ಯಾನ್ ಆಫ್ ಮಾಸಸ್ ಅನಿಸಿಕೊಂಡಿರೋ ಜೂನಿಯರ್ ಎನ್ಟಿಆರ್, ಇವತ್ತು ಗ್ಲೋಬಲ್ ಸ್ಟಾರ್ ಆಗಿ ಮೆರೆಯುತ್ತಿರಬಹುದು. ಆದ್ರೆ, ಈ ಸಾಮ್ರಾಜ್ಯ ಕಟ್ಟುವುದು ಅವರ ಪಾಲಿಗೆ ಸುಲಭವಾಗಿರಲಿಲ್ಲ. ತಮ್ಮ ಮೊದಲ ಸಿನಿಮಾದ ಮುಹೂರ್ತಕ್ಕೆ ಆಶೀರ್ವದಿಸೋಕೆ ಸ್ವಂತ ತಂದೆ-ತಾಯಿಯೇ ಬರಲಿಲ್ಲ ಅಂದಾಗ ಆ 18 ವರ್ಷದ ಹುಡುಗ ಅನುಭವಿಸಿದ ನೋವು ಎಂಥದ್ದು ಗೊತ್ತಾ..?
ಅಂದು ಸಾಥ್ ಕೊಡದ ತಂದೆ-ತಾಯಿ.. NTR ನೋವಿನ ನುಡಿ..!
ತಂದೆ ಸಪೋರ್ಟ್ ಇಲ್ಲ..25 ವರ್ಷಗಳ ಬಳಿಕ ಕಾರಣ ಹೇಳಿದ ತಾರಕ್
ರಾಜಮೌಳಿ ಕುಟುಂಬವೇ ತಾರಕ್ನ ಸೆಕೆಂಡ್ ಫ್ಯಾಮಿಲಿ..!
ಒಂಟಿತನವೇ ಹಠಕ್ಕೆ ಕಾರಣ.. ಅಭಿಮಾನಿಗಳೇ ನನ್ನ ಶಕ್ತಿ..!
ತೆಲುಗು ಚಿತ್ರರಂಗದ ಜನಪ್ರಿಯ ನಂದಮೂರಿ ಕುಟುಂಬದ ಕುಡಿಯಾಗಿದ್ದರೂ, ಜೂನಿಯರ್ ಎನ್ಟಿಆರ್ ಅವರ ಆರಂಭಿಕ ದಿನಗಳ ಹಾದಿ ಮುಳ್ಳಿನ ಹಾದಿಯಾಗಿತ್ತು. ಇತ್ತೀಚೆಗೆ ನಡೆದ ಡೋಂಟ್ ಟ್ರಬಲ್ ದಿ ಟ್ರಬಲ್ ಸಿನಿಮಾದ ಪ್ರೀ-ರಿಲೀಸ್ ಈವೆಂಟ್ನಲ್ಲಿ ಮನಬಿಚ್ಚಿ ಮಾತನಾಡಿದ ಎನ್ಟಿಆರ್, ತಮ್ಮ 25 ವರ್ಷಗಳ ರಂಗಪ್ರವೇಶದ ದಿನಗಳನ್ನು ನೆನೆದು ಭಾವುಕರಾಗಿದ್ದಾರೆ. 2001ರಲ್ಲಿ ತಮ್ಮ ಚೊಚ್ಚಲ ಸಿನಿಮಾ ನಿನ್ನು ಚೂಡಾಲನಿಯ ಮುಹೂರ್ತ ಮತ್ತು ಪೂಜೆ ನಡೆದಾಗ, ಕನಿಷ್ಠ ಧೈರ್ಯ ತುಂಬಲು ಅಥವಾ ಆಶೀರ್ವಾದ ಮಾಡಲು ಕುಟುಂಬದ ಒಬ್ಬೇ ಒಬ್ಬ ಸದಸ್ಯನೂ ಬರಲಿಲ್ಲವಂತೆ. ಅಂದು ಅಷ್ಟೊಂದು ದೊಡ್ಡ ಸೆಟ್ನಲ್ಲಿ ತಾವೊಬ್ಬರೇ ನಿಂತು ತೀವ್ರ ಒಂಟಿತನ ಮತ್ತು ಕಣ್ಣೀರಿನ ನೋವನ್ನು ಅನುಭವಿಸಿದ್ದಾಗಿ ಎನ್ಟಿಆರ್ ಬಹಿರಂಗಪಡಿಸಿದ್ದಾರೆ.
ಅಷ್ಟಕ್ಕೂ, ಅಂದು ಹೆತ್ತ ತಂದೆ-ತಾಯಿ ಯಾಕೆ ಶೂಟಿಂಗ್ ಸ್ಪಾಟ್ಗೆ ಬರಲಿಲ್ಲ ಎನ್ನುವುದಕ್ಕೂ ತಾರಕ್ ಕಾರಣ ಬಿಚ್ಚಿಟ್ಟಿದ್ದಾರೆ. ತಾಯಿ ಶಾಲಿನಿ ಅವರು ಕ್ಯಾಮೆರಾ ಹಾಗೂ ಸಾರ್ವಜನಿಕ ಬೆಳಕಿನಿಂದ ದೂರವಿರಲು ಬಯಸುವ ಸರಳ ಮಹಿಳೆಯಾಗಿದ್ದರಿಂದ ಬರಲಿಲ್ಲ. ಇನ್ನು ತಂದೆ ನಂದಮೂರಿ ಹರಿಕೃಷ್ಣ ಅವರು ಬರದೇ ಇದ್ದುದರ ಹಿಂದೆ ಒಂದು ಶಿಸ್ತಿನ ಪ್ರೀತಿಯಿತ್ತು. “ನನ್ನ ಮಗ ಹೊರ ಪ್ರಪಂಚಕ್ಕೆ ಹೋಗಿ, ಬಿದ್ದು ಎದ್ದು ತನ್ನ ಸ್ವಂತ ಕಾಲಿನ ಮೇಲೆ ನಿಲ್ಲುವುದನ್ನು ಕಲಿಯಲಿ, ಚಿತ್ರರಂಗದ ಸವಾಲುಗಳನ್ನು ಸ್ವತಃ ಎದುರಿಸಿ ಗಟ್ಟಿಯಾಗಲಿ” ಎನ್ನುವುದೇ ತಂದೆಯ ಉದ್ದೇಶವಾಗಿತ್ತು. ಆದಾಗ್ಯೂ, ಹರಿಕೃಷ್ಣ ಅವರ ಎರಡನೇ ಪತ್ನಿಯ ಮಗನಾಗಿದ್ದರಿಂದ ಆರಂಭದಲ್ಲಿ ನಂದಮೂರಿ ಬ್ಯಾನರ್ನಿಂದ ಅವರಿಗೆ ಸಂಪೂರ್ಣ ಸ್ವೀಕಾರ ಸಿಕ್ಕಿರಲಿಲ್ಲ ಎಂಬ ಮಾತುಗಳು ಟಾಲಿವುಡ್ ಅಂಗಳದಲ್ಲಿದ್ದವು.
ಒಂಟಿಯಾಗಿ ನಿಂತ ತಾರಕ್ ಗೆ, ದೇವರು ಮತ್ತು ಕಷ್ಟಪಟ್ಟು ಸಂಪಾದಿಸಿದ ಅಭಿಮಾನಿಗಳೇ ದೊಡ್ಡ ಶಕ್ತಿಯಾಗಿ ನಿಂತರು. ತಂದೆ-ತಾಯಿಯಿಂದ ಸಿಗದ ಧೈರ್ಯ ಮತ್ತು ಬೆಂಬಲವನ್ನು ಕೋಟ್ಯಂತರ ಅಭಿಮಾನಿಗಳು ಬೆನ್ನೆಲುಬಾಗಿ ನಿಂತು ನೀಡಿದರು. ಇದರ ಜೊತೆಗೆ, ಚಿತ್ರರಂಗದಲ್ಲಿ ತಮ್ಮನ್ನು ಸ್ವಂತ ಮಗನಂತೆ ರಕ್ಷಿಸಿ, ಬೆಳೆಸಿದ ರಾಜಮೌಳಿ, ಸಂಗೀತ ನಿರ್ದೇಶಕ ಎಂ.ಎಂ. ಕೀರವಾಣಿ ಹಾಗೂ ಎಸ್ಎಸ್ ಕಾರ್ತಿಕೇಯ ಅವರ ಇಡೀ ಕುಟುಂಬವೇ ತಮಗೆ ಎರಡನೇ ಕುಟುಂಬ ಎಂದು ಕೃತಜ್ಞತೆಯಿಂದ ಸ್ಮರಿಸಿದ್ದಾರೆ. ಸ್ಟೂಡೆಂಟ್ ನಂ.1 ಮೂಲಕ ಬ್ರೇಕ್ ನೀಡಿದ ರಾಜಮೌಳಿ, ತಾರಕ್ ಬದುಕಿನ ನಿಜವಾದ ಗೈಡ್ ಆದರು.
ಆ ಆರಂಭಿಕ ನೋವು ಮತ್ತು ಒಂಟಿತನವೇ ಎನ್ಟಿಆರ್ ಅವರಿಗೆ ಹಟ ತರಿಸಿತು. ಸ್ಟೂಡೆಂಟ್ ನಂ.1, ಸಿಂಹಾದ್ರಿ, ಯಮದೊಂಗ ದಂತಹ ಬ್ಲಾಕ್ಬಸ್ಟರ್ಗಳಿಂದ ಹಿಡಿದು ಇತ್ತೀಚಿನ ಆರ್ಆರ್ಆರ್ ಹಾಗೂ ದೇವರ ವರೆಗೆ ಪ್ರತಿಯೊಂದು ಸಿನಿಮಾದಲ್ಲೂ ತಮ್ಮ ನಟನಾ ರಾಕ್ಷಸತನ ಮೆರೆದರು. ನಂತರದ ದಿನಗಳಲ್ಲಿ ತಂದೆ ಹರಿಕೃಷ್ಣ ಮತ್ತು ಅಣ್ಣ ಕಲ್ಯಾಣ್ ರಾಮ್ ಅವರೊಂದಿಗೆ ತಾರಕ್ ಬಾಂಧವ್ಯ ತೀರಾ ಆಪ್ತ ಹಾಗೂ ಗಟ್ಟಿಯಾಯಿತು.
ತಮ್ಮ ಚಿತ್ರರಂಗದ ಪಯಣ 25 ವರ್ಷಗಳನ್ನು ಪೂರೈಸುತ್ತಿರುವ ಈ ಶುಭ ಸಂದರ್ಭದಲ್ಲಿ, ಮತ್ತು ರಾಜಮೌಳಿ ಅವರ ಪುತ್ರ ಕಾರ್ತಿಕೇಯ ನಿರ್ಮಿಸುತ್ತಿರುವ ಸಿನಿಮಾದ ವೇದಿಕೆಯಲ್ಲಿದ್ದಾಗ ಎನ್ಟಿಆರ್ ಅವರಿಗೆ ಈ ಹಳೆಯ ನೆನಪುಗಳು ಮರುಕಳಿಸಿದವು. ಇಂದು ಇಡೀ ಜಗತ್ತೇ ಕೊಂಡಾಡುವ ನಟನಾಗಿದ್ದರೂ, ಅಂದು ಯಾವುದೇ ಬೆಂಬಲವಿಲ್ಲದೆ ಬೆಳೆದು ಬಂದ ಆ ಕಠಿಣ ದಿನಗಳನ್ನು ಸ್ಮರಿಸಿದ ತಾರಕ್ ಅವರ ಮಾತುಗಳು ಈಗ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿದ್ದು, ಅಭಿಮಾನಿಗಳ ಕಣ್ಣಂಚನ್ನು ಒದ್ದೆ ಮಾಡುತ್ತಿವೆ.
ಕೀರ್ತಿ ಪಾಟೀಲ್, ಫಿಲಂ ಬ್ಯೂರೋ, ಗ್ಯಾರಂಟಿ ನ್ಯೂಸ್