ಬೆಂಗಳೂರು ಆ.26: ರಾಜ್ಯದಲ್ಲಿ ಮುಂಗಾರು ಮಳೆ ನಿರೀಕ್ಷಿತ ಪ್ರಮಾಣದಲ್ಲಿ ಸುರಿಯದ ಪರಿಣಾಮ ಕೃಷಿ ಚಟುವಟಿಕೆಗಳ ಮೇಲೆ ಪರಿಣಾಮ ಬೀರಿದೆ. ಬೆಳೆ ಇಳುವರಿ ಕುಸಿಯುತ್ತಿರುವ ಬೆನ್ನಲ್ಲೇ ಬೆಂಗಳೂರಿನ ಮಾರುಕಟ್ಟೆಗಳಲ್ಲಿ ತರಕಾರಿ ದರಗಳು ನಿಧಾನವಾಗಿ ಏರಿಕೆಯಾಗುತ್ತಿದ್ದು, ಗ್ರಾಹಕರಿಗೆ ಬೆಲೆ ಏರಿಕೆಯ ಬಿಸಿ ತಟ್ಟುತ್ತಿದೆ.
ಈ ಹಿಂದೆ ಕೆ.ಜಿಗೆ ರೂ.30ರಿಂದ ರೂ.40ರ ಆಸುಪಾಸಿನಲ್ಲಿ ಸಿಗುತ್ತಿದ್ದ ಹಲವು ತರಕಾರಿಗಳ ಬೆಲೆ ಇದೀಗ ರೂ.60ರಿಂದ ರೂ.80ರ ಗಡಿ ದಾಟಿದೆ. ಕೆಲವು ತರಕಾರಿಗಳ ದರ ಈಗಾಗಲೇ ರೂ.100ರ ಸಮೀಪ ತಲುಪಿದ್ದು, ದಿನನಿತ್ಯದ ಅಡುಗೆಗೆ ಅಗತ್ಯವಿರುವ ತರಕಾರಿಗಳನ್ನು ಖರೀದಿಸಲು ಜನರು ಹಿಂದೇಟು ಹಾಕುತ್ತಿದ್ದಾರೆ.
ಮಾರುಕಟ್ಟೆಯಲ್ಲಿ ತರಕಾರಿ ಬೆಲೆ ಹೆಚ್ಚಾಗಿರುವುದರಿಂದ ಒಂದು ಕೆಜಿ ಖರೀದಿಸುತ್ತಿದ್ದ ಗ್ರಾಹಕರು ಇದೀಗ ಅರ್ಧ ಕೆಜಿ ಅಥವಾ ಕಾಲು ಕೆಜಿಗೆ ಸೀಮಿತವಾಗುತ್ತಿದ್ದಾರೆ. ಇದರಿಂದ ಗ್ರಾಹಕರಿಗೆ ಮಾತ್ರವಲ್ಲದೆ ತರಕಾರಿ ವ್ಯಾಪಾರಿಗಳಿಗೂ ಸಂಕಷ್ಟ ಎದುರಾಗಿದೆ. ಬೆಲೆ ಹೆಚ್ಚಾದಂತೆ ಖರೀದಿಗೆ ಬರುವವರ ಸಂಖ್ಯೆ ಕಡಿಮೆಯಾಗುತ್ತಿದೆ ಎಂದು ವ್ಯಾಪಾರಿಗಳು ಅಳಲು ತೋಡಿಕೊಂಡಿದ್ದಾರೆ.
ಬೆಂಗಳೂರಿನಲ್ಲಿ ತರಕಾರಿ ದರ ಎಷ್ಟಿದೆ?
ಬೆಂಗಳೂರಿನ ಹೋಲ್ಸೇಲ್ ಮತ್ತು ರಿಟೇಲ್ ಮಾರುಕಟ್ಟೆಯಲ್ಲಿ ಪ್ರಮುಖ ತರಕಾರಿಗಳ ದರ ಹೀಗಿದೆ:
- ಶುಂಠಿ: ರೂ.120–ರೂ.130
- ಬೆಳ್ಳುಳ್ಳಿ: ರೂ.230–ರೂ.250
- ಬೀನ್ಸ್: ರೂ.100–ರೂ.110
- ಹಸಿಬಟಾಣಿ: ರೂ.80–ರೂ.90
- ಹಸಿಮೆಣಸಿನಕಾಯಿ: ರೂ.80–ರೂ.90
- ಈರುಳ್ಳಿ: ರೂ.50–ರೂ.70
- ನುಗ್ಗೆಕಾಯಿ: ರೂ.90–ರೂ.100
- ಟೊಮೇಟೊ: ರೂ.25–ರೂ.30
- ಕ್ಯಾರೆಟ್: ರೂ.60–ರೂ.70
- ಬೀಟ್ರೂಟ್: ರೂ.60–ರೂ.70
- ಕ್ಯಾಪ್ಸಿಕಂ: ರೂ.70–ರೂ.80
- ಹೀರೆಕಾಯಿ: ರೂ.60–ರೂ.80
- ಬೆಂಡೆಕಾಯಿ: ರೂ.50–ರೂ.60
- ಬದನೆಕಾಯಿ: ರೂ.50–ರೂ.60
- ಹಾಗಲಕಾಯಿ: ರೂ..40–ರೂ.50
- ಹೂಕೋಸು: ರೂ.40–ರೂ.50
- ಎಲೆಕೋಸು: ರೂ.50–ರೂ.60
- ಮೂಲಂಗಿ: ರೂ.40–ರೂ.50
KR ಮಾರುಕಟ್ಟೆಯತ್ತ ಗ್ರಾಹಕರ ಮುಖ
ಚಿಲ್ಲರೆ ಮಾರುಕಟ್ಟೆಗಳಿಗೆ ಹೋಲಿಸಿದರೆ ಕೆ.ಆರ್. ಮಾರುಕಟ್ಟೆಯಲ್ಲಿ ಕೆಲವು ತರಕಾರಿಗಳು ಕಡಿಮೆ ದರದಲ್ಲಿ ಸಿಗುತ್ತಿವೆ ಎಂದು ಗ್ರಾಹಕರು ಹೇಳುತ್ತಿದ್ದಾರೆ. ಮನೆ ಸಮೀಪದ ಮಾರುಕಟ್ಟೆ ಹಾಗೂ ಕೆ.ಆರ್. ಮಾರುಕಟ್ಟೆಯ ನಡುವೆ ಕೆ.ಜಿಗೆ ರೂ.30ರಿಂದ ರೂ.40ರವರೆಗೆ ದರ ವ್ಯತ್ಯಾಸವಿದೆ ಎನ್ನಲಾಗುತ್ತಿದೆ.
ತಾಜಾ ತರಕಾರಿಗಳನ್ನು ಕಡಿಮೆ ಬೆಲೆಗೆ ಹೋಲ್ಸೇಲ್ನಲ್ಲಿ ಖರೀದಿಸಲು ಕೆ.ಆರ್. ಮಾರುಕಟ್ಟೆಗೆ ಬರುತ್ತಿದ್ದೇವೆ ಎಂದು ಗ್ರಾಹಕರು ತಿಳಿಸಿದ್ದಾರೆ.
ಒಂದೆಡೆ ಈರುಳ್ಳಿ ಸೇರಿದಂತೆ ಕೆಲವು ತರಕಾರಿಗಳ ದರ ಏರಿಕೆಯಾಗುತ್ತಿದ್ದರೆ, ಮತ್ತೊಂದೆಡೆ ಮಳೆಯ ಕೊರತೆಯಿಂದ ಬೆಳೆ ಉತ್ಪಾದನೆಯ ಮೇಲೂ ಪರಿಣಾಮ ಬೀರುವ ಆತಂಕ ಎದುರಾಗಿದೆ. ಹೀಗಾಗಿ ಮುಂದಿನ ದಿನಗಳಲ್ಲಿ ತರಕಾರಿ ಬೆಲೆ ಮತ್ತಷ್ಟು ಏರಿಕೆಯಾಗುತ್ತದೆಯೇ ಎಂಬ ಚಿಂತೆ ಗ್ರಾಹಕರನ್ನು ಕಾಡುತ್ತಿದೆ.
ಒಟ್ಟಿನಲ್ಲಿ, ತರಕಾರಿ ಬೆಲೆ ಏರಿಕೆಯಿಂದ ಅಡುಗೆ ಮನೆಯ ಬಜೆಟ್ ಏರುಪೇರಾಗಿದ್ದು, ಗ್ರಾಹಕರು ಮಾತ್ರ ಬೆಲೆ ಇಳಿಕೆಯನ್ನು ಎದುರು ನೋಡುತ್ತಿದ್ದಾರೆ.