ಪಹಲ್ಗಾಮ್ ದಾಳಿಯ ನಂತರ, ಭಾರತವು ಪಾಕಿಸ್ತಾನದ ವಿರುದ್ಧ ರಾಜತಾಂತ್ರಿಕ ಯುದ್ಧ ಆರಂಭಿಸಿದೆ. ಇದರ ಭಾಗವಾಗಿ, ಸಿಂಧು ನದಿಯ ನೀರನ್ನು ಪಾಕಿಸ್ತಾನಕ್ಕೆ ಹರಿಯದಂತೆ ತಡೆಯಲು ನಿರ್ಧರಿಸಲಾಗಿದೆ. ಜೊತೆಗೆ, ಪಾಕಿಸ್ತಾನಿ ನಟರು ಹಾಗೂ ತಂತ್ರಜ್ಞರಿಗೆ ಭಾರತೀಯ ಸಿನಿಮಾ ಕ್ಷೇತ್ರದಲ್ಲಿ ಕೆಲಸ ಮಾಡುವಂತಿಲ್ಲ ಎಂಬ ನಿಷೇಧವನ್ನು ಹೇರಲಾಗಿದೆ.
ಈ ನಡುವೆಯೇ, ಪಾಕಿಸ್ತಾನಿ ನಟ ಫಹಾದ್ ಖಾನ್ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ‘ಅಬಿರ್ ಗುಲಾಲ್’ ಎಂಬ ಭಾರತೀಯ ಸಿನಿಮಾವನ್ನು ಬಿಡುಗಡೆ ಮಾಡಲು ಅವಕಾಶ ನೀಡಲಾಗಿಲ್ಲ. ಈ ಬಗ್ಗೆ ಭಾರತ ಸರಕಾರದ ಮಾಹಿತಿ ಮತ್ತು ಪ್ರಸಾರ ಖಾತೆ ಘೋಷಿಸಿದೆ. ಈ ನಿರ್ಧಾರ ಚಿತ್ರದ ನಿರ್ಮಾಪಕ ತಂಡಕ್ಕೆ ಭಾರೀ ಆಘಾತ ತಂದಿದೆ. ಇದಾದ ಬಳಿಕ, ಪಾಕಿಸ್ತಾನವೂ ಈ ಸಿನಿಮಾವನ್ನು ತನ್ನ ದೇಶದಲ್ಲಿ ನಿಷೇಧಿಸಿದೆ.
ಪಾಕಿಸ್ತಾನದ ಪ್ರಮುಖ ವಿತರಕ ಸತೀಶ್ ಆನಂದ್ ಈ ಕುರಿತಂತೆ ಮಾತನಾಡಿದ್ದಾರೆ. “ಅಬಿರ್ ಗುಲಾಲ್ ಸಿನಿಮಾದಲ್ಲಿ ಭಾರತೀಯ ನಾಯಕಿ ಇದ್ದಾಳೆ ಎಂಬ ಕಾರಣಕ್ಕೆ ಪಾಕಿಸ್ತಾನದಲ್ಲಿ ಇದನ್ನು ಬಿಡುಗಡೆ ಮಾಡುವುದಿಲ್ಲ” ಎಂದು ಅವರು ಸ್ಪಷ್ಟಪಡಿಸಿದರು. “ಕೆಟ್ಟ ಬಿಡುಗಡೆ ಸಮಯದ ಕಾರಣ, ನಿರ್ಮಾಪಕರು ಹಾಗೂ ವಿತರಕರು ಭಾರೀ ಆರ್ಥಿಕ ನಷ್ಟವನ್ನು ಎದುರಿಸಬೇಕಾಗಿದೆ” ಎಂದೂ ಅವರು ಅಭಿಪ್ರಾಯಪಟ್ಟಿದ್ದಾರೆ.
‘ಅಬಿರ್ ಗುಲಾಲ್’ ಸಿನಿಮಾದಲ್ಲಿ ಫಹಾದ್ ಖಾನ್ ನಾಯಕನಾಗಿ ಅಭಿನಯಿಸಿದ್ದಾರೆ. ಹೀಗಾಗಿ, ಭಾರತದಲ್ಲಿ ಪಾಕಿಸ್ತಾನಿ ನಟನ ಇರುವಿಕೆ ಹಾಗೂ ಪಾಕಿಸ್ತಾನದಲ್ಲಿ ಭಾರತೀಯ ನಟಿಯ ಇರುವಿಕೆ ಎರಡೂ ಈ ಚಿತ್ರಕ್ಕೆ ಸಂಕಷ್ಟವನ್ನು ತಂದಿವೆ.
ಫಹಾದ್ ಖಾನ್ ಪಾಕಿಸ್ತಾನದ ಪ್ರಸಿದ್ಧ ನಟ. ತಮ್ಮ ಅದ್ಭುತ ಅಭಿನಯ ಮತ್ತು ಆಕರ್ಷಕ ವ್ಯಕ್ತಿತ್ವದಿಂದ ಹಲವಾರು ಸಿನಿಮಾ ಮತ್ತು ಧಾರಾವಾಹಿಗಳ ಮೂಲಕ ಜನಪ್ರಿಯತೆ ಪಡೆದಿದ್ದಾರೆ. ಫಹಾದ್ ಖಾನ್ ಹಿಂದಿನ ಕೆಲವು ಭಾರತೀಯ ಸಿನಿಮಾಗಳಲ್ಲಿಯೂ ಅಭಿನಯಿಸಿದ್ದರು. ವಿಶೇಷವಾಗಿ, ‘ಏ ದಿಲ್ ಹೇ ಮುಷ್ಕಿಲ್’ ಸಿನಿಮಾದಲ್ಲಿ ಅವರ ಪಾತ್ರದ ವೇಳೆ ಕೂಡ ಪಾಕಿಸ್ತಾನಿ ನಟರನ್ನು ಭಾರತದಲ್ಲಿ ಬಳಸುವ ವಿಚಾರದಲ್ಲಿ ದೊಡ್ಡ ವಿವಾದ ಉಂಟಾಗಿತ್ತು.
ಆದಾದ ಬಳಿಕ, ಭಾರತ ಪಾಕಿಸ್ತಾನಿ ನಟರ ಮೇಲು ನಿಷೇಧ ಹೇರಿದರೂ, 2023 ರಲ್ಲಿ ಈ ನಿಷೇಧವನ್ನು ಹಿಂಪಡೆಯಲಾಯಿತು. ಇದೇ ವರ್ಷ ಪಾಕಿಸ್ತಾನಿ ಚಿತ್ರಗಳನ್ನು ಭಾರತದಲ್ಲಿ ಬಿಡುಗಡೆ ಮಾಡುವ ನಿರ್ಬಂಧವೂ ತೆಗೆದುಹಾಕಲಾಗಿತ್ತು. ಆದರೆ ಇತ್ತೀಚಿನ ರಾಜತಾಂತ್ರಿಕ ಉದ್ವಿಗ್ನತೆಗಳ ಹಿನ್ನೆಲೆ ಮತ್ತೆ ಈ ನಿಷೇಧಗಳು ಜಾರಿಗೆ ಬಂದಿವೆ.
‘ಅಬಿರ್ ಗುಲಾಲ್’ ಚಿತ್ರವನ್ನು ಆರತಿ ಎಸ್ ಬಾಗಡಿ ನಿರ್ದೇಶಿಸಿದ್ದಾರೆ. ನಟಿ ವಾಣಿ ಕಪೂರ್ ಸಿನಿಮಾದ ನಾಯಕಿಯಾಗಿ ನಟಿಸಿದ್ದಾರೆ. ಚಿತ್ರದಲ್ಲಿ ಫಹಾದ್ ಖಾನ್ ಹೊರತುಪಡಿಸಿ ಉಳಿದ ಎಲ್ಲಾ ನಟರು ಭಾರತೀಯರಾಗಿದ್ದಾರೆ. ಆದರೂ ಫಹಾದ್ ಖಾನ್ ಪ್ರಮುಖ ಪಾತ್ರದಲ್ಲಿರುವುದರಿಂದಲೇ ಸಿನಿಮಾ ಎರಡೂ ದೇಶಗಳಲ್ಲಿ ವಿವಾದದ ಗುರಿಯಾಗಿದೆ.
